ԵԱՀԿ ԺՄԻԳ ղեկավարը` Հայաստանի կարևորագույն ձեռքբերումների մասին
2019-ին Հայաստանը կարևորագույն ձեռքբերումներ է արձանագրել ժողովրդավարության ոլորտում, «Ամերիկայի Ձայն»-ի հետ զրույցում նշել է ԵԱՀԿ ԺՄԻԳ տնօրեն, դեսպան Ինգեբորգ Սոլրուն Գիսլադոթիրը, ով չորեքշաբթի օրը հանդես եկավ Վաշինգտոնում, Կոնգրեսի Հելսինկյան հանձնաժողովի լսումներին.
«2019 ին Հայաստանում գրանցվել է նկատելի դրական առաջընթաց։ ԵԱՀԿ ԺՄԻԳ-ի դիտորտական առաքելությունը հայաստանյան ընտրությունները դրական է գնահատել։ Այսպիսով Հայաստանը լուրջ առաջընթաց է գրանցել։ Չենք կարող պահանջել, սակայն կցանկանայինք Հայաստանի իշխանություններին ներկայացնել բարեփոխումների որոշակի առաջարկներ երկու կարևոր ոլորտում՝ ընտրական օրենսգիրքի և դատաիրավական ոլորտի թափանցիկ և անկողմնակալ դարձնելու ուղղությամբ»։
ԺՄԻԳ ղեկավարը Կոնգրեսի լսումներին էր հրավիրվել ԵԱՀԿ տարածքում մարդու իրավունքների պաշտպանության ոլորտի խնդիրները քննարկման նպատակով: Բացելով լսումները, կոնգրեսական Ջո Ուիլսոնն ընդգծեց՝ այսօր, հաշվի առնելով նոր մարտահրավերները, ԺՄԻԳ աշխատանքի կարևորությունն էլ ավելի է մեծանում:
«Ցավալի է, սակայն որոշ երկրներում մարդու իրավունքների պաշտպանության և ժողովրդավարության արժեքների հաստատման ոլորտում բավարար քաղաքական կամք չի նկատվում: Ավելին, ԵԱՀԿ-ի որոշ անդամներ փորձում են խանգարել կազմակերպության մյուս անդամ երկրներին խորացնել ժողովրդավարությունը»,-ասել է Ջո Ուիլսոնը։
Ի պատասխան դեսապան Գիսլադոթիրն ընդգծեց՝ մարդու իրավունքները և ժողովրդավարությունը ԵԱՀԿ-ի կողմից դիտարկվում են ոչ միայն իրավունքների այլև՝ անվտանգության համատեքստում. «Առանց քաղաքական և սոցիալական բազմազանության, առանց անկախ դատական իշխանության, ազատ լրատվամիջոցների և հզոր քաղաքացիական հասարակության չի կարող լինել ժողովրդավարություն, իսկ ժողովրդավարությունը նաև անվտանգության կարևոր գրավականն է»:
Խոսելով նոր մարտահրավերների մասին, ԺՄԻԳ ղեկավարն ընդգծեց տեխնոլոգիական առաջընթացի, մասնավորապես, սոցցանցերի խնդիրը. «Առցանց և սոցիալական լրատվական աղբյուրները հաճախ չարաշահվում են խտրականության տարածման և նույնիսկ բռնության արմատավորման նպատակով: Այստեղ պետք է հստակ հիշել՝ թվայնացումը չի փոխում իրավական սահմանները, և մարդու իրավունքները վավեր են առցանց նույնքան, որքան իրական աշխարհում և պետք է նույնքան հստակ պաշտպանվեն»:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
