Ձեր վստահելի աղբյուրը

Արցախի Քարվաճառ շրջանում հացադուլ հայտարարած Ալեքսանդր Քանանյանն ուշադրություն է հրավիրում իր պայքարին միացած Մհեր Պողոսյանի վրա։ Նա նշում է, որ Պողոսյանն անտեսված է, լռության մատնված, նրան անգամ բժիշկ չի այցելել։

«Մհերը Ստեփանակերտում միացել է հացադուլին՝ ի պաշտպանութիւն իմ պահանջների՝ յանուն Արցախի բնութեան՝ Քարվաճառի և Քաշաթաղի համապարփակ զարգացման հեռանկարի փրկութեան»,-մասնավորապես նշել է նա։

Ավելի ուշ հայտնի դարձավ, որ այսօր Արցախյան պատերազմի կին ազատամարտիկները այցելել են հացադուլ հայտարարած Մհեր Պողոսյանին։

Հացադուլ հայտարարած քաղաքացիները պահանջում են

1. դադարեցնել փոքր ՀԷԿ-երի շինարարությունները Քարվաճառի և Քաշաթաղի շրջաններում, անկախ դրանց թերավարտության աստիճանից, ու շինարարական տեխնիկան անհապաղ հեռացնել շինհրապարակներից,

2. Հրապարակայնացնել դրանց արտոնագրման և ֆինանսավորման հետ կապված ողջ ինֆորմացիան,

3. Ստեղծել հատուկ քննող հանձնաժողով Հայաստանի պաշտոնյաների, քաղհասարակության և անկախ փորձագետների մասնակցությամբ՝ ստուգելու համար արտոնագրման, ֆինանսավորման և շահագործման օրինականությունը, ինչպես նաև համապատասխանությունը ազգային անվտանգությանը, ազատագրված տարածքների բնակեցման հրամայականին և կայուն զարգացման ռազմավարությանը։