Ձեր վստահելի աղբյուրը

«Քաղաքացիական գիտակցություն» ՀԿ նախագահ  Նարեկ Սամսոնյանը ֆեյսբուքյան ուղիղ եթերում ներկայացրեց «երեկվա մասկի շոուի հիմնական պատճառները, քաղաքական ուղերձը»:

«Այս ամեն ինչում ոչ միայն մեղավոր չէ ոստիկանությունը, այլ սրա զոհն է:  Այս մասկեքով տղերքն էլ են մեղք: Նիկոլ Փաշինյանի մտքի թռիչքն է, ոստիկանությունը բացարձակ կապ չունի, այս տղերը դավադիտ են եղել ձեր ձեռքը ու մի գցեք այս տղերքին: Մեզ քաղաքական հրամանի հետևանքով են բերման ենթարկել: Մեր նկատմամբ քաղաքական ճնշումներ են տեղի ունենում: Մեզ որևէ ձևով չեն կարող վախեցնել, որևէ ապօրինի գործողություն չենք կատարում»,- ասաց նա:

Նարեկ Սամսոնյանն ասաց, որ երեկ երկրում տեղի է ունեցել իրադարձություն, որը նոր քաղաքական մշակույթի սկիզբ է դրել. «Իրական ընդդիմադիր քաղաքական բոլոր ուժերը գնահատել են երեկվա տեղի ունեցած լկտիությունը, բոլոր ուժերը սատարում էին ոստիկանություն բերման ենթարկված երիտասարդներին, բոլորը հավաքվել էին ոստիկանության համապատասխան բաժնի դիմաց: Երեկ ձևավորվեց քաղաքական ուժերի կոնսոլիդացիայի հնարավորություն»:

Նրա խոսքով, ՀՀ-ում հասունանում է  սողացող իշխանափոխություն: 

«Սուտ Նիկոլին պետք է հակադարձել ճիշտ քաղաքացի, ճշմարիտ քաղաքացի սկզբունքը:  Հույս ունեմ՝ այս գործընթացը կավարտվի շատ արագ, այս գեներալացված ատելությունն  իրենց չի սրբելու տանի դաժան ձևով»,- ասաց Ն. Սամսոնյանը: 

Հիշեցնենք, որ նախօրեին  Նարեկ Սամսոնյանին, Ադեկվատ միաբանության անդամներն, այդ թվում Արթուր Դանիելյանն ու Կոնստանտին Տեր Նակալյանը,  ՎԵՏՕ հասարակական շարժման հիմնադիր Նարեկ Մալյանը, բերման էին ենթրակվել Ոստիկանության 6-րդ վարչություն: Նրանց բերման էին ենթարկել  ապօրինի զենք-զինամթերք պահելու կամ կրելու, թմրամիջոց պահելու  կասկածանքով: