Ձեր վստահելի աղբյուրը

Չինաստանի հարևան երկրում՝ Ռուսաստանում կորոնավիրուսի  կասկածելի նշաններով Արման անունով 23-մյա երիտասարդին հոսպիտալացրել են։ Որոշ աղբյուրների համաձայն, նա հայ է, Ռուսաստանի քաղաքացի։ RBC-ն գրում է, որ տղան Սանկտ Պետերբուրգ է եկել Շանհայից։ Նրան օդանավակայանից հիվանդանոց են տեղափոխել շտապ օգնության ծառայության մեքենայով։ Առայժմ մասնագետները ոչ հերքել են, ոչ հաստատել նրա մոտ հիվանդության առկայությունը։



Ռոսպոտրեբնադզորը հայտարարել է՝ անցել են ուժեղացված հսկողության։ Հսկվում են ոչ միայն ռուս-չինական սահմանի անցակետերը:

Չինաստանի տարածքից դուրս վիրուսը հաստատվել է Թայվանի կղզում՝ մեկ դեպք, Հարավային Կորեայում՝ մեկ դեպք, Ճապոնիայում՝ մեկ դեպք, Թաիլանդում՝ երկու դեպք և  ԱՄՆ-ում՝ մեկ դեպք: Չինաստանում նոր տեսակի կորոնավիրուսով հիվանդացած մարդկանց թիվն անցել է արդեն 570-ից, զոհերի թիվը հասել է 17-ի։

Այս պահին Ռուսաստանում ու Հայաստանի հարևան երկրներում դեռ հաստատված դեպքեր չկան։ Բայց սա չպետք է թուլացնի համապատասխան մարմինների զգոնությունը՝ հաշվի առնելով նաև այն, որ Չինաստանի հետ առանց վիզայի ռեժիմի դեպքում զբոսաշրջիկների թվի աճ են ակնկալում։ Հայաստանի և Չինաստանի կառավարությունների միջև «Սովորական անձնագրով մարդկանց համար վիզային պահանջների փոխադարձ վերացման մասին» համաձայնագիրն ուժի մեջ է մտել  չորս օր առաջ՝ հունվարի 19-ին։ Նկատենք, որ 2019-ի հունվար-հոկտեմբերի ընթացքում Չինաստանից Հայաստան  է այցելել 14500 մարդ,  2018 թվականի նույն ժամանակահատվածի՝ 8400-ի փոխարեն։  

Panorama.am-ի հետ զրույցում  Առողջապահական և աշխատանքի տեսչական մարմնից հայտնեցին, որ սահմանային բժշկասանիտարական հսկիչ կետերը մշտական հսկողություն են իրականացնում Հայաստան ժամանողների նկատմամբ՝ օդային և ցամաքային սահմանը բոլոր հատողների հանդեպ իրականացնելով ավտոմատ ստացիոնար ջերմաչափում։

«Մշտապես հետևելով Առողջապահական համաշխարհային կազմակերպության իրազեկումներին՝ ավելի ուժեղացված վերահսկողություն է տարվում բոլոր այն երկրներից ժամանող ուղևորների նկատմամբ, որտեղ կա համաճարակային տեսանկյունից անբարենպաստ իրավիճակ»,-ասաց տեսչական մարմնի իրազեկման, խորհրդատվության և հանրության հետ տարվող աշխատանքների բաժնի պետ Լիանա Եղիազարյանը։

Նրա խոսքով, այժմ Չինաստանում ի հայտ եկած նոր վիրուսի՝ կորոնավիրուսի հնարավոր ներթափանցումը բացառելու նպատակով դիտարկվում են բոլոր այն տրանզիտ ուղիները, որոնցով հնարավոր է այդ երկրից ուղևորահոսք դեպի Հայաստան։

«Եթե ՀՀ եկողը համաճարակային տեսանկյունից անբարենպաստ երկրից է և ՀՀ քաղաքացի չէ, ապա նրա տվյալներով լրացվում են հասցեական քարտեր, որոնք տրամադրվում են համապատասխան պոլիկլինիկաներին՝ տվյալ երկրում գրանցված հիվանդության առավելագույն գաղտնի շրջանի չափով հսկողության տակ պահելու նկատառմամբ»,-մանրամասնում է նա։

Բարձր ջերմության առկայության դեպքում սահմանը հատող անձը ԱԱՏՄ կողմից նաև արտաքին զննման է ենթարկվում։ Եթե ջերմությունից բացի առկա են նաև վարակիչ հիվանդություններին բնորոշ կլինիկական այլ ախտանշաններ, ուղևորը մեկուսացվում է՝ անձակազմի և մյուս ուղևորների հետ շփումը սահմանափակելու նպատակով։ Վերցվում և արձանագրվում են նրա տվյալները՝ դրանք փոխանցելու տվյալ անձի գրանցման վայրի պոլիկլինիկա՝ հետագա վարումն իրականացնելու նպատակով։

Եթե արդեն սահմանին արձանագրվում են հիվանդության խիստ ակնհայտ  նշաններ, հիվանդը մեկուսացվում և շտապօգնության միջոցով տեղափոխվում է հիվանդանոց՝ ախտորոշման և անհրաժեշտության դեպքում բուժման նպատակով, քանի որ ԱԱՏՄ  սահմանային կետերի աշխատակիցներն ախտորոշում տալու իրավասություն չունեն․ նրանք միայն դիտարկում են վարակիչ հիվանդություններին բնորոշ կլինիկական ախտանշանների առկայությունը։ 

«Այս պահին նման ախտանշաններով մեկուսացվածներ չկան»,-ասաց Լ. Եղիազարյանը։

Հիշեցնենք, որ տոնական օրերին հայ-վրացական սահմանային անցակետերում հսկողության ընթացքում ավտոմատ ջերմաչափման արդյունքում պետական սահմանի անցման կետում գրանցվել էր վարակիչ հիվանդության կասկածով մի քանի անձանց մուտքը երկիր․ բոլորն էլ ժամանել են Վրաստանից։

Սահմանային բժշկասանիտարական հսկիչ կետերի համաճարակաբանները Բավրայի և Այրում- Ջիլիզայի սահմանային բժշկասանիտարական հսկման կետերում 5 անձի մոտ արձանագրել էին բարձր ջերմության առկայություն, որոնցից մեկի մոտ դա ուղեկցվել է նաև անհայտ ցանավորմամբ։ Ավելի ուշ մասնագետներից ստացած ախտորոշման համաձայն, նրանցից երկուսի մոտ եղել է ջրծաղիկ, կարմրուկ որևէ մեկի մոտ չի հաստատվել։

Նոր վիրուսի ի հայտ գալով ու ակտիվ տարածմամբ խիստ անհանգստացած է Առողջապահության համաշխարհային կազմակերպությունը։

«Կազմակերպությունը շարունակում է քննարկել Չինաստանում կորոնավիրուսի բռնկումն ու աշխարհում արտակարգ իրավիճակ հայտարարելու անհրաժեշտությունը»,-հրավիրած արտահերթ նիստում հայտարարել են ԱՀԿ ներկայացուցիչները։

ԱՀԿ գլխավոր տնօրենն ասել է՝ բարձր է գնահատում, որ Չինաստանի նախագահն ու պետական այլ մարմիններ համագործակցում են իրենց հետ, սակայն ԱՀԿ-ին հավելյալ տեղեկատվություն է պետք առաջ շարժվելու համար։ Այսօր ևս մի արտահերթ նիստ կհրավիրեն։

«Ես շատ լուրջ եմ վերաբերում հարցին, հայտարարե՞լ, թե՞ ոչ արտակարգ դրություն աշխարհի հանրային առողջապահության ոլորտում։ Այն միջազգային նշանակություն ունի։ Մենք պետք է հաշվի առնենք բոլոր հանգամանքները, մեր թիմը գտնվում է Չինաստանում, աշխատում է տեղացի փորձագետների, իշխանությունների հետ։ Մեկ օր անց ավելի շատ ինֆորմացիա կունենանք»,-ասել է նա։

ԱՀԿ փորձագետներն այսօր ևս արտահերթ նիստում կհանդիպեն։