Ձեր վստահելի աղբյուրը

Հայաստանում Ռուսաստանի Դաշնության դեսպանությունն արձագանքել է նախօրեին Հեռուստատեսության և ռադիոյի հանձնաժողովի նախագահ Տիգրան Հակոբյանի՝ մամուլի ասուլիսի ժամանակ հնչեցրած խոսքերին, թե հանրային մուլտիպլեքս փաթեթով արտասահմանյան հեռուստալիքների հեռարձակումը, որի մեջ մտնում է են նաև ռուսական հեռուստաալիքները, սպառնալիք են Հայաստանի ազգային անվտանգությանը։

«Զարմանքով տեղեկացանք նաև Տ. Հակոբյանի այն պնդմանը, թե նման մոտեցմանը համաձայն է նաև Հայաստանում Ռուսաստանի դեսպանը։ Ցանկանում ենք հիշեցնել, որ Հայաստանում ՌԴ դեսպանի հետ բավական վաղուց կայացած միակ զրույցի ժամանակ Հակոբյանի հնչեցրած միտքը, որ մտադիր են ստեղծել «նվազագույն սոցիալական փաթեթ»` առանց արտասահմանյան հեռարձակողների, ընդունվել է ի գիտություն։ 

Միևնույն ժամանակ, դիվանագիտական առաքելության ղեկավարի կողմից նշվել է, որ անհրաժեշտ է հաշվի առնել Ռուսաստանի բազմաթիվ ալիքների մշտական լսարան կազմող Հայաստանի բազմաթիվ քաղաքացիների շահերը:

Ընդհանուր առմամբ, Հայաստանի ղեկավարության կողմից մեր դաշնակցային, ռազմավարական, եղբայրական հարաբերությունների բնույթի հայտարարությունների ֆոնին՝ ռուսական հեռուստաալիքների՝ «ազգային անվտանգության սպառնալիք» լինելու թեմայի շուրջ թեզերը տարակուսանք են առաջացնում»,-ասվում է ՀՀ-ում ՌԴ դեսպանության հայտարարության մեջ:

Հեռուստատեսության ու ռադիոյի հանձնաժողովի նախագահ Տիգրան Հակոբյանն հունվարի 29-ին ասուլիսում ասել է, որ, իրենք կարծում են, որը ցանկացած սուվերեն երկրի գործառույթների մեջ է, թվային մուլտիպլեքսում, որն ապահովում է տվյալ երկրի քաղաքացիներին իրավունքն անվճար դիտել այս կամ այն հեռուստաընկերությունը, օտար հեռարձակողներ չպիտի լինեն

«Որովհետև մենք օտար հեռարձակողի վրա որևէ ազդեցություն չունենք։ Վաղն այդ օտար հեռարձակողներից որևէ մեկի հսկիչ փաթեթն, օրինակ, գնեց Ադրբեջանը ու սկսեց հակահայկական պրոպագանդա անել։ Տեսական բան չեմ ասում, այդ ամենը միշտ հնարավոր է։ Մենք այդ հեռուստաընկերությանը որևէ ձև տուգանելու իրավասություն չենք: Նաև օրենսդրության մեջ չկան այն նորմերը, որ հակահայական քարոզչության համար մենք կարող ենք ինչ-որ հեռուստաընկերություն փակել»,- ասել է նա։

Միաժամանակ նշել է, որ կարող են լինել որոշ բացառություններ՝ միջպետական պայմանագրեր, կամ հանրօգուտ բովանդակությամբ հեռուստաընկերության դեպքում. «Օրինակ` շատ լավ հանրամատչելի մանկական հեռուստաընկերություններ կան դրսում։ Դրանք կարող են հանրային մուլտիպլեքսում լինել։ Օրինակ` English Club-ը, որը մարդկանց անգլերեն կսովորեցնի։ Վաղը միգուցե լ ինչ–որ չինական հեռուստաընկերություն, որը մարդկանց չինարեն է սովորեցնում կամ ծանոթացնում չինական մշակույթին։ Բայց պրոպագանդիստական ալիքներ, որոնք դրսի շահերն են սպասարկում, որոնք խոսում են դրսի խնդիրներից, այստեղ չպիտի լինեն»։

Նրա խոսքով, այսօր Հայաստանում հեռարձակվող մի քանի դրսի հեռուստաալիքներ կան, որոնք կարող են դյուրահավատ հեռուստադիտողների մոտ ծայրահեղ բացասական կարծիք ստեղծել, օրինակ` վրացիների, ուկրաինացիների մասին, որովհետև տվյալ պետությունը նրանց հետ թշնամական հարաբերություններ ունի, մինչդեռ Վրաստանը Հայաստանի և հարևանն է, և դաշնակիցը։

«Կան արևմտյան ընկերություններ, որոնց թշնամին կամ հակառակորդը Իրանն է, և նրանք կարող են այդ հեռուստաընկերությամբ հակաիրանական բովանդակություն եթեր տալ, չէ: Ո՞վ է տուժում՝ և Հայաստանի բնակչությունը, որը սխալ պատկերացում կկազմի Իրանի մասին, և Իրանը՝ որպես մեր գործընկեր և շատ կարևոր խաղացող այդ դաշտում»,– նշել է նա:

Տ. Հակոբյանն ասել է, որ իր կոչերը, կարծիքները չեն կրում հակառուսական բնույթ. «Որևէ օտար հեռարձակող՝ լինի ամենամոտ երկրից, հանրային մուլտիպլեքսում չպետք է լինի՝ չթարգամանված և օտար բովանդակությամբ»:

Նրա խոսքով, սա միջազգային փորձն է:

«Մենք ելնում ենք մեր երկրի և ազգային տեղեկատվության անվտանգությունից, և լեզվական անվտանգությանից, և դրսի մանիպուլյատիվ հնարքներից: Սա միտված է այդ քայլերին և որևէ հակա՝ ռուսական, իրանական, եվրոպական, ամերիկյան տարր չպետք է փնտրել»,- ասել է Տ.Հակոբյանը: