Ձեր վստահելի աղբյուրը

«Չպետք է հույս ունենալ, որ ժամանակը կարող է փոխել ցեղասպաններին»,- Հայաստանի Հանրապետության և Արցախի Հանրապետության Ազգային ժողովների միջև համագործակցության միջխորհրդարանական հանձնաժողովի համատեղ հատուկ նիստի ժամանակ ասաց ՀՀ ԱԺ «Իմ քայլը» խմբակցության անդամ Սասուն Միքայելյանը:

Նա նշեց, որ դա ևս մեկ անգամ ապացուցվել է 2016 թ. Ապրիլյան քառօրյա պատերազմի ժամանակ Թալիշում խաղաղ բնակիչների, զինվորների նկատմամբ ազերիների իրականացրած վայրագություններով:

«Իսկ քանի դեռ աշխարհը չի կարող կանխել ցեղասպանությունների  կրկնությունը, մեզ մնում է  ապավինել միայն սեփական ուժերին և միշտ  պատրաստ լինել  մեր նկատմամբ ցեղասպանության ցանկացած դրսևորման վճռական  հակահարված տալուն: Դրա միակ երաշխիքը մեր միասնականությունն է»,- ասաց Ս. Միքայելյանը:

Նա նշեց, որ տեսել է Մարտակերտի նահանջ, Մարաղայի կոտորածից մազապուրծ եղածներին, շատ դաժանություններ, դժվարություններ, դեպքեր, որոնք անհնար է մոռանալ:

«Երբ վիրավոր հիվանդանոցում էի, մի կնոջ  էին բերել Մարաղայից: Նրան ազերիները կապել էին մեքենայից, քարշ տվել,  մարմինը մաշվել էր, մնացել էր գրեթե ոսկորները: Մեր բժիշկների շնորհիվ այդ կինը ողջ մնաց:Նման անմարդկային վերաբերմունքի էին արժանանում ոչ միայն կենդանի մարդիկ, նաև մեր նահատակված ընկերները: Եղել են դեպքեր, երբ գերիների փոխանակություն էինք կազմակերպում մեր զոհերի դիակների հետ: Դիակներն այն աստիճանի հոշոտված էին լինում, որ ուղղակի  անհնար էր լինում տարբերակել»,- հիշեց Ս. Միքայելյանը:

Պատգամավորն ընդգծեց, որ այս ամենի մասին պետք է միջազգային  ատյաններն իմանան, քաղաքակիրթ մարդկությունը պետք է գնահատական տա կատարվածին, իր աջակցությունը հայտնի  ցեղասպանությունների և ահաբեկչության դեմ պայքարի ելած հայ ժողովրդին:

«Մեր կաշվի վրա ենք զգացել ցեղասպանության դաժանությունը, իրավունք ունենք աշխարհից պահանջելու ոչ միայն  դատապարտում, այլ նաև դեպքերի կրկնության իսպառ բացառմանն ուղղված գործուն քայլեր»,- ասաց Ս. Միքայելյանը: