Ձեր վստահելի աղբյուրը

Ֆեյսբուքյան օգտատեր Արշակ Սարգսյանը պնդում է, ՀՀ երկրորդ նախագահ Ռոբերտ Քոչարյանի հետ իր լուսանկարն են մոնտաժել ու տարածում, իբր Ռ. Քոչարյանի հետ նկարում եղել է երեկ «Էրեբունի պլազա» հյուրանոցում կրակոցներ արձակած անձը։

Նա որպես ապացույց երկու լուսանկար է հրապարակել՝ մոնտաժելուց առաջ ու հետո։

«Ֆոտոշոփի միջոցով ուզում են հանրության մոտ թյուր կարծիք ձևավորել իբր` այս ոչ էական մարդը Քոչարյանի աջակից է»,-գրել է նա։



Հիշեցնենք, որ երեկ ոստիկանությունում ահազանգ է ստացվել, որ «Էրեբունի պլազա» հյուրանոցում զինված անձ կա, որը կրակում է։ Անմիջապես դեպքի վայր են մեկնել ոստիկանության ղեկավար կազմն ու օպերատիվ խմբեր։

Ոստիկանության ղեկավար կազմը ոստիկանության պետի պաշտոնակատար Արման Սարգսյանի գլխավորությամբ բանակցություններ է վարել զինված տղամարդու հետ, ինչից հետո անձը հանձնել է հրազենը։

Տղամարդը ոստիկանության պետի պաշտոնակատարի ուղեկցությամբ, նրա ծառայողական մեքենայով, տեղափոխվել է ոստիկանություն։

Քննչական կոմիտեից էլ հայտնեցին, որ Էրեբունի պլազայում տեղի ունեցած միջադեպի առթիվ հարուցվել է քրեական գործ՝ ՀՀ քրեական օրենսգրքի 218-րդ հոդվածի 2 մասի 2-րդ 3-րդ և 7-րդ կետով, 235-րդ հոդվածի 1-ին մասի և 185-րդ հոդվածի 2-րդ մասի 1-ին կետի հատկանիշներով:
1987 թվականին ծնված տղամարդը ձերբակալվել է: ՀՀ ՔԿ նախագահ Հայկ Գրիգորյանի հանձնարարությամբ գործը քննվում է ՀՀ ՔԿ Երևան քաղաքի քննչական վարչության ծանր հանցագործությունների քննության բաժնում:

Հոդված 218.Պատանդ վերցնելը

2. Անձին պատանդ վերցնելը կամ պատանդ պահելը, որը կատարվել է`
2) կյանքի կամ առողջության համար վտանգավոր բռնություն գործադրելով,
3) զենք կամ որպես զենք օգտագործվող առարկաներ գործադրելով,
7) երկու կամ ավելի անձանց նկատմամբ
պատժվում է ազատազրկմամբ` վեցից տասը տարի ժամկետով:

Հոդված 235. Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը

1. Ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը`
պատժվում է կալանքով` առավելագույնը երեք ամիս ժամկետով, կամ ազատազրկմամբ` առավելագույնը երեք տարի ժամկետով։

Հոդված 185. Գույքը դիտավորությամբ ոչնչացնելը կամ վնասելը

2. Ուրիշի գույքը դիտավորությամբ ոչնչացնելը կամ վնասելը, որը`
1) կատարվել է հրկիզման, պայթյունի կամ հանրավտանգ այլ եղանակով պատժվում է ազատազրկմամբ` առավելագույնը չորս տարի ժամկետով: