Ձեր վստահելի աղբյուրը

Արցախցի քաղաքագետ  Ալեքսանդր Քանանյանը շարունակում է իր հացադուլը: Նա այդպես փորձում է ուշադրության հրավիրել Քարվաճառում  ՀԷԿ-աշինության  հետևանքով առաջացող խնդիրների վրա, մասնավորապես Թարթառ  գետի վերին հոսանքում ընթացող ՀԷԿ-աշինության վրա:  Հացադուլը նա սկսել է հունվարի 20-ին:

«Նախորդ օրերին անընդհատ հանդիպումների մեջ էի Ստեփանակերտում, Քաշաթաղում, Քարվաճառի շրջանի գյուղերում: Անընդհատ շփումներն ու այցելություններն ինձ որոշակիորեն ավելի շուտ հոգնեցրեցին, ուժերս պակասել էին: Երեկվանից հիմնականում պառկած եմ, այսօր ինձ ավելի առույգ եմ զգում: Ներկա պահին տանն եմ»,- Panorama.am-ի հետ զրույցում ասաց Ա. Քանանյանը: 

Նա ընդգծեց, որ շարունակելու է հացադուլը մինչև Արցախի քաղաքական ղեկավարության կողմից իր առաջադրած քաղաքական ուղերձի լիակատար ըմբռնումն ու ընդունումը, իսկ եթե դա ուշանա, պատրաստ է ավելի լուրջ քայլերի դիմել, հանդես գալ համընդհանուր դիմադրության կոչով:

«Այս ոլորտը բացարձականորեն անվերահսկելի վիճակում է գտնվում տարիներ շարունակ, իմ հացադուլի միջոցով խնդրի վրա հրավիրվել է պատշաճ արտաքին ու ներքին ուշադրություն: Նրանք, գիտակցելով խնդրի լրջությունը, որպես առաջին քայլ կատարել են իմ առաջին պայմանը ու  դադարեցրել են շինարարությունը»,- նշեց Ա. Քանանյանը:

Նա համոզված է, որ փոքր ՀԷԿ-երի շինարարությունն անդառնալի վնաս է հասցնում ոչ միայն բնապահպանական համակարգին, ինքնին փակում է տարածքի  համապարփակ զարգացման, վերաբնակեցման, նոր գյուղական բնակավայերի կայացաման, շրջանի համալիր զարգացման հեռանկարը: Ա. Քանանյանն ասաց, որ հրաժարվել է հանդիպել Արցախի Հանրապետության նախագահ Բակո Սահակյանի հետ, խնդիրը քննարկել է պետնախարար Գրիգորի Մարտիրոսյանի հետ:

«Բանակցություններն առհասարակ փոխադարձ հարգանքի ու կառուցողականության ձգտման միջավայրում են ընթացել, սակայն քանի որ Արցախի քաղաքական ղեկավարությունը դեռ չի գիտակցել իմ քաղաքական ուղերձն ընդունելու անխուսափելիությունը, պետնախարարը պատրաստ չէր համաձայնվելու իմ մի շարք առաջադրած պայմաններին, այդ թվում՝ որ հանձնաժողովը պետք է լինի համապարփակ, ուսումնասիրի բոլոր ՀԷԿ-երի առանձին-առանձին ու համալիր կարգով ազդեցությունը բնապահպանական ոլորտի վրա, հատկապես խնդիր կա ֆինանսավարկային բաղադրիչը ստուգելու ու հրապարակելու առումով: Դրա համար նպատակահարմար չգտա երկրորդ անգամ հանդիպել պետնախարարի հետ, վերադարձա Քարվաճառ»,- ասաց հացադուլ հայտարարած քաղաքագետը:

Նրա խոսքով,  կառավարությունը  խորհրդակցություն էր հրավիրել, որոշել էր ստեղծել հանձնաժողով:

«Բայց քանի որ այդ հանձնաժողովն ուղղակի իրավիճակը շեղելու, որևէ վստահություն չունեցող նախաձեռնություն է, կոչ եմ անելու հայաստանյան մասնագետներին բոյկոտել այդ հանձնաժողովի աշխատանքը մինչև տեղի չունենա իմ քաղաքական ուղերձի անվերապահ  ընդունումը՝ տեխնիկան պետք է առհասարակ բոլոր շինհրապարակներից հեռացվի, Արցախի քրեական օլիգարխիան պետք է գիտակցի, որ նոր ՀԷԿ-եր չեն կառուցվի, իսկ կառուցող ՀԷԿ-երը պետք է  ապամոնտաժվեն, դրանից հետո կպայմանավորվենք հանձնաժողովի կազմման սկզբունքների, եղանակների վերաբերյալ»,- ասաց Ա. Քանանյանը:

Նա հայտնեց, որ երկուշաբթի օրվանից նույն պահանջով հացադուլ է հայտարարել նաև Ստեփանակերտի քաղաքացի Մհեր Պողոսյանը, թեև փորձել է տարհամոզել նրան: Եվս երկու հոգի ցանկացել են հացադուլ հայտարարել, սակայն Քանանյանը կարողացել է նրանց  համոզել չդիմել այդ քայլին: Խնդրի վրա ուշադրության հրավիրելու համար Քարվաճառի դպրոցի աշակերտները ցանկացել են դասադուլ անել:

«Փորձեցի դպրոցահասակ անչափահասներին հեռու պահել քաղաքականամերձ գործընթացներից, համոզեցի չդիմել այլ քայլին: Սակայն տեսնելով, որ պետնախարարի հետ իմ հանդիպումը բովանդակապես տապալվել է, այսօր պետք է սկսեին դասադուլ: Երեխաների, ուսուցիչների վրա ճնշման փորձեր են եղել կրթության պատասխանատուների, վարչակազմի կողմից, բայց նրանք դիմադրել են:  Այսօր զգալով, որ իրավիճակը վերահսկողությունից դուրս է գալիս, շրջան է ժամանել Բակո Սահակյանը, վարչակազմի փակ նիստ է լինելու»,- ասաց նա: 

Խնդրի մասին հայտարարություն է տարածել ու զորակցություն հայտնել Ալեքսանդր Քանանյանին Հայկական բնապահպանական ճակատը: