Ձեր վստահելի աղբյուրը

Ադրբեջանում գերի ընկած, ապա մահացած  ՀՀ քաղաքացի, 20-ամյա Մանվել Սարիբեկյանի գործով ՄԻԵԴ գանգատ ներկայացրած փաստաբան Արա Ղազարյանը Panorama.am-ի հետ զրույցում ասաց՝ Եվրոպական դատարանի կայացրած վճիռն  իրեն բավարարում է։

«Դատարանն աննախադեպ եզրահանգումներ է կատարել, ճանապարհ է հարթել նման գործերով մյուս վճիռների՝ մասնավորապես Կարեն Ղազարյանի գործով։ Ինձ բավարարել է վճիռը, քանի որ դատարանն առաջ է քաշել առաջին հերթին ատելության շարժառիթով հանցագործության գաղափարը, այսինքն՝ սպանություն ատելության հիմքով, ինչն արդեն խտրականության արգելք է։ Ինձ բավարարում է նաև հետևյալ նախադասությունը. «Դիվանագիտական հարաբերությունների բացակայությունը հիմք չէ, որպեսզի Հայաստանի Հանրապետության հետ չհամագործակցի»։ Սա շատ կարևոր միտք է»,-ընդգծեց փաստաբանը։

Նրա խոսքով, դա նշանակում է, որ ԵԽ տարածքում չի կարող մի պետությունը մյուսի խնդրանքն անտեսել ու չպատասխանել։

«Սա անոմալիա է։ Բոլոր գործերով ՀՀ քննչական մարմիններն ուղարկում են խնդրագիր Մինսկի կոնվենցիայի շրջանակում խնդրելով համագործակցել։ Օրինակ, Կարեն Ղազարյանի գործով էլ է ուղարկված, խնդրում ենք համագործակցել, թե ինչ հանգամանքներում է նա հայտնվել Ադրբեջանում, գուցե մեր կողմից սխալ կա, գուցե ձեր կողմի՞ց է սխալը։  Ադրբեջանը բացարձակապես հրաժարվում է այդ խնդրագրերին պատասխանել»,-խնդիրը ներկայացրեց փաստաբանը։

Արա Ղազարյանը կարևորում է վճռի այն հատվածը, որտեղ առաջ է քաշվում  հայ-ադրբեջանական ատելության կոնտեքստը։

«Դատարանը հաստատված է համարել, որ ՀՀ քաղաքացիները չէին կարող գնալ այնտեղ ու իրավունքների պաշտպանություն հայցել։ Այս ամբողջը ճանապարհ է հարթում Կարեն Ղազարյանի գործով։ Սա նախադեպային ու շատ կարևոր վճիռ է հայ-ադրբեջանական հարաբերությունների առումով, իսկ մի քանի կետերով հենց Կարեն Ղազարյանի, Արսեն Խոջոյանի ու Բադալյանի գործերի համար նախադեպ է։ Հուսով եմ, սա զսպող ազդեցություն կունենա»,-ասաց Ղազարյանը։

ՄԻԵԴ-ը մի շատ կարևոր եզրահանգում էլ է արել, որի վրա ուշադրություն է հրավիրում փաստաբանը. «Նշվում է, որ հենց առաջին օրվանից կալանավայրի ղեկավարությունը քննչական մարմիններին հայտնեց, որ Մանվել Սարիբեկյանը գործել է ինքնասպանություն։ Հարց է առաջանում, այդ ինչպե՞ս իմացաք, որ ինքնասպանություն է։ Ուզում է ասել, որ հենց սկզբից դատավարությունն ընթացել է ուղղորդված։ Տեսնո՞ւմ եք, ՄԻԵԴ-ն ինչ մանրուքներից բացահայտում է սկզբունքներ»։

Որո՞նք են լինելու գանգատ ներկայացրած կողմի հետագա քայլերը։ Փաստաբանը մանրամասնում է, որ վճիռն ուժի մեջ մտնելու համար դեռ երեք ամիս ժամանակ կա։

«Եթե ուժի մեջ մտավ, ապա երեք ամսվա ընթացքում Ադրբեջանը նախ պետք է անհատական պարտավորությունները կատարի, այսինքն գումարը վճարի, հետո գործը կմտնի նախարարների կոմիտե, որտեղ մենք՝ որպես հայցվոր կողմ մոնիտորինգ կանենք, որ Ադրբեջանը վճիռը կատարի»,-ասաց փաստաբանը։

Վճիռը կատարելու համար Ադրբեջանում պետք է հարուցվի քրեական գոր, Ադրբեջանը  պետք կոմունիկացիայի մեջ մտնի Հայաստանի Հանրապետության հետ Մինսկի կոնվենցիայի շրջանակներում, որպեսզի միասնական քննություն իրականացնեն՝ պարզելու Մանվել Սարիբեկյանի՝ Ադրբեջանում հայտնվելու, նրա մահվան  հանգամանքները, պարզեն՝ արդյո՞ք ատելության շարժառիթով կատարված հանցագործությո՞ւն էր, թե՞ ոչ, պետք է պարզել նաև խոշտանգողներին, մահվան հասցնողներին։

«Վճռի տողատակերում կարդում ենք, որ Մանվել Սարիբեկյանն ամենայն հավանականությամբ սպանության  զոհ է դարձել»,-ընդգծեց փաստաբանը։

Ղազարյանը նաև մանրամասնեց, եթե երեք ամսվա ընթացքում կողմերից որևէ մեկը որոշի բողոքարկել ՄԻԵԴ վճիռը, ապա բարեհաջող ելքի հավանականությունը շատ փոքր է՝ մի քանի տոկոս, քանի որ մեծ մասամբ մերժվում է։

«Ուստի եթե երեք ամիսն անցավ, բողոքարկում չեղավ, վճիռն ուժի մեջ կմտնի»,-ասաց նա։

Հիշեցնենք, որ 2010թ. սեպտեմբերի 11-ին Գեղարքունիքի մարզի Թթուջուր գյուղի 20-ամյա բնակիչ Մանվել Սարիբեկյանը մի քանի խոշոր եղջերավոր անասունների տարել էր արոտավայր: Ժամը 17-ի սահմաններում «Քեղուտ» հանդամասում, մառախուղի հետևանքով կորցնելով կողմնորոշումը նա հայտնվել էր հայ-ադրբեջանական սահմանի վրա և գերեվարվել ադրբեջանցիների կողմից:

2010 թվականի նոյեմբերի 04-ին ադրբեջանական կողմը Հայաստանին է հանձնել Մանվել Սարիբեկյանի դին, ով, ադրբեջանական պաշտոնական հայտարարությունների համաձայն, մահացել է 2010 թվականի հոկտեմբերի 5-ին՝ խեղդամահության հետևանքով:

Դիակը քայքայված է եղել։Դատաբժշկական հետազոտության արդյունքում պարզ է դարձել, որ դիակի վրա առկա են կտտանքների հետքեր, ինչը վկայում է, որ Մ. Սարիբեկյանը ենթարկվել է խոշտանգումների, անմարդկային վերաբերմունքի: