Ձեր վստահելի աղբյուրը

Ոստիկանության 6-րդ վարչությունում գտնվող  «Ադեկվատ» կուսակցության նախագահ Արթուր Դանիելյանը և ևս երկու հոգի՝  Ազատ Ադամյանն ու  Գրիգոր Մինասյանը ազատ արձակվեցին:  Արթուր Դանիելյանը լրագրողների հետ զրույցում ասաց, որ իրեն կասկածում էին թմրամիջոց ձեռք բերելու կամ պահելու մեջ:

«Ոստիկանները ենթադրում էին, որ ես թմրամիջոց եմ ձեռք բերել և գնում եմ ոստիկանություն: Սա իհարկե հերթական թատրոնն է, մեր պետության գլխավոր կլոունի կատարմամբ: Ես կարծում եմ բոլոր պրոցեսները որ տեղի էին ունենում և կունենան կապված են Արցախի հանրապետության շուրջ ձևավորված մթնոլորտի հետ: Խոսքը գնում է, այսպես ասած, չբանակցությունների մասին, որը տեղի է ունենում Ադրբեջանի կոլեգաների հետ: Ստացվում է ինչ-որ բան է պարտադրվում, ու նրանք փորձում են կոծկել, սղացնել: Բնակվելով կես տարի Արցախում, նկատել եմ, որ արդեն այնտեղ ինչ-որ գործողություններ մեկնարկել են: Ըստ էության Արցախի երիտասարդներին խաղաղության են պատրաստում, ինչը պարտվողականության նշան է»,-ասաց Դանիելյանը:

Խոսելով ստացած վնասվածքներից, Դանիելյանը նշեց. «Բիրտ ուժի կիրառումը հետևանք է նրա, որ քաղաքական իմպոտենտ հանդիսացող Նիկոլ Փաշինյանն ուզում է բոլորին սպառնալ  բռնաբարությամբ: Սա է խնդիրը: Իրենց թվում է, թե ֆիզիկական ուժ դրսևորելով  կարող են լռեցնել կամ էլ սեփական իմպոտենտությունը կոծկել»:

«Ձախ ձեռքիս և ոտքիս մեջ թմրածություն զգում եմ: Հիմա գնալու եմ հետազոտության: Շտապօգնությունը եկավ, առաջարկեց ցավազրկող,  բայց ես թույլ չտվեցի ներարկում անել, կասկածում էի,  որ ստիպողական կարող են ենթարկել փորձաքննության: Չեմ ընդունել որևէ դեղամիջոց»,- ընդգծեց «Ադեկվատ» միաբանության համահիմնադիրը:

Ավելի վաղ տեղեկացրել էինք, որ բերման են  ենթարկվել հինգ  անձ, որից չորսը «Ադեկվատ» միաբանության անդամներ են և  հասարակական-քաղաքական գործիչ Նարեկ Մալյանը: Կոնստանտին Տեր- Նակալյանին և Նարեկ Մալյանին ազատ են արձակել: Նրանց բերման էին ենթարկել  ապօրինի զենք-զինամթերք պահելու կամ կրելու կասկածանքով: