Ձեր վստահելի աղբյուրը

Քաղաքագետ Հրանտ Մելիք-Շահնազարյանը չի բացառում, որ հաճախ են հավաքվելու ոստիկանության շենքի մոտ, քանի որ առանց որևէ լուրջ պատճառաբանության բերման են ենթարկվում մարդիկ, որոնք ակնհայտ ընդդիմադիր կարծիք ունեն:

«Գործողություն է  իրականացվում, չեմ բացառում, որ դրա շարունակության արդյունքում հաճախ գանք այստեղ՝ մեկ դրսից, մեկ ներսից, որևէ բան արդեն չի կարելի բացառել»,- լրագրողների հետ զրույցում ասաց նա:

Հարցին, թե ինչպե՞ս եք գնահատում ոստիկանության գործողությունները «Ադեկվադ» միաբանության անդամներին, նաև  ՎԵՏՕ նախաձեռնության ղեկավար, հասարակական-քաղաքական գործիչ Նարեկ Մալյանին բերման ենթարկելու հետ կապված, նա ասաց. «Նորություններ շատ քիչ են ստացվում, որովհետև, ցավոք սրտի, ուժայինների ներկայացուցիչները, ըստ էության, որևէ տեղեկություն չեն էլ հաղորդում, ընդամենը կարճ հաղորդագրություն է եղել Նարեկ Մալյանի հետ կապված, մնացածի առումներով լռություն է: Կարծում եմ՝ այդ լռությունը պայմանավորված է իրենց գործողությունների  ապօրինի լինելու գիտակցմամբ:

Եթե նախկինում ուժայինները անգամ հեղափոխությունից հետո ինչ որ գործողություններ անելուց մշտապես հայտարարում էին, թե որն է այդ գործողությունների պատճառը, հիմա  լռում են՝ գիտակցելով, որ ապօրինություն է տեղի ունենում, ծառայում են մեկ մարդու կամքի, ըստ էության, ասելու շատ բան չունեն»:

Նրա խոսքով, ոստիկանության մոտ հավաքվածները փաստաբանների, ընթերականների միջոցով  իմացել են, որ տղաներին այնտեղ խուզարկում են:

«Քիչ առաջ շտապօգնության  մեքենա է մոտեցել այստեղ: Ըստ լուրերի, բերման ենթարկելու ժամանակ վնասվածք է ստացել «Ադեկվատ» կուսակցության նախագահ Արթուր Դանիելյանը»,- ասաց Մելիք-Շահնազարյանը:

Նրա խոսքով,  Կապանում տեղի ունեցած ասուլիս ժամանակ Փաշինյանը ջղայնության պահին սպառնացել էր, որ «առաջինը ձեզանից ենք սկսելու, մարդկանց, ովքեր սորոսական ցանցն են բացահայտում Հայաստանում, խոսում են նրանց հասցրած վնասների մասին», տպավորությունն այն է, որ այդ հրահանգն են իրականացնում իրավապահները:

«Ցավալին այն չէ, որ տղաներին բերում են ապօրինություների միջոցով, այլ այն, որ երկրի կարևորագույն ինստիտուտները, ամբողջ իրավապահ համակարգը դառնում է մթագնած որոշումների զոհը, ծառայեցվում են նման որոշումներ ի կատար ածելու համար»,- ասաց Հ. Մելիք Շահնազարյանը:

Նրա խոսքով, այս գործողությունները նախապատրաստված էին, նաև ակնհայտ են Փաշինյանի հայտարարություններից, իշխանական քաղաքական գործիչների գնահատականներից, որ այլ ձերբակալություններն էլ նախապատրաստվում:

Հարցին՝ կարծիքներ են  հնչում, որ «գրիչի» պատմությունից հետո Նիկոլ Փաշինայնը փորձում է շեղել քաղաքացիների ուշադրությունը, քաղաքագետը պատասխանեց. «Վստահ եմ, որ գրիչի թեման շատ լուրջ անհանգստություն է Նիկոլ Փաշինյանի և իր ողջ քաղաքական թիմի համար: Երեկ ականատեսն էինք լինում, թե ինչպես են իրենք  խայտառակում իրենց իսկ թիմակիցներին այդ գրիչի թեման ինչ-որ մի կերպ փաթաթելով հանրությանը քիչ թե շատ  տրամաբանական լույսի ներքո ներկայացնելու իրենց ցանկության մեջ: Վստահ եմ, որ Փաշինյանն ամեն ինչ անելու է, որպեսզի այդ խայտառակությունը, որի հետևանքով ինքը դարձել է  համազգային ծաղրի առարկա, ինչ-որ կերպ մոռացվի, այլ թեմաներով  փակվի,  օրակարգի երկրորդ պլան մղվի, ինչն իրեն չի հաջողվելու, քանի որ այդ մի գրիչը դարձավ իր քաղաքական կարիերայի ավարտի սկզբը: Վստահեցնում եմ՝ երկու օր առաջ ինքը հասավ դրան, որ  հենց այդ գրիչի պատճառով սկսեց իր անկումը որպես բարոյական քաղաքական գործիչ արդեն իսկ չկա, մնացածն էլ, կարծում եմ, շատ կարճ ժամանակի հարց է արդեն»: