Ձեր վստահելի աղբյուրը

ԱՄՆ պետքարտուղար Մայք Պոմպեոն շաբաթ օրը Մինսկում բանակցություններ էր վարել Բելառուսի նախագահ Ալեքսանդր Լուկաշենկոյի և արտգործնախարար Վլադիմիր Մակեյի հետ:

Պոմպեոն հայտարարել է, որ ԱՄՆ-ը պատրաստ է  Բելառուսին 100 տոկոսով ապահովել նավթով։
Պետքարտուղարը նշել է, որ այս եղանակով ԱՄՆ ցանկանում է օգնել Բելառուսին՝ «ստեղծել իր ինքնիշխան պետությունը»:

«Միացյալ Նահանգները պատրաստ է վաճառել Բելառուսին էներգետիկ ռեսուրսները՝ անհրաժեշտ ծավալներով և շուկայական գներով», - ասել է  Պոմպեոն:

ԱՄՆ պետդեպարտամենտի ղեկավարը հավելել է, որ Միացյալ Նահանգները աշխարհի էներգետիկ ռեսուրսների ամենամեծ արտադրողն է, և «այն ամենը, ինչ անհրաժեշտ է՝ ընդամենը դիմել այս երկրին»: Այս մասին գրում է «Իզվեստիա»-ն։

Նշենք, որ 2019 թվականի դեկտեմբերի վերջին Ռուսաստանի և Բելառուսի նախագահները քննարկել են Բելառուսին ռուսական նավթի և գազի մատակարարման հարցերը, բայց պայմանավորվել են շարունակել շփումները այս թեմայի շուրջ ընկերությունների մակարդակով:

Պոմպեոն նաև այցելել է Մինսկի բարձր տեխնոլոգիաների պարկ: Այստեղ շուրջ 280 ընկերություն պատվերներ է կատարում ամերիկյան ձեռնարկությունների համար, և անցյալ տարի պայմանագրերի ծավալը կազմել է մոտ միլիարդ դոլար:

Կիրակի երեկոյան ԱՄՆ պետքարտուղարը ժամանել է Ուզբեկստան, որտեղ մասնակցել է նախարարների հանդիպմանը՝ «Կենտրոնական Ասիա - ԱՄՆ» ձևաչափով:

Պոմպեոն  Ղազախստան այցի ժամանակ Նուր Սուլթանին էլ խորհուրդ է տվել զգուշանալ տարածաշրջանում Չինաստանի աճող ազդեցությունից։