Մենք բազմակարծությունը հանդուրժում ենք. Արմեն Գրիգորյան
Անվտանգության խորհրդի քարտուղար Արմեն Գրիգորյանն այսօր կառավարության նիստից հետո լրագրողների հետ զրույցում անդրադարձավ իր՝ ավելի վաղ արած հայտարարություններից մեկին, թե երկրում հեղաշրջման փորձեր են արվել։
«Հարցազրույցի ընթացքում հարցն է այդպիսին եղել։ Ես խոսել եմ այն մասին, որ այսպես կոչված ընդդիմությունը և նախկին իշխանությունը պարբերաբար փորձել է տորպեդահարի, և նրանք օգտագործել են և գործիքներ, և մարդկանց։ Շատ մարդիկ տրվել են այդ գայթակղությանը, հետևել են այդ մտքերին, գաղափարներին և փորձել են քայլեր ձեռնարկել։ Դրա արդյունքում, կարող եմ ասել, որ որևէ հաջողություն չեն ունեցել», - ասաց Արմեն Գրիգորյանը։
Դիտարկմանը՝ ովքեր են եղել այդ մարդիկ, ԱԱԽ քարտուղարը նշեց, թե տարբեր մարդիկ՝ չնշելով անուններ։
Հարցին, թե արդյոք իրավական հետևանքներ ունենալու են դրանք, Արմեն Գրիգորյանը պատասխանեց, որ ինչ-որ մտքեր, գաղափարներ ունենալը դժվար է դատապարտել. «Գործողություններն էլ այնպիսին են, որ երբեմն դրանք մարդկանց նպատակների և երազանքների հետ հստակ կապելը դժվարություններ է առաջացնում։ Բայց կարող եմ ասել՝ դա կանխվել է և այժմ որևէ վտանգ չկա»։
Դիտարկմանը՝ կանխվելուց հետո դրանք ի՞նչ հետևանքներ են ունեցել, պաշտոնանկություններ եղե՞լ են, ԱԽ քարտուղարը պատասխանեց. «Եղել են նաև պաշտոնանկություներ։ Այս պահին քննություն է ընթանում, եթե քրեական գործի անհրաժեշտություն լինի, կլինի»։
Լրագրողները նաև հարցրեցին, որ վերջին շրջանում եղել է ոստիկանապետի, ԱԱԾ տնօրենի պաշտոնանկություն, կարո՞ղ են ենթադրել, որ նրանք կապված են այդ ամենի հետ կամ աչք են փակել տեղի ունեցածի վրա, Արմեն Գրիգորյանը նշեց, որ անունների մասին այս պահին որևէ հստակություն չի մտցնի։
«Բայց կարող եմ ասել, որ առաջացել են նման խնդիրներ և նաև ողջամիտ կասկածներ են առաջացել, որ այդպիսի նպատակներ կան և կանխվել են։ Դրա օգտագործման տարբեր ձևեր են եղել՝ սկսած ֆեյք ինֆորմացիայից մինչև տարբեր տեսակի միջոցներով մեր քաղաքական թիմին սևացնելը։ Ասել են, թե պետական համակարգն օրինակ չի աշխատելու, տնտեսությունը ձախողելու է, ամեն առավոտ հայտարարում էին, որ հողեր ենք հանձնում, նույնիսկ հասել էին այն մակարդակի, որ ասում էին՝ Հայաստան սպառազինություն չի մտնում»,-ընդգծեց Արմեն Գրիգորյանը՝ հավելելով, որ այս քայլերը տարբեր բնույթ են ունեցել։
Լրագրողները նաև հարցրեցին, թե իր՝ հեղաշրջման մասին հայտարարությունից հետո ԱԱԾ-ն լրատվամիջոցներից մեկի հարցին ի պատասխան հայտնել է, որ նման տեղեկատվություն չունեն, այդ դեպքում ո՞ւմ պետք է հավատա հասարակությունը՝ ԱԱԾ-ին, թե՝ իր հայտարարությանը, Արմեն Գրիգորյանն ասաց, թե ԱԱԾ-ի պատասխանը մի փոքր այլ է. «Ես այդ հայտարարության մեջ հերքում չեմ տեսել»:
Դիտարկմանը, թե նախկին իշխանությունների ժամանակ էլ են նման քննադատություններ հնչել, մասնավորապես, հողերի հանձնման մասին, Արմեն Գրիգորյանն ասաց. «Կարող եք նայել, եթե չեմ սխալվում՝ ռուսական լրատվամիջոցներին տված հարցազրույցները, կարող եք նայել իր հայտարարությունները, դրա մասին Սերժ Սարգսյանը հստակ խոսել է։ Երբ նրան դրա համար մեղադրել կամ քննադատել են, դրա համար հիմքեր են եղել։ Մեր կառավարությունն այդ մասով հրապարակային ասել է այն, ինչ կատարվում է»։
Անվտանգության խորհրդի քարտուղար Արմեն Գրիգորյանը անդրադառնալով Economist հանդեսի հրապարակած 2019 թվականի Դեմոկրատիայի ցուցիչին՝ ասաց, որ այս զեկույցով Հայաստանն առաջընթաց է գրանցել նաև բազմակարծության պատճառով։
«Դա նշանակում է, որ մենք բազմակարծությունը հանդուրժում ենք, հանդուրժում, նաև խրախուսում ենք։ Բազմակարծությունը խնդրում եմ չքննադատել»,-նշեց նա։
Դիտարկմանը, թե միթե վախի մթնոլորտ չեն ստեղծում, որ մարդիկ կաշկանդված լինեն քննդատություններ ներկայացնել, որոնք կարող են դիտարկել որպես անվտանգության սպառնալիք, Արմեն Գրիգորյանը պատասխանեց. «Երևի Հայաստանը միակ երկիրն է աշխարհում, որտեղ «37» թվի պայմաններում գրանցում է ժողովրդավարության առաջընթաց։ Այսօր նաև հրապարակվել է «Թրանսփարենսի ինթերնեշնլ»-ի կոռուպցիայի ինդեքսը, որտեղ գրանցել ենք շոշափելի առաջընթաց։ Այսպես կոչված, «37» թվի պայմաններում մենք գրանցում ենք խոսքի ազատության, բազմակարծության և ժողովրդավարության առաջընթաց»։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
