Ձեր վստահելի աղբյուրը

«Մենք բողոքարկել ենք պարոն Թավադյանի կալանավորման վերաբերյալ դատական ակտը»,-լրագրողների հետ հանդիպմանը հայտարարեց «5-րդ ալիք» հեռուստաընկերության սեփականատեր Արմեն Թավադյանի պաշտպան Հովհաննես Խուդոյանը։

Նրա խոսքով, Ընդհանուր իրավասության դատարանի Կենտրոն նստավայրից Վերաքննիչ դատարան մեկ հատոր գործի տեղափոխումը կատարվել է մեկ շաբաթում։

«Այնուամենայնիվ, նախատեսում ենք, որ առաջիկա մի քանի օրերի ընթացքում, օրենքը սահմանում է եռօրյա ժամկետ, կոնկրետ դատավորին գործը հասնելուց հետո կնշանակվի դատական քննություն, և Վերաքննիչ դատարանում կքննարկվի թե ձերբակալման, թե կալանքի իրավաչափության հարցը, թե նաև գրավի հարց կարող է քննարկվել»,-ասաց փաստաբանը։

Նրա խոսքով, այս պահին դատավարական այլ պրոցեսներ են ընթանում, օրինակ, ճշտում են՝ արդյո՞ք  Արմեն Թավադյանի գույքը գտնվում է կալանքի տակ, առգրավումների հետ կապված միջնորդություններ կան, որոնք քննարկվելու են վարույթն իրականացնող մարմնի հետ։

«Միջնորդություններից մեկը մասնակի բավարարվել է, այն վերաբերում էր Թվադյանի՝ իր ընտանիքի անդամների հետ տեսակցության սահմանափակմանը։ Ընտանիքի անդամները կարողացել են տեսակցել։ Դատավարական գործընթացներին վերաբերող մնացած միջնորդությունները մշակվում են։ Այս շաբաթվա ընթացքում վարույթն իրականացնող մարմնի հետ համապատասխան քննարկումներ կունենանք, կհասկանանք նաև, ի՞նչ հեռանկարներ ենք տեսնում նրանք այս գործով։ Ի սկզբանե, մենք այս գործով որևէ հեռանկար չենք տեսել։ Կարծում եմ, մի օր վարույթ իրականացնող մարմինը կհասկանա, որ նման գործելաոճը հարիր չէ իրավական պետությունում քրեական դատավարություն իրականացնող սուբյեկտներին և պետք է անհապաղ անձի իրավունքների սահմանփակումները վերացվեն»,-ընդգծեց պաշտպանը։