Ձեր վստահելի աղբյուրը

«Պաշտպանական կողմը տուժողի իրավահաջորդի կողմից արած հայտարարությունը միանշանակ ընկալել է որպես սպառնալիք»,-դատական նիստի ավարտից հետո հայտարարեց ՀՀ երկրորդ նախագահ Ռոբերտ Քոչարյանի փաստաբան Ռուբեն Սահակյանը։

Հիշեցնենք, որ նախորդ  նիստում  Խաչատուրովի փաստաբան Միհրան Պողոսյանի խոսքից հետո հնչեց նման հայտարարություն.  «Թող հարգեն մարտի 1-ը և չփորձեն ինչ-որ այլ երևույթներ պատկերացնել, թե չէ իրենք էլ կհայտնվեն մեր օրին»։

Պաշտպանները դա որակեցին որպես սպանված հարազատ ունենալու մասին սպառնալիք։

Դատավոր Դանիբեկյանն այսօրվա նիստում հայտարարեց՝ ուսումնասիրել են արձանագրությունը, դատարանը որևէ հիմք չունի արձանագրել, որ պաշտպանական կողմի նկատմամբ եղել է սպառնալիք։ Նիստից հետո ամբաստանյալներից Սեյրան Օհանյանը կարծիք հայտնեց՝ ճիշտ կլինի հրապարակել տեսագրությունը։

«Մենք մեր հետագա գործողությունները կորոշենք ու կհայտնենք հասարակությանն ու դատարանին»,-ասաց Ռուբեն Սահակյանը։

Քոչարյանի մյուս փաստաբան Հայկ Ալումյանն էլ նկատեց՝ դատավարությունը պետք է լինի դատավարություն, ոչ թե այսպես։

«Եթե դատարանն իր գործողություններով ցույց չտվեց, որ անհնար է նման միջադեպը դատարանի դահլիճում, մենք կմտածենք, թե ինչ անենք։ Դատարանը պիտի ապահովի դատավարության բնականոն ընթացքը, այն ինչ տեղի է ունենում վերջին նիստերին դատարանի դահլիճում, դա բնականոն ընթացք չի։ Հույս ունենք, որ դատարանը կանի ամեն բան, որ այլևս նման միջադեպեր չլինեն»,-ասաց նա։