Ձեր վստահելի աղբյուրը

Վարչապետն այսօրվա ասուլիսում անդրադարձավ նաև «Բաց հասարակություն-հիմնադրամներ»-ի գրասենյակի գործունեությանը։

Պատասխանելով «Իրավունք» թերթի լրագրողի հարցին, թե ակնհայտ է, որ սորոսականներ կան վերին օղակներում՝ իհարկե հավատում են, որ վարչապետը սորոսական չէ, բայց տպավորություն է, որ նա կամ զգուշանում է նրանցից, նաև տեսակետ կա՝ «գերի է» նրանց ձեռքում, ապա ինչու վարչապետը չի զսպում նրանց ակտիվությունը, որը երբեմն ակնհայտ ապազգային է:

Վարչապետը պատասխանելով հարցին՝ նշեց.

«Սորոսական գրասենյակը գործում է Հայաստանում տասնյակ տարիներով, այդ թվում այն իշխանության ժամանակ, որի կարկառուն ներկայացուցիչ է եղել ձեր (խմբ. նկատի ունի «Իրավունք» թերթին)  թերթի հիմնադիրը: Եթե այդքան վատ բան էր, թող փակեին, ինչո՞ւ չեն փակել: Գրասենյակն իր գոյության ողջ ընթացքի 5 տոկոսն է  մեր իշխանության շրջանում, 95 տոկոսը՝ ձեր իշխանության։ Այսօր բոլոր նրանք, ովքեր այդ թեմայով շահարկումներ են անում, նախկին իշխանության մեջ կամ տեղ են ունեցել, կամ թիմի անդամ են ունեցել, կամ շրջապատից են: Ինչի՞ չեք փակել: Այսինքն՝ փաստորեն, դուք հիմա խոստովանում եք, որ պետական դավաճաններ եք, որովհետև թույլ եք տվել, որ 25 տարի Հայաստանում գոյություն ունենա քայքայիչ կազմակերպություն: Ուրեմն նախ սկսենք ձեզանից»։

Նրա խոսքով՝ բոլոր հանրապետականները, նախկինում պետական կառավարման համակարգում, ոստիկանությունում բարձրաստիճան պաշտոն զբաղեցրած մարդիկ պետք է բացատրություն տան, թե երբ իշխանական կերակրատաշտի մոտ էին, ինչո՞ւ չէին փակում այդ հիմնադրամները.

«Ի՞նչ է նշանակում սորոսական: Ես թույլ չեմ տա, որ ՀՀ որևէ քաղաքացու հասցեին այդպիսի բան՝ քամահրական ու արհամարհական ասեն, քանի որ բոլոր նրանք, որոնք դա ասում են՝  կոռումպացված հանրապետականներ են, նրանք պետական դավաճաններ են, ովքեր այդ դավաճանական կառույցին թույլ են տվել Հայաստանում գրանցվել, գործունեություն ծավալել: Եկեք հետաքննություն սկսենք, թե այդ մարդկանցից քանիսն են գրանտ ստացել այդ կազմակերպությունից, ինչքա՞ն են սնվել: Եկեք սկսենք ու բացենք այդ խոսակցությունը: Գնացեք, այդ հարցերի պատասխանը ձեր լրատվամիջոցի ղեկավարության քաղաքական շրջանակից պահանջեք: Եթե ձեր ասածը ճիշտ է, ուրեմն դուք ձեր իշխանության ընթացքում գործել եք ընդդեմ ՀՀ-ի ու ժողովրդի, և ձեզ է պետք պատասխանատվության ենթարկել, առաջին հերթին՝ բարոյական»։