Ձեր վստահելի աղբյուրը

«Չորրորդ իշխանությունն ամբողջությամբ վտանգված է»,- լրագրողների հետ զրույցում ասաց մեդիա փորձագետ Լիլիթ Թումանյանը՝ անդրադառնալով Նիկոլ Փաշինյանի հայտարարությանը, որ առնվազն երկու հեռուստաալիքի լոգոյի տեղը կարելի է գրել «կոռուպցիա»։

Վերջինիս խոսքով, իշխանության օրենսդիր և գործադիր մարմիններն ամբողջությամբ գտնվում են վարչապետ Նիկոլ Փաշինյանի կառավարության մենաշնորհի տակ, իսկ դատական իշխանությունը, բացառությամբ ՍԴ-ի,  յուրացված է։ 

«Բնական է, որ այս պրոցեսին պետք է հետևեր նաև չորրորդ իշխանության՝ մամուլի նկատմամբ ոտնձգությունների փուլը, որը սկսվել է դեռևս 2018 թվականից։ Հենց այդ ժամանակ սկսեցին ձևավորվել սև ցուցակներ՝ ցանկալի և անցանկալի մեդիաների, որոնց պետք էր բոյկոտել։ Դա սկիզբն էր, իսկ հիմա գործընթացը չի սահմանափակվում զուտ հայտարարություններով»,- նշում է Թումանյանը։

Մեդիա փորձագետը նշում է, որ անիմաստ է վերլուծել Նիկոլ Փաշինյանի այս կամ այն հայտարարությունը, քանի որ վերջինիս խոսքում չկա ոչ հետևողականություն, ոչ ռազմավարություն և ոչ էլ մասնագիտական ունակություն.«Նրա հայտարարությունները քաղաքագետները կարող են վերլուծել որպես պոպուլիզմի դրսևորման ևս մեկ քայլ»։

Թումանյանը նշում է, որ խնդիր կա ուշի ուշով հետևելու օրենսդրական փոփոխություններին, որովհետև մեդիան կառավարվելու է ոչ թե Նիկոլ Փաշինյանի պիտակավորումներով, այլ օրենսդրական միջոցներով։

«Այսօրվա դրությամբ այն ակնարկները, որոնք հնչում են, ակնհայտորեն հուշում են, որ մենք բախվելու ենք գրաքննության և խոսքի ազատության սահմանափակման։ Կարող ենք ասել, որ այն մտավախությունները, որ ունեն ներկայիս ղեկավարները այն է, որ գործիքակազմը, որով ներկայիս ղեկավարությունը եկել է իշխանության, այսօրվա դրությամբ կարող է պտտվել իրենց դեմ։ Այսպիսով փորձ է արվում ինչ-որ ձևով հարմարեցնել մեդիա դաշտը գործող իշխանության քիմքին»,- նշեց Թումանյանը։

Հարցին՝ արդյոք հնարավոր է վերահսկել տեղեկատվական հոսքը, Թումանյանը պատասխանեց՝ ոչ, հնարավոր չէ. «Դա հնարավոր չէ, քանի որ դրա համար հսկայական ռեսուրսներ են անհրաժեշտ, բացի այդ տեղեկատվությունը բացարձակ հոսքայնություն ունի։ Փակվող հոսքերն անմիջապես ստեղծում են նոր ուղղություններ»։

Անդրադառնալով «Հեռուստատեսության և ռադիոյի» մասին օրենքի վերամշակմանը՝ Թումանյանը նշեց, որ լսումների ժամանակ ասվել է՝ այնուամենայնիվ, բնակչության զգալի մասը հանդիսանում է հեռուստա-ռադիո արտադրության ահռելի սպառող։

«Հենց այդ պատճառով է խնդիր դրվում առաջին հերթին սահմանափակել հեռուստատեսության և ռադիոյի աշխատանքը։ Ըստ իս, տարօրինակ է ԱԺ-ում տեղի ունեցածը լսումներ անվանել, դրանք ասումներ էին, կամ ՝ լսցնումներ։ Մենք չենք տեսնում օրենսդրության փոփոխության պատվեր դաշտի ներկայացուցիչների կողմից»,- նշեց Թումանյանը։

Վերջինիս մտահոգել էր նաև հագամանքը, որ ԱԺ ամբիոնից հայտարարվել է՝ հանրային հեռարձակումից կարող են օգտվել այն կառույցները, որոնք համապատասխանում են անաչառությանը և բազմակարծությանը. «Սրանք չունեն սահմանում, ո՞վ է որոշում՝ որն է անաչառ, որը՝ ոչ։ Խնդրում եմ, պատասխանեք ինձ, «Հայակական ժամանակը» անաչա՞ռ է, անկողմնակա՞լ է աշխատում։ Այն մինչ օրս իր աշխատելաոճով տարվերվո՞ւմ է։ Նախկին իշխանություններից որևէ մեկը սահմանափակե՞լ է ՀԺ-ի գործունեությունը՝ կառավարության նիստում պիտակավորելով այն։ Չի եղել նման բան»։

Թումանյանը հավելեց նաև, որ Փաշինյանը փորձում է սահմանափակել քննական և քննադատական միտքը, որովհետև իրեն դուր չի գալիս իր կառավարության աշխատաոճի քննադատությունը։