Ձեր վստահելի աղբյուրը

ԱԺ նախկին պատգամավոր, ԵԿՄ նախկին նախագահ Մանվել Գրիգորյանի խափանման միջոցի քննարկման վերաբերյալ այսօր արտահերթ նիստ կգումարվի:

Գլխավոր դատախազության հանրային կապերի բաժնի պետ Արևիկ Խաչատրյանից Panorama.am-ը տեղեկացավ, որ այսօր ժամը 18։00-ին դատախազության նախաձեռնությամբ հրավիրվել է արտահերթ դատական նիստ՝ քննարկելու Մանվել Գրիգորյանի առողջական վիճակի վատթարացման պատճառով նրա խափանման միջոցը փոփոխելու նպատակահարմարության հարցը:

Հիշեցնենք, որ ամիսներ շարունակ «Նաիրի» բժշկական կենտրոնում բուժվող Մանվել Գրիգորյանը երեկ առավոտյան տեղափոխվել է վերակենդանացման բաժանմունք: Ավելի վաղ մեզ հետ զրույցում նրա պաշտպան Լևոն Բաղդասարյանն ասել էր. «Առողջական վիճակը կտրուկ վատթարացել է, անգամ գիտակցության կորուստ է եղել, շտապ միջոցներ են ձեռնարկում: Հիմա, ըստ էության, աշխատում են, որպեսզի, այսպես ասած, չմահանա: Թե այդ դեղերի ազդեցությունը հետո ինչ հետևանքներ կառաջացնի այլ օրգանների վրա, այլ խնդիր է»:

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։ Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել էր։ Պաշտպանները  մի քանի անգամ դիմել են խափանման միջոց կալանքը գրավով փոխելու միջնորդություններ, սակայն մերժվել են։