Ձեր վստահելի աղբյուրը

Բանակում խաղաղ պայմաններում տարբեր տարիներին մահացած զինծառայողների մայրերն այսօր էլ կառավարության շենքի դիմաց էին։ Նրանք պնդում են՝ իշխանափոխությունից հետո էլ իրենց որդիների սպանության գործերը պատշաճ չեն քննվում, տարիներ շարունակ նրանք չգիտեն, թե որն է եղել իրենց որդիների սպանության պատճառը։

Չնայած Փաշինյանը խոստացել է, որ գործերը կքննվեն, մայրերի պնդմամբ, որևէ գործողություն քննիչների կողմից չի իրականացվել։

«Պարոն Փաշինյանը մեզ ասաց, նոր քննություն է իրականացվելու, բայց ոչինչ չի արվել։ Համակարգը չի փոխվել, պետք է հիմնովին փոխվի։ Բոլոր քննիչները պետք է դատվեն, զինվորների սպանությունների այսքան գործերի քննությունն իրենց ձեռքով է շեղվել»,-ասաց 2010-ին մահացած Վալերի Մուրադյանի մայրը՝ Նանա Մուրադյանը։

Մայրերը նշում են, իրենք նոր ապացույցներ են ներկայացնում, քննիչները կոծկում են։

«Երևի իրենց ամուր զինվորներ են պետք, ամուր զինվորներ, որ սպանեն ու առողջ օրգանները վաճառեն»,-իր կասկածներն է հայտնում Արթուր Ղազարյանի մայրը։

Տիգրան Օհանջանյանի մայրն էլ նշեց, իր որդու գործը տեղում դոփում է, քննիչները որևէ բան չեն անում. «Ոչ մի փաստաթուղթ չենք ստացել, թե ինչ փուլում է գործը, ինչ գործողություններ են արվում։ Պարզ չէ իմ որդու մահվան պատճառը, դատարանում տապալվել է նրանց ներկայացրած մեղադրանքը»։

Ծնողներն ակնկալում են, որ վարչապետ Փաշինյանը, ով զինվորի հայր է, կկատարի իր խոստումը։