Ձեր վստահելի աղբյուրը

2022թ.-ի հունվարի 1-ից Հայաստանում կարգելվի պոլիէթիլենային տոպրակների որոշ տեսակների օգտագործումը։ Այս մասին օրենքի նախագիծը նախօրեին հաստատեց կառավարությունը։

Շրջակա միջավայրի նախարարի տեղակալ Իրինա Ղափլանյանն այսօր ասաց, որ դեռևս 2018թ.-ի հուլիսից սկսվել էր պոլիէթիլային տոպրակների օգտագործման փուլային արգելում։  Հայաստանը ՀՀ-ԵՄ համաձայնագրով նաև պարտավորություն է վերցրել Հայաստանում ստեղծել շրջանակային տնտեսության սկզբունքները և հիմքերը՝ այն է, հնարավորինս նվազեցնել աղբի ծավալները, որ այսօր Հայաստանում կուտակվում է։

«2018թ.-ից ի վեր իրականացվում են իրազեկման աշխատանքներ պոլիէթիլային տոպրակների արտադրողների, սուպերմարկետների մեծ ցանցերի հետ, ռեստորանների հետ, հասարակական կազմակերպությունների հետ, որոնք ներգրավված են այս ոլորտի ծրագրերում»,-ասաց Իրինա Ղափլանյանը։

Օրենքի նախագծով նախատեսվում է նաև, որ արգելքը տարածվում է մինչև 50 միկրոն տոպրակների վրա, այսինքն հիմնականում այն տոպրակները, որոնց մեջ դրվում է ապրանքները՝ արդեն տուն տանելու համար։ Բացառություն է դրվել կշռափաթեթավորման պարկերի նկատմամբ, քանի որ, ինչպես ասաց փոխնախարարը, ոչ միայն ՀՀ-ում, այլ նաև ԵՄ երկրներում դեռևս չկա այլընտրանք ամենաբարակ պոլիէթիլենի համար։ Երկրորդ բացառությունը երկրորդային հումքից պատրաստված տոպրակներն են, որոնք որպես կանոն նախատեսված են աղբի համար։

Օրենքի մինչև ուժի մեջ մտնելը կիրականացվեն լայն իրազեկման աշխատանքներ հանրության  համար՝ մարդկանց մոտ ձևավորելու տոպրակների բազմակի օգտագործման մշակույթ, որը եղել է նախկինում։ Պոլիէթիլենային տոպրակների այլընտրանքը լինելու են թղթյա, կտորե տոպրակները։

Երեկ՝ նախագծի ընդունման օրը, քաղաքի բոլոր վարչական շրջաններում արդեն փակցվել են գովազդներ, նախատեսվում է նաև լայն արշավ սոցիալական ցանցերում, հանրային հեռուստատեսությամբ։ 

Իսկ թե որքան կթանկանան տոպրակները արգելքի մասին օրենքի արգելքի դեպքում, Շրջակա միջավայրի նախարարության բնապահպանական ռազմավարական ծրագրերի ու մոնիտորինգի վարչության պետ Լուսինե Ավետիսյանն այսօր մամուլի ասուլիսում ասաց, որ սպառողի համար  շատ մեծ տարբերություն չի լինի, քանի որ այսօր էլ պոլիէթիլային տոպրակները վաճառվում են 10-20 դրամով։

«Եթե հաշվենք, թե բազմակի օգտագործման տոպրակներն ինչքան կարող ենք օգտագործել, իրականում սպառողի համար մեծ բեռ չի լինելու։ Այստեղ ուղղակի մշակույթի ձևավորման խնդիր է»,-ասաց Լուսինե Ավետիսյանը։

Լուսինե Ավետիսյանը նշեց, որ տարեկան սպառողին տրվում է մոտ 4000 տոննա պոլիէթիլային տոպրակ, որը պլաստիկ արտադրողների մոտ կազմում է մոտ 30 տոկոսը։

Այսինքն, օրենքի գործողությամբ պոլիէթիլենի կրճատումը լինելու է 30 տոկոսով։ Այս թիվը հաշվարկվել է նրանով, որ մեկ տնային տնտեսությունն օրական վերցնում է 1-2 տոպրակ։