Ձեր վստահելի աղբյուրը

«Թուրքի հետ հնարավոր չէ այս պայմաններում, և, ընդհանրապես, պատմությունը ցույց է տվել, որպեսզի խաղաղ գոյակցենք: Այն հայատյաց քաղաքականությունը, որ այսօր  տարվում է երկու թուրքական պետություններում,  դրա վառ վկայությունն է»,- Հայաստանի Հանրապետության և Արցախի Հանրապետության Ազգային ժողովների միջև համագործակցության միջխորհրդարանական հանձնաժողովի համատեղ հատուկ նիստի ժամանակ ասաց Արցախի ԱԺ ՀՅԴ խմբակցության անդամ Ալյոշա Գաբրիելյանը:

Նա նշեց, որ նման պայմաններում պահանջվում է միայն մեկ բան. «Լինել միասնական և այն տարածքները, որոնք ունենք,  պետք է մերը լինի: Խնդրում եմ, սա նաև պահանջ էլ կլինի, կներեք,  որ պահանջ եմ ասում, ես ծերունական իմ տարիքն եմ ապրում և իմ թոռներին եմ  պարտադրում՝  չմտածենք այն տարածքները հանձնելու մասին, որոնք այսօր մերն է, որովհետև այդ տարածքներում  արդեն գործընթաներ են գնում, այդ  տարածքներն արդեն մեր երակներն են, որ սնվում ենք, մտածենք այդ տարածքների վերաբնակեցման մասին, ծրագրեր մշակենք այդ տարածքների մասին»:

Ա. Գաբրիելյանի խոսքով, պետք է համախմբած լինել, այլապես չենք կարող ոսոխի դեմն առնել:

«Մենք պարտադրված ենք, պետք է ուժեղանանք: Փառք Աստծո  մեր տղաներին, որ լավ բանակ ունենք, ուժեղ բանակ ունենք, ոչինչ չպետք է չխնայենք  այդ բանակն ավելի մարտունակ դարձնելու համար»,- ասաց Ա. Գաբրիելյանը: