Ձեր վստահելի աղբյուրը

«Իրավական խնդիրներ կարող է ունենալ, որովհետև, ենթադրում եմ, «Լիդիանն» արբիտրաժ կդիմի»,- այսօրվա ասուլիսում ասաց վարչապետ Նիկոլ Փաշինյանը՝ պատասխանելով հարցին, թե երբ կոչ արեց բացել Ամուլսարի ճանապարհը, մարդիկ չհետևեցին իր կոչին, ավելին, «Լիդիան» ընկերությունն այսօր չի կարողանում մուտք գործել այդ տարածք, և արդյոք սա կարող է մեր երկրի համար իրավական խնդիրներ առաջացնել։

«Ես այսօր էլ կոչ եմ անում բացել ճանապարհը և համարում եմ մեր սիրելի հայրենակիցների գործողությունները ոչ տրամաբանական, քանի որ իրենց պատճառով է, որ հարցը մտել է փակուղի և դուրս չի գալիս։ Այդ հարցը որևէ սցենարով չի լուծվելու, քանի դեռ ճանապարհը փակված է։ Չի լուծվելու դա: Այսինքն՝ նույն ստատուս քվոյի վրա մնալու է, ինչ 2018 թ-ին էր՝  ոչ այս, ոչ այն կողմ»,- նշեց վարչապետը:

Նրա խոսքով՝ ինքը շահագրգռվածություն ունի, որ Ամուլսարի հանքը շահագործվի. «Եվ այո, և ո՛չ: Ես շահագրգռվածություն ունեմ, որ Ամուլսարի հանքը շահագործվի, քանի որ դա կապված է Հայաստանի անվտանգային միջավայրի հետ: Օրինակ, եթե Ամուլսարը շահագործվեր՝ այս տարի մենք կունենայինք ոչ թե 7,5 և ավելի, այլ շատ ավելի մեծ տնտեսական աճ, հազարավոր աշխատատեղեր: Բայց, մյուս կողմից, ես ոչ մի պարագայում չեմ համաձայնվի, որ Ամուլսարի հանքը շահագործվի ի վնաս Հայաստանի, Ջերմուկի և հարակից գյուղերի բնակիչների առողջության և երկրի բնապահպանությանն անվերականգնելի վնասներ հասցնելու հաշվին»։

Ըստ վարչապետի՝ քանի դեռ հանք տանող ճանապարհը փակ է, չեն կարողանում գալ եզրակացության։

«Հիմա դա անդառնալի վնասներ պարունակո՞ղ է, թե՞ ոչ։ Ես համարում եմ այդ գործողությունները չտրամաբանված, անհարգալից, որոնք չեն բխում Հայաստանի շահերից»,- հավելեց նա։