Պոլիէթիլենի արգելքին կհաջորդի դեպոզիտային համակարգի ներդրումը
2020թ.-ի հունվարի 1-ին Հայաստանում պոլիէթիլային տոպրակների արգելքին կհաջորդի այսպես կոչված դեպոզիտային համակարգի՝ վճարի վերադարձի ներդրումը, որի դեպքում պլաստիկ, ապակե և ալյումինե տարրաներից պատրաստված շշերը ենթակա են վերամշակման։ Այս մասին այսօր աասաց շրջակա միջավայրի նախարարի տեղակալ Իրինա Ղափլանյանը։
«Եվրամիության և մյուս զարգացած երկրներում բավական երկար ժամանակ արդեն գործում է նման համակարգ, երբ մանրածախ առևտրի կենտրոններում տեղադրված են սարքեր, որոնք ընդունում են դատարկ տարրան ու դրա դիմաց սպառողը ստանում է կտրոն՝ այդ սուպերմարկետում օգտագործելու համար»,-ասաց Իրինա Ղափլանյանը, հավելելով, որ հետազոտություն են արել՝ հասկանալու, թե ինչպիսի օրենսդրական կարգավորումներ պետք է պետությունն իրականացնի՝ նմանատիպ դեպոզիտային համակարգի ներդրման համար։
Հաջորդ փուլով արվելու են տնտեսական ուսումնասիրություն, այնուհետ արդեն կաշխատեն մասնավոր հատվածի հետ։
Ուսումնասիրություն է կատարվելու նաև պարզելու համար, թե ուրիշ որ պլաստիկ մեկանգամյա արտադրանքներն են աղտոտում շրջակա միջավայրը, այդ թվում նաև հողն ու ջուրը։
«Նման հետազոտություն արել է ԵՄ-ն, նաև ջրային ավազաններում։ Կազմվել է մի շարք ապրանքների ցանկը, որոնք ուղղակի արգելվել են, օրինակ մեկանգամյա օգտագործման ձողիկները, պլաստիկ սպասքը»,-ասաց փոխնախարարը, հավելելով, որ արգելվելու է այս ապրանքների և ներկրումը, և արտադրությունը։
Անդրադառնալով պոլիէթիլենի վտանգներին՝ նշվեց, որ գիտական հետազոտությունների արդյունքներով պարզվել է, քանի որ պոլիմերային արտադրանքը չի քայքայվում բնության մեջ հարյուրամյակների ընթացքում, այն մտնում է սննդային շղթա։ Որոշ հետազոտություններ ցույց են տվել, որ ծովամթերքում առկա է միկրոպլաստիկը։ Գերմանիայում կատարված հետազոտության ժամանակ պարզվել է, որ անգամ գարեջրի արտադրության մեջ առկա է միկրոպլաստիկը, ինչը շատ մեծ վտանգ է ներկայացնում, հաշվի առնելով, որ գարեջրի արտադրության մեջ բավական բարձր ֆիլտրացիոն համակարգեր են դրված։ Պլաստիկը, ըստ որոշ հետազոտությունների, կարող է ազդել էնդոկրին համակարգի վրա։
Հարակից հրապարակումներ`
Լրահոս
Տեսանյութեր
ՈՒՂԻՂ. Ազատ արձակել Բաքվում պահվող հայ գերիներին
