Ձեր վստահելի աղբյուրը

Երևանի ընդհանուր իրավասության դատարանն այսօրվա նիստում մերժեց ԵԿՄ նախկին նախագահ, ԱԺ նախկին պատգամավոր Մանվել Գրրիգորյանի պաշտպանների միջնորդությունը՝ նրան տեղափոխել Ֆրանսիա իր հարազատների միջոցների հաշվին հետագա ստուգում, բուժում անցնելու համար:

Նախագահող դատավոր Մնացական Մարտիրոսյանն ասաց, որ Մ. Գրիգորյանի  նկատմամբ ընտրվել է ստորագրությունը երկրից չհեռանալու մասին խափանման միջոցը: Նրա խոսքով, ներկայացված միջնորդությունը վերաբերում է այդ խափանման միջոցի դեպքում որոշակի բացառություն անելուն, իսկ նման ընթացակարգ Քրեական դատավարության օրենսգիրքը սահմանում է: Մ. Մարտիրոսյանը նշեց, որ դատարանին  որևէ փաստարկ չի ներկայացվել այն մասին, որ Մանվել Գրիգորյանի բուժումը Հայաստանում անհնարին է, ծայրահեղ անհրաժեշտություն է կամ անհրաժեշտություն նրան տեղափոխել արտերկիր:

«Եթե նման պատշաճ փաստաթուղթ, բժշկական հետազոտություն ներկայացվեր դատարանին, որ անհնարին է, իհարկե, կքննարկեինք, հնարավորություն կտվեր տեղափոխել: Ներկա պահին  նման հիմնավորումներ չեն ներկայացվել: Հաշվի առնելով սա՝ դատարանը մերժում  է միջնորդությունը»,- հայտարարեց նախագահող դատավորը:

Նա նաև ասաց, որ Մանվել Գրիգորյանը շարունակվում է գտնվել «Նաիրի» ԲԿ-ի վերակենդանացման  և ինտենսիվ թերապայի բաժանմունքում: Նա հիշեցրեց, որ հունվարի 14-ին նրա առողջական վիճակը կտրուկ վատթարացել էր, սրտի ռիթմի խանգարում է եղել  նրա մոտ:

«Ներկա պահին սրտի ռիթմը վերականգնվել է, սակայն պահպանվում է հաճախասրտությունը, ռիթմի խանգարման վտանգը, որի հետ կապված շարունակում է մնալ վերակենդանացման բաժանմունքում»,-  նշեց Մնացական Մարտիրոսյանը: 

Հիշեցնենք, որ հունվարի 15-ին դատախազության նախաձեռնությամբ Երևան քաղաքի ընդհանուր իրավասության դատարանում  հրավիրվել էր արտահերթ դատական նիստ՝ քննարկելու Մանվել Գրիգորյանի առողջական վիճակի վատթարացման պատճառով նրա խափանման միջոցը փոփոխելու նպատակահարմարության հարցը: Դատարանը բավարարել է միջնորդությունը, Մանվել Գրիգորյանը ստորագրությամբ ազատ է արձակվել:

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։ Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել էր։ Պաշտպանները  մի քանի անգամ դիմել են խափանման միջոց կալանքը գրավով փոխելու միջնորդություններ այն հիմքով, որ նրա առողջական վիճակը վատ է, սակայն  դատարանը մերժվել է։