Ձեր վստահելի աղբյուրը

Լիբիայում հակամարտությունը շարունակվում է։ Այս երկրի երկու հակամարտող ուժերը, որոնցից յուրաքանչյուրն ունի զորքեր և արտերկրյա աջակցություն, համաձայնության չեկան: Երկրի արևելքը հրամանատար Քալիֆա Հաֆթարի ձեռքում է, որը վիճարկում է ՄԱԿ-ի կողմից ճանաչված վարչապետ Ֆայեզ Սարաջի իշխանությունը: Մոսկվայում անցած բանակցություններն ապարդյուն ավարտվեցին, կողմերից և ոչ մեկը փոխզիջման պատրաստ չէ:Այս մասին գրու մ է Ամերիկայի Ձայնը։

Ստեղծված իրավիճակում Սարաջի աջակից Թուրքիայի նախագահ Ռեջեփ Էրդողանի հայտարարությունը, ըստ որի ինքը նախատեսում է զորք մտցնել Լիբիա, կարող է միայն բարդացնել իրավիճակը, համոզված են վերլուծաբանները:

«Թուրքիան ցանկանում է կանխել Հաֆթարի հաղթական երթը, ում հաղթանակը նշանակում է Եգիպտոսի, Էմիրությունների, Սաուդների հաղթանակը՝ երկրներ, որոնց հետ Անկարան արդեն իսկ բարդ հարաբերություններ ունի», - Միջազգային ճգնաժամային խմբի փորձագետ Կլաուդիա Գազզինիի խոսքով, Անկարայի հիմնական նպատակը Միջերկրական ծովն է.

«Թուրքիան փորձում է կանխել իրենց տարածքով Եվրոպային բնական գազ մատակարարելու Եգիպտոսի, Իսրայելի, Կիպրոսի և Հունաստանի փորձերը»,-ասում է Գազզինին։

Հաֆթարին աջակցող ուժերն Լիբիա զորք ուղարկելու Թուրքիայի որոշումն արդեն իսկ «բռնազավթում» են որակել: Վերլուծաբանի կարծիքով, Թուրքիայի ներխուժումը միայն նվազեցնելու է Լիբիայում խաղաղության հաստատման հեռանկարը.

«Աջակցելով Տրիպոլիեից գործող կառավարությանը՝ Թուրքիան դրդում է նրանց ավելի կոշտ դիրքորոշում որդեգրել եւ հրաժարվել որեւէ փոխզիջման գնալուց»,-ասում է Գազզինին։

Մոսկվայում ձախողված բանակցություններից հետո երեքշաբթի օրը Թուրքիայի նախագահ Էրդողանը հայտարարել է, որ չի հրաժարվելու Լիբիա զորք ուղարկելու ծրագրից.

«Եթե լեգիտիմ կառավարության և մեր լիբիացի եղբայրների դեմ գրոհը շարունակվի, մենք զերծ չենք մնալու Հաֆթարին արժանի դաս տալու իրավունքից»,-ասել էր Էրդողանը։

Լիբիայի հակամարտության կարգավորման շուրջ բանակցությունների հաջորդ փուլը նախատեսված է անցկացնել հունվարի երկրորդ կեսին Բեռլինում: