Ձեր վստահելի աղբյուրը

««Մաքսային կարգավորման մասին» գործող օրենքը հանգեցնում է որոշակի խնդիրների»,- լրագրողների հետ հանդիպմանն ասաց ԱԺ «Իմ քայլը» խմբակցության պատգամավոր Սիսակ Գաբրիելյանը՝ անդրադառնալով Հայաստան վերադարձող քաղաքացիների իրերը մաքսատուրքից և հարկերից ազատելու մասին նախագծին։

Գաբրիելյանի խոսքով, գործող օրենքը սահմանում է որոշակի արտոնություններ ՀՀ մշտական բնակության վերադարձողների համար։ Սակայն դեռևս կան որոշակի խնդիրներ, ուստի առաջարկվում են նոր կարգավորումներ։

«Այս պահին գործող կարգավորման համաձայն՝ եթե մարդը 5 տարի բացակայել է ՀՀ-ից, նա ստանում է որոշակի արտոնություններ Հայաստան մշտական բնակության գալու ցանկության դեպքում։ Բայց էստեղ կա մի շատ կարևոր նրբություն՝ գործող կարգավորման համաձայն անձը փաստացի պետք  է նախ հաշվառված չլինի էստեղ և ԵԱՏՄ օրենսդրության համաձայն՝ էդ դեպքում միայն կհամարվեր, որ անձը մշտապես այստեղ չի բնակվում։ Եվ միայն այդ դեպքում նա կկարողանար վերադառնալ Հայաստան՝ մշտական բնակության»,- նշեց Գաբրիելյանը։

Պատգամավորը հստակեցրեց. այժմ առաջարկվում է  5 տարվա սահմանաչափը նվազեցնել՝ դարձնելով 3 տարի. «Բացի այդ, մեր շատ հայրենակիցներ, ովքեր տարիներ առաջ արտագաղթել են, շարունակում են մնալ ՀՀ քաղաքացիներ, ունեն իրենց սեփականությունը և գույքը։ Գործող իրավակարգավորումների համաձայն՝ այդ մարդիկ համարվում են ՀՀ-ում ապրող։ Հիմա մենք նշում ենք, որ, ըստ էության, եթե անձը 3 տարի անընդմեջ (յուրաքանչյուր տարվա ընթացքում 184 օր և ավելի)  չի բնակվել ՀՀ-ում, կհամարվի հաշվառումից դուրս եկած, և կօգտվի նշված արտոնություններից։ Խոսքը մարդու անձնական գույքի, ինչպես նաև իր անունով մեկ մեքենայի՝ առանց հարկի և մաքսատուրքի Հայաստան բերելու մասին է»։

Կարևոր է իմանալ, որ Հայաստան ներկրվող մեքենան պետք է երկրի մշտական բնակության վերադարձողի անունով գրանցված լինի՝ վերադառնալուց առնվազն 6 ամիս առաջ։ Այս պահանջը մտնում է ԵԱՏՄ օրենսդրության պահանջների մեջ։

Գաբրիելյանը նշեց՝ կա նաև մեկ այլ փոփոխություն, որը սահմանվում է նաև հաշվառում ունեցող քաղաքացիների համար. եթե քաղաքացիները 1 տարի բացակայել են երկրից և ցանկություն ունեն վերադառնալու, իրենց համար մինչև 5000 եվրո արտոնյալ սահմանաչափ կգործի, սակայն տրանսպորտային միջոցը առանց մաքսատուրքի ՀՀ  բերելու հնարավորություն չի լինի։

ՊԵԿ նախագահի տեղակալ Շուշանիկ Ներսիսյանը նշեց, որ արտոնությունից յուրաքանչյուր քաղաքացի կարող է օգտվել ընդամենը 1 անգամ.

«Այն, որ քաղաքացին ամբողջությամբ մաքսատուրքից ազատվում է, և մեկ տրանսպորտային միջոց կարող է իր հետ բերել Հայաստան, գործելու է մեկ անգամ։ Իսկ 5000 եվրոյի արտոնությունը գործելու է անկախ նրանից՝ եկողը ՀՀ քաղաքացի է, թե ոչ։ Եթե 1 տարի երկրից բացակայել ես, ապա վերադառնում ես Հայաստան, մինչև 5000 եվրո արժողությամբ ապրանք կարող է ներմուծել ՀՀ՝ առանց մաքսատուրքի։ Այս արտոնությունից քաղաքացիները 3 տարին մեկ կարող են օգտվել»։