Ձեր վստահելի աղբյուրը

Նախօրեին Բրիտանիայում «Մեգզիթի» հարցով կայացած արտահերթ հանդիպումից հետո թագուհի Եղիսաբեթ 2-րդը հայտարարել է, որ աջակցում է թոռան՝ արքայազն Հարիի, և նրա կնոջ՝ Մեգան Մարքլի որոշմանը՝ հեռանալ Բրիտանիայի թագավորական ընտանիքից և նոր կյանք սկսել Մեծ Բրիտանիայում և Կանադայում: Այս մասին գրում է euronews-ը։

Հրապարակված հայտարարության մեջ նա ասում է, որ արքայական ընտանիքը «կառուցողական քննարկումներ» է ունեցել Սասեքսի դուքսի և դքսուհու ապագայի վերաբերյալ և «ամբողջովին սատարում է» նրանց՝ որպես երիտասարդ ընտանիք, նոր կյանք ստեղծելու ցանկությանը:

«Չնայած մենք կգերադասեինք, որ նրանք մնային թագավորական ընտանիքի լիարժեք անդամներ, մենք հարգում և հասկանում ենք նրանց ցանկությունը՝ ապրել ավելի շատ անկախ յանքով՝ որպես ընտանիք՝ միաժամանակ մնալով իմ ընտանիքի արժեքավոր մասը», - ասվում է հայտարարության մեջ:

«Հարրին և Մեգանը հասկացրել են, որ նրանք չեն ցանկանում իրենց նոր կյանքում հենվել պետական միջոցների վրա: Հետևաբար համաձայնեցված է, որ կլինի անցումային շրջան, որի ընթացքում նրանք ժամանակ կանցկացնեն Կանադայում և Մեծ Բրիտանիայում:

Սրանք իմ ընտանիքի համար բարդ գործեր են, որոնք պետք է լուծվեն, և դեռևս անելիքներ կան, բայց ես խնդրել եմ, որ վերջնական որոշումներ կայացվեն առաջիկա օրերին»,-ասվում է թագուհու հայտարարության մեջ։

Հիշեցնենք, որ  նախորդ շաբաթ Հարրին և Մեգանն անակնկալ հայտարարեցին, որ վայր են դնում թագավորական ընտանիքի պարտականությունները,  ցանկանում են լինել ֆինանսապես անկախ ու  ապրել Կանադայում ու Բրիտանիայում։