Ձեր վստահելի աղբյուրը

«Սուգը հավերժ է, եթե չկա պայքար, այդ իրողության դեմ միակ ճանապարհը մեր պայքարն է, մեր համախմբված գործունեությունը»,-Հայաստանի Հանրապետության և Արցախի Հանրապետության Ազգային ժողովների միջև համագործակցության միջխորհրդարանական հանձնաժողովի համատեղ հատուկ նիստի ժամանակ ասաց Արցախի խորհրդարանի պատգամավոր Նազիկ Մխիթարյանը:

Նա նշեց, որ հաճախ են հարցնում, թե ո՞րն էր Արցախյան պատերազմի և հաղթանակի ֆենոմենը. «Միշտ շեշտում եմ, որ Սումգայիթում և Բաքվում կատարված ջարդերը, որոնք մեր էթնոսի համար համարվեց որպես նպաստող գործոն, որպեսզի համախմբվենք, համախմբվեցինք և մեր ոգին հաղթանակեց: Իզուր չէ, որ ամեն անգամ ասում ենք, որ  Արցախյան գոյամարտում հաղթանակել է ոչ թե թնդանոթը, այլ մեր ոգին, որովհետև մեր ոգով պետք է ապացուցեինք, որ մենք այլևս ցեղասպանվող ազգ չենք»:

Ն.Մխիթարյանի խոսքով, ազգային արժեհամակարգում այդքան էլ հաճելի երևութ չէ, որ անընդհատ պետք է պահանջել, որ ցեղասպանություն է տեղի ունեցել, բայց իրողությունն այն է, որ Մեծ թուրանի գաղափարախոսությունը գործում է ու գործում է  մինչ այսօր:

«Հայաստանը, ողջ հայությունը չի կարող հաշտվել ցեղասպանական այս քաղաքականության հետ, որովհետև Հայաստանի տարածքից մեծ գոյություն ունի Դեր Զորի անապատը, որտեղ անթաղ դիակների ոգիները դեռևս սավառնում են երկնքում ու մեզանից՝ ապրողներիցս, պահանջում են հատուցում»,-ասաց Նազիկ Մխիթարյանը: