Ձեր վստահելի աղբյուրը

«Իշխանություններն այս ընթացքում արել են առավելագույնը, որպեսզի Սահամանդարական դատարանի շուրջ ստեղծված ճգնաժամը չխորանա: Սա արել են օրենքի, Սահմանդրության  տառին հետևելով»,- լրագրողների հետ ճեպազրույցում ասաց  ԱԺ «Իմ քայլը» խմբակցության ղեկավար Լիլիթ Մակունցը։

Նրա խոսքով, ՍԴ-ն ունի լեգիտիմության խոր դեֆիցիտ, ինչը վերականգնելու համար այսօր իրենց առջև պահանջ է դնում ՀՀ քաղաքացին. «Հայաստանի  քաղաքացիները մեր առջև այդ պահանջը դնում են, և մենք, որպես առաջնային մանդատ կրող ինստիտուտ, պարտավոր ենք այս հարցը հանգուցալուծել»:

Լ.Մակունցի խոսքով, այդ կապակցությամբ «Իմ քայլը» խմբակցությունն անհրաժեշտ է համարում հրավիրել արտահերթ նիստ, որի օրակարգը կհաստատվի խորհրդի նիստի ընթացքում, նախագծի հեղինակը կներկայացնի այն շեշտադրումները, որոնք դրել է նախագծի առանցքում, «Իմ քայլը» խմբակցությունը ԱԺ լիագումար նիստի ընթացքում հանդես կգա մեկնաբանություններով: Նա նշեց, որ բովանդակային առումով այս պահին մեկնաբնություններից զերծ կման, քննարկումները կիրակացնեն ԱԺ արտահերթ նիստի ընթացքում:

«Իսկ նպատակը միտված է մի բանի՝ շուտափույթ լուծել Սահմանադրական դատարանի շուրջ ստեղծված այս ճգանաժամը»,- ընդգծեց պատգամավորը: 

Մակունցը նշեց, որ չի կարող ասել, թե երբ կլինի նիստը, առաջարկը ներկայացրել են և կսպասեն:

«Արտահերթ նիստի ամբողջ իմաստն այն է, որպեսզի այն խնդիրները, որոնք արձանագրեցի, դրանք հանգուցալուծում ստանան»,- ասաց «Իմ քայլ» խմբակցության ղեկավարը:

Այնուհետև նա լրացրեց ամենասկզբում  արած իր հայտարարությանը. «Իշխանություններն այս ընթացքում արել են առավելագույնը, որպեսզի Սահմանադրական դատարանի շուրջ ստեղծված ճգնաժամը չխորանա, ի հակառակ Սահմանադարական դատարանի անդամների: Նկատի ունեմ այն, որ ՍԴ նախագահի  պարտականությունները կատարող Հրայր Թովմասյանը հնչեցնում է քաղաքական տեքստեր՝ լինելով ՍԴ նախագահ, խոսում է խրամատներից, ինչն արդեն իսկ քաղաքական տեքստ է, որի հակառակ կողմում, այսինքն ենթադրում է որպես թշնամիներ ներկայացվում են, օրինակ, մենք: Սա  ինչ է, եթե ոչ քաղաքական տեքստ:

Հրայր Թովմասյանը  ներկայանում է որպես դատական իշխանության ղեկավար, ինչն այդպես չէ։ Սա նշանակում է, որ նկրտումներ կան դատական իշխանությունն ուզուրպացնելու համար:  Սա վկայությունն է նրա, որ ի հակառակ իշխանության ջանքերի՝  չթողնել, որ ՍԴ շուրջ ճգնաժամը խորանա, տեղի է ունեցել հակառակը՝ հենց դատարանի կողմից»:

Հարցին՝ որտեղի՞ց են եզրակացնում, որ ժողովրիդ կողմից, օրինակ նման պահանջ կա, Մակունցն ասաց, որ միջազգային կառույցների  հարցումներն են վկայում,  վերջին հարցման համաձայն ՀՀ բնակչության 90,5 տոկոսը  երկու ուղղությամբ իրենցից  ակնկալում է  շատ կտրուկ և հետևողական փոփոխություններ՝ կոռուպցայի դեմ  պայքար և դատական համակարգում բարեփոխումներ:

Հարցին՝ ինչո՞ւ է Հրայր Թովմասյանը ձգտում ուզուրպացնել դատական իշխանությունը, Լիլիթ Մակունցը նշեց, որ այս պահին չի  պատասխանի, ԱԺ լիագումար նիստերի,  արտահերթ նիստի ընթացքում կունենան հնարավորություն  լսելու տարբեր մեկնաբանություն, վստահ է նաև այդ հարցի մեկնաբանությունը կհնչի: