Ձեր վստահելի աղբյուրը

Քրեական գործի նյութերի տրամադրումը  անհրաժեշտ է պաշտպանության իրավունքի իրացման համար։  Դատական նիստի ավարտից հետո լրագրողների հետ զրույցում հայտարարեց Ռոբերտ Քոչարյանի փաստաբանական խմբի անդամ Հովհաննես Խուդոյանը։

Նա ուշադրություն է հրավիրում այն հանգամանքին, որ գործի վերաբերյալ իրենց տրամադրված նյութերում առկա է ամեն ինչ ամեն ինչի մասին՝ սկսած 2008 թ. հարցաքննություններից, 12-13 հատոր մահացած անձանց սպանության հանգամանքներն են։

«Որևէ բացատրություն չկա այն մասին, թե դրանք ինչ կապ ունեն քննվող գործի հետ, իսկ մեղադրական եզրակացության մեջ ընդհանրական ձևակերպումներ են տրված։ Ներկայացված են նյութեր Ազատության հրապարակի  իրադարձությունների, 2008 թ. հունիսից հետո ոստիկանության ենթադրյալ կեղծիքների մասին, որոնք նույնպես բացարձակապես անհասկանալի է, թե ինչ կապ ունեն այս գործի հետ։ Բայց այս ամեն ինչն առանձնացվել է, ընդ որում ընտրողաբար, օրինակ տրված է մի ոստիկանի ցուցմունք, և նույն բանի մասին մեզ տրամադրված չէ երկրորդ ոստիկանի ցուցմունքը։ Մեր ասածը դա է, մենք չենք կարող ուղղակի վստահել դատախազությանը, ասել, դուք անկեղծ եք, էդ դեպքում դատարանի անհրաժեշտություն էլ չի լինի»,-ասաց փաստաբան Խուդոյանը։

Ինչ վերաբերում է դատախազության այն հիմնավորմանը, թե նախաքննության ընթացքում գտնվող քրեական գործի նյութերը ենթակա չեն հրապարակման, փաստաբանն ընդգծեց. «Նախաքննություն ընթանում է, նաև այն գործերը, որոնք մեր գործին չեն վերաբերում, տրամադրվել են մեզ։ Մենք ուզել ենք ամբողջական փաստաթղթերը մինչև այն օրվա դրությամբ, երբ գործից նյութեր են առանձնացվել։ Թե ինչ քննություն կա հիմա, դրանք մեզ բացարձակ չեն հետաքրքում»։

Հարցին, թե ո՞րն է իրական պատճառը, որ դատախազությունը չի ցանկանում  գործի նյութերը տրամադրվեն պաշտպանական կողմին, Խուդոյանն ասաց. «Միայն մեկ տրամաբանություն կարող եմ տեսնել։ Ամբողջ ծավալում առկա են նյութեր, որոնք կարող են օգտագործվել պաշտպանության կողմի կողմից, ինչը չեն ցանկանում»։

Նա ընդգծեց, նախաքննությունը կարող է տևել տասը տարի, իսկ իրենց վստահորդը չի կարող այս պահին ընթացող դատավարությունում զրկված լինել պաշտպանության իրավունքից։

«Նախաքննական մարմինը պետք է բացատրի, թե ինչքանով է հավասարակշռվում նախաքննության գաղտնիքը անձի պաշտպանության իրավունքի հետ։ Ընդհանուր իրավասության դատարանն արձանագրել է, որ պաշտպանության իրավունքը գերակշռող է։ Բացի այդ,  շատ հետաքրքիր ձևակերպումներ ունի առաջին ատյանի դատարանը։ Նշում է, որ այդ տվյալները չեն կարող հրապարակային դառնալ։ Այսինք, մենք դրանց կարող ենք ծանոթանալ, չհրապարակելու մասին ստորագրություն տալով։ Երբ կծանոթանանք, կտեսնենք, որ մեզ համար անհրաժեշտ նյութեր կան, մենք օրինակ, դատավոր Աննա Դանիբեկյանին կմիջնորդենք, որ այս գործից այսինչ նյութերը հրապարակել կամ դռնփակ կամ դռնբաց նիստում»,-ասաց փաստաբանը։

Նշենք, որ պաշտպան Հովհաննես Խուդոյանը նախաքննության ընթացքում միջնորդություն էր ներկայացրել, պահանջելով տրամադրել Մարտի 1-ի մայր գործով բոլոր նյութերը։ Սակայն քննիչը մերժել է: Փաստաբանը բողոք էր ներկայացրել դատարան, և 2019 թ․ նոյեմբերին Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, բավարարել էր բողոքը՝ պարտավորեցնելով ՀՔԾ-ին Ռոբերտ Քոչարյանի պաշտպաններին տրամադրել Մարտի 1-ի մայր գործով բոլոր նյութերը։ Դատախազությունը բողոքարկել է դատարանի նշված որոշումը։