Ձեր վստահելի աղբյուրը

Առաջատար տեխնոլոգիաների ձեռնարկությունների միության  /ԱՏՁՄ/ վարչությունը ՀՀ կառավարության հետ համագործակցության վերաբերյալ հայտարարություն է տարածել։

Հայտարարության մեջ մասնավորապես ասված է.

«ՀՀ ԿԳՄՍ նախարարի հայտարարությունը, որ ԱՏՁՄ անդամ ընկերություններն այլևս անվստահելի գործընկեր են, անընդունելի ենք համարում և հայտարարում ենք․

1. ԱՏՁՄ անդամ են հանդիսանում 110 բարձր տեխնոլոգիական ընկերություններ, որոնց շրջանառությունից պետությանը վճարված հարկերը գերազանցում են 30 մլրդ․ ՀՀ դրամը, իսկ աշխատակիցների քանակն ավելին է քան 10 000-ը։ Միությունն իր մեջ միավորում է թե՛ միջազգային և թե՛ տեղական ընկերություններ, որոնք մեծ ներդրում ունեն ոչ միայն բարձր տեխնոլոգիական, այլ կրթության և գիտության զարգացման ոլորտներում։

2. Միությունը շարունակաբար համագործակցելով պետության հետ իրագործել է բազմաթիվ պետական նշանակության նախագծեր, ինչպիսիք են «Արմաթ» և «Իրական դպրոց» կրթական ծրագրերը, ինչպես նաև 2019թ․-ին ՀՀ-ում իրականացված Տեղեկատվական տեխնոլոգիաների համաշխարհային համաժողովը /WCIT 2019 Yerevan/, որը պետությունը ներկայացնում է որպես ձեռքբերում թե՛ ներքին և թե՛ համաշխարհային հարթակներում։

3. Այսուհետ ՀՀ ԿԳՄՍ նախարարությունից ակնկալում ենք կառուցողական մոտեցում։ Վերահաստատում ենք մեր պատրաստակամությունը՝ ՀՀ կառավարությանը հիմնավորելու մեր բարձրացրած խնդիրների արդիականությունը և առաջադրած լուծումների արդյունավետությունը»։