Փաշինյանը՝ «Արմաթ»-ի մասին

Տնտեսություն 13:03 23/01/2020 Հայաստան

Վարչապետ Նիկոլ Փաշինյանն այսօր գործադիրի նիստում անդրադառնալով «Արմաթ» լաբորատորիաների շուրջ ծագած խնդրին՝ նշեց, որ այդ հարցը վերջին շրջանում բազմաթիվ, ընդհուպ քաղաքական շահարկումների տեղիք է տվել:

Վարչապետը նշեց, որ «Արմաթ» լաբորատորիաների ծրագիրը Հայաստանում սկսվել է 2014 թվականին, 2014-2017 թթ-ին «Արմաթ» լաբորատորիաներին պետական բյուջեից տրամադրվող ֆինանսավորումը կազմել է 188 մլն դրամ, իսկ 2018 և 2019 թթ-ին պետբյուջեից ֆինանսավորվել է 1 մլրդ 296 մլն դրամ:

Նիկոլ Փաշինյանի խոսքով՝ մինչև հեղափոխությունը, ՀՀ-ում բացվել է 220 ինժեներական լաբորատորիա, իսկ հեղափոխությունից հետո՝ 355 «Արմաթ» լաբորատորիա:

Այսինքն, ըստ վարչապետի, 1,5 տարում կրկնակիից ավելի են բացել, ֆինանսավորումն էլ ավելացրել են մոտ 10 անգամ։

«Եւ այսօր մեզ մեղադրում են, թե մենք «Արմաթ» լաբորատորիաների հետ կապված պրոբլեմ ենք առաջացնում: Իսկ ո՞րն է պրոբլեմը: Մենք այսօր հանրապետությունում ունենք 575 լաբորատորիա, որոնք ձեռք են բերվել մեկ կազմակերպությունից և մենք ասում ենք՝ մենք այս պահին պետք է մի պահ դադար վերցնենք, վերլուծենք, թե ինչպես է աշխատում այդ համակարգը, և պետք է խուսափենք մեկ անձից գնումներից: Այդ վերլուծությունների արդյունքում պետք է ձևակերպենք տեխնիկական առաջադրանք և սրանից հետո այդ լաբորատորիաներն իրականացնենք մրցութային կարգով: Այսինքն՝ ասենք, որ այս-այս դպրոցներում պատրաստվում ենք ստեղծել լաբորատորիաներ և հրավիրում ենք մրցույթի: Ով կտա բովանդակություն-գին լավագույն առաջարկը՝ այդ կազմակերպությունն էլ կհաղթի»,- նշեց Նիկոլ Փաշինյանը՝ հավելելով, որ մի դեպքում՝ մի կազմակերպություն կարող է հաղթել, մյուս դեպքում՝ մեկ այլ։

Նրա խոսքով՝ այս վիճակագրությունն ամեն ինչ ցույց է տալիս. «Էդ ովքե՞ր են, որ մեզ մեղադրում են, որ մենք «Արմաթ» լաբորատորիաների հետ կապված դպրոցների տեխնոլոգիական առաջընթացին խոչնդոտում ենք։ Այս թվերը իրենք թող հրապարակեն, որից հետո էժան շահարկումների դաշտ մտնեն»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: