Ձեր վստահելի աղբյուրը

«Որոշակի տեղեկություններ լրացվեցին և՛ ռազմաքաղաքական, և՛ օպերատիվ, և թե՛ մարտավարական օղակներում»,- խորհրդարանում լրագրողների հետ զրույցում ասաց ՀՀ պաշտպանության նախկին նախարար Սեյրան Օհանյանը։

Վերջինիս խոսքով,  ապրիլյան քառօրյա պատերազմի հանգամանքները քննող հանձնաժողովի աշխատանքի զգալի մասը պետք է փոխանցվի ՊՆ-ին, և հանձնաժողոը պետք է համապատասխան աշխատանք կատարի։

Օհանյանը վստահությունուն հայտնեց, որ 2016 թվականից մինչև այսօր ՊՆ-ն բավականին աշխատանքներ տարել է։

Նա նշեց, որ իր եզրահանգումները՝ կապված քառօրյա պատերազմի հետ, չեն փոխվել. բանակն իր առջև դրված խնդիրները կատարել է։

«Դեռ ավելին, մեր բանակի հրամանատարական կազմի, սպաների, ենթակաների շնորհիվ մենք կարողացել ենք հասնել նրան, որ ՀՀ-ի պաշտպանության նախարարության գործողությունները Արցախի բանակի հրամանատարության հետ համագործակցության արդյունքում կարողացել են մարտական գործողությունները կանգնեցնել»,- նշեց Օհանյանը։

Ռազմաքաղաքական հարթությունում, Օհանյանի խոսքով, ՊՆ-ի եզրահանգումները բերել են նրան, որ ՀՀ-ի և ԱՀ-ի զինված ուժերը՝ բոլոր օղակներով, ի վիճակի են խաղաղ պայմաններից պատերազմական ժամանակահատվածի անցնելու, որովհետև այդ ամենը տարիների ընթացքում փորձարկվել է։

Բացի այդ, զինված ուժերի զարգացումը, որ իրականացվել է մի քանի փաստաթղթերով, նաև առաջին գծում եղած դասավորությունը՝ անհրաժեշտ ինժեներական սարքավորումներով, տալիս էր հնարավորություն՝ Ադրբեջանի կողմից նմանատիպ հարձակումների ժամանակ մարտական գործողություններ վարելու՝ ելնելով իրադրությունից։

«Հրամանատարական կազմը, ենթակաները, նրանց բարոյահոգեբանական մակարդակը, զինված ուժերի պատրաստության համար ուսումնանյութական բազան ապահովել են ոչ միայն մարտավարական, այլ նաև ուրիշ օղակներում գործողություններ վարելը։ Դա երևացել է զորամասերի հրամանատարական կազմի և զինվորների քաջագործություններով։ Դա մեկ օրում չի լինում։ Եթե 2016 թվականին անձնուրաց կռվել է Արցախի ՊԲ-ն, ապա դա տասնյակ տարիների ընթացքում ուսուցման և դաստիարակության ավանդույթների հիման վրա է ձևավորվել»,- նշեց Օհանյանը։

Պաշտպանության նախկին նախարարը նշեց, որ քառօրյայի ընթացքում եղել են նաև բացթողումներ, սակայն ճակատագրական սխալներ չեն եղել։ Նրա խոսքով, չկա աշխատող մարդ, ով սխալներ թույլ չի տալիս. «Սխալ ունենալը, և այն վերացնելը մեծ թերություն չէ։ Սխալ ունենալը, բայց չվերացնելը, նման է ռազմի դաշտում զորքը անտեր թողնելուն»։

Օհանյանը նշեց, որ բացթողումների համար Արցախի Հանրապետության ղեկավարությունը որոշումներ ընդունել են և համապատասխան կարգապահական գործառույթներ են իրականացրել՝ տույժեր, պաշտոններից ազատումներ։

Օհանյանը շեշտեց, որ զինված ուժերի հրամանատարական կազմն իր անելիքներն իմացել ու պարտակաություններն իրականացրել է. «Նյութատեխնիկական ապահովման շրջանակում՝ տեխնիկական ապահովում, նյութական ապահովում, վառելիքաքսուքային նյութեր, որևէ խնդիր չի եղել։ Ուզում եմ հավաստիացնել, եթե ավելի ցածր մարտավարական օղակներում որոշակի բացթողումներ եղել են, դա էլ գալիս է պատերազմի բարդություններից, առանձնահատկություններից և դաժանությունից»։

Ով ինչ պաշտոնի էլ լինի, Օհանյանը վստահեցնում է, որ մարշալ էլ լինի, գնահատական կարող է տրվել կապիտանի, զինվորի, սերժանտի տեսանկյունից, ով առաջին գծում մարտական գործողություններ է վարել՝ գտնվելով հակառակորդի և՛ հոգեբանական, և՛ կրակային ճնշման տակ։

Պաշտպանության նախկին նախարարը նշեց, որ ինքն իր ունեցած ինֆորմացիան տվել է հանձնաժողովին, և այժմ պետք է թույլ տալ, որպեսզի վերջինս աշխատի։

«Մենք հասկանում ենք, թե ինչ տեղեկությունների, կառույցի գործողությունների մասին է խոսքը։ Ռազմական այդ կառույցը իր գործունեությունը ծավալում է գաղտնիության սկզբունքների շրջանակում։ Իմ համար անհասկանալի է, երբ մենք ուզում ենք ինչ-որ գաղտնիություն բացել և դա որոշ մարդիկ կարող են շահարկում դարձնել»,- նշեց Օհանյանը։

Դիտարկմանը, որ Օհանյանը նախկինում բացասաբար է արձագանքել քննիչ հանձնաժողովի ձևավորմանը, նա պատասխանեց, որ ինքը հանձնաժողով չէր կազմի, կամ հանձնաժողովին պաշտպանության մասին առանձին հանձնարարություն կլիներ, որպեսզի իրենք առանձին աշխատեն ՊՆ ղեկավարության հետ։

«Բայց քանի որ մեր պետական կառույցում՝ ԱԺ-ում, ստեղծվել է հանձնաժողովը, այն պետք է իր աշխատանքն ավարտի, և ես էլ իմ կողմից աջակցում եմ»,-ասաց նա։

Ինչ վերաբերում է վարչապետ Նիկոլ Փաշինյանի հայտարարությանը, որ քառօրյա պատերազմը ՌԴ-ի գիտությամբ է տեղի ունեցել, Օհանյանը նշեց, որ վարչապետից էլ պետք է ճշտել. «Եթե խոսում եք դավադրության տեսաբանությունից, այստեղ չի կարող լինել այլ դավադրություն, քան թուրք-ադրբեջանական դավադրությունն է։ Վերջակետ դրեք սրանով»։

Վարչապետի մեկ այլ հայտարարության մասին, թե՝ Սերժ Սարգսյանը բանակցել է տարածքներ հանձնելու շուրջ, Օհանյանը պատասխանեց, որ ինքը առաջ էլ է ասել՝ եթե Արցախի հետ մի բան պատահի, յուրաքանչյուր թիզ հողի համար պետք է պայքարել։

«Այսօր այդ զիջումների խնդիրը բանակցության առարկա չէ։ Եթե խոսքը այդ փաստաթղթերի մասին է, ապա այդ փաստաթղթերը միայն ու միայն եղել են ինչ-որ փաստաթղթի շուրջ բանակցելու համար։ Իսկ տարածքների հանձնման վերաբերյալ իմ հետ երբևէ որևէ մեկը որևէ խոսակցություն չի ունեցել»,- նշեց Օհանյանը։

Անդրադառնալով ԱԺ նախագահի հետ հանդիպմանը՝ Օհանյանը նշեց, որ ոչ մի քաղաքական հարց չի քննարկվել . «Ես երկար տարիներ այցելել եմ ԱԺ, և չի եղել այցելություն, որ ես ԱԺ նախագահի մոտ չլինեմ։ Պաշտոնատար անձ եմ եղել և որպես բարեկրթության նորմ խնդրեցի և այցելեցի նաև ԱԺ նախագահին։ Մենք խոսեցինք այսօրվա իրադրության մասին»։