Ձեր վստահելի աղբյուրը

ՎԵՏՕ նախաձեռնության հիմնադիր Նարեկ Մալյանը երբեք չի դիմել Բաց հասարակության հիմնադրամներին։

«Ձեր ասած Նարեկ Մալյանը երբեք հիմնադրամ չի դիմել, երբեք մեզանից աջակցություն չի ստացել»,-լրագրողների հետ հանդիպմանը հայտարարեց Բաց հասարակության հիմնադրամներ Հայաստանի գործադիր տնօրեն Լարիսա Մինասյանը։

Հիշեցնենք, որ սորոսականների դեմ պայքար հայտարարած Նարեկ Մալյանը երեկ բերման էր ենթարկվել Ոստիկանության վեցերորդ վարչություն ապօրինի զենք պահելու կասկածանքով, ապա ազատ էր արձակվել։ Նրանից բացի ոստիկանության նույն վարչություն էին բերման ենթարկվել «Ադեկվադ» միաբանության չորս անդամներ, ինչպես նաև Anitfake.am-ի հիմնադիր Նարեկ Սամսոնյանը։

Ոստիկանությունից դուրս գալուց հետ Մալյանը հայտարարեց. «Տեղեկություններ ունեմ, որ «Բաց հասարակության հիմնադրամներ-Հայաստան»-ի գործադիր տնօրեն Լարիսա Մինասյանը երեկ բավական կոշտ խոսակցություն է ունեցել վարչապետի հետ, հրամայական եղանակով վարչապետի «վզին դնելուց հետո» էլ արագ տեղի ունեցան այս դեպքերը: Նա պահանջել է, որ նույնիսկ ապօրինություններով, տարբեր մեթոդներով կանխեն «ՎԵՏՕ» հասարակական-քաղաքական շարժման գործունեությունը Հայաստանում»։

Ի դեպ, Մինասյանը, ի պատասխան հարցի, թե մարդու իրավունքների տեսակետից ինչքանո՞վ էին իրավաչափ ոստիկանության գործողությունները,  արդյո՞ք դրանք ընդդիմությանը վախեցնելու նպատակ չունեին, նշեց. «Չեմ կարծում, որ այդ գործողություններն ուղղված էին ընդդիմությանը։
Չեմ գտնում, որ դա ընդդիմություն էր։ Ինչ վերաբերում է հարցին, արդյո՞ք այդ գործողությունները պատշաճ կերպով, այն ինչ երևում էր էկրանին, շատ մտահոգիչ էր, թվում է, թե անհամաչափ ուժի կիրառման դրվագներ կային։ Արդյո՞ք դա ահաբեկում է, դրա մասին ես ընդհանրապես չեմ խոսի»։

Բաց հասարակության հիմնադրամներ Հայաստանի գործադիր տնօրենից ասուլիսում հետաքրքրվեցի՞ն՝ ինքը հանդիպել կամ հեռախոսազրույց ունեցե՞լ է վարչապետ Նիկոլ Փաշինյանի հետ. «Ոչ, և ոչ։ Ես հեռախոսային կամ առերես կամ գրավոր որևէ խոսակցություն պատիվ չեմ ունեցել ունենալու պարոն Փաշինյանի հետ»։