Ձեր վստահելի աղբյուրը

«Ես չհասկացա՝ մեզ գովել են, թե հայհոյել են»,- լրագրողների հետ զրույցում նշեց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով Վենետիկի հանձնաժողովի նախագահ Ջիաննի Բուքիքյոն հայտարարությանը, որում նա անհանգստություն է հայտնել Հայաստանում ՍԴ շուրջ առկա լարված իրավիճակի վերաբերյալ:

Զոհրաբյանի խոսքով, Բուքիքյոյի հայտարարությունը սեպագիր արձանագրություն չէ, որ այդքան դժվար է մեկնվում և մեկնաբանվում։

«Ես շատ պարզ և հստակ հասկացել եմ հայտարարությունը։ Նախ պետք է ասեմ, որ պետք չէ այս հայտարարությունները որակել ինչ-որ մեկի պարտություն, ինչ-որ մեկի հաղթանակ, ինչ-որ մեկին փռեցին ասֆալտին էս հայտարարությունով։ Սրանք աշխատանքային փաստաթղթեր են, պետք չէ սրանց աշխատանքային խորհուրդների, առաջարկությունների նոմինալ արժեքը դարձնել քաղաքական գործոն։ Կարծում եմ՝ մենք էստեղ այլ խնդիրներ պետք է քննարկեինք։ Բայց ես հասկացել եմ այնպես, ինչպես հասկացել է Էդմոն Մարուքյան։ Եվ քանի որ բոլոր նման հայտարարությունները ուղղված են լինում իշխանություններին, ես վստահ եմ, որ այն ուղղված է իշխանություններին»,- նշեց Զոհրաբյանը։

Պատգամավորի խոսքով, այնուամենայիվ, հայտարարությունը չպետք է ողբերգություն դարձնել, այն աշխատանքային փաստաթուղթ է. «Եթե այս հայտարարությունները չլինեին, կարծում եմ՝ մենք ինչ-որ ջունգլիում չենք ապրում, որ չհասկանայինք՝ ՍԴ հարցը դարձրել են երկրի թիվ մեկ հարցը՝ բարձրացնելով մեկ անձի նոմինալ արժեքը։ Եվ երկրի կարևոր խնդիրները թողած, մենք բոլորս զբաղված ենք, իմ կարծիքով, արհեստականորեն օրակարգ բերված մեկ անձի խնդրով։ Եթե շարունակվի այս գործելաոճը, Հայաստանի հարցով զեկույցում գնահատականները շատ խիստ են լինելու»։

ԱԺ «Լուսավոր Հայաստան» խմբակցության ղեկավար Էդմեն Մարուքյանն էլ նշեց, որ Վենետիկի հանձնաժողովի նախագահի հայտարարությունները ուղղակի կոչեր են, և եթե կոչին իշխանությունը չի արձագանքում, դա հետո դառնում է զեկույց։

«Այսինքն՝ Հայաստանի վերաբերյալ զեկույցների մեջ են սրանք ներառվելու։ Հիմա էլ պետք է Հայաստանի պատվիրակությունները գնան տարբեր հարթակներում պայքարեն, որ մեր զեկույցներում նման բաներ չի գրվել։ Ավելին, երբ մեր զեկույցներում նման բաներ են գրվում, դա շահարկվում և օգտագործվում է Ադրբեջանի կողմից։ Մենք 1000 անգամ ասել ենք, որ պետք է շատ զգույշ լինել»,- նշեց Մարուքյանը։

Պատգամավորը հավելեց, որ մինչև այս  հայտարարությունները, իրենք անընդհատ իշխանությանն ասել են՝ չանել նման բաներ. «Էդ ո՞վ ա ուշադրություն դարձրել։ Թե՞ անպայման Բուքիքյոն պետք է ասի, որ ասեն Բուքիքյոն ա ասել։ Մինչև էդ էլ մենք ասինք՝ մի արեք, էստեղ զգույշ եղեք, էստեղ չի կարելի, էստեղ սահմանն անցնում եք, բայց, պարզ է, լսող չկա։ Էս արտահերթ նիստը որ հրավիրվել է, սրա շարունակությունն է։ Հիմա արտահերթ նիստի ժամանակ բերված նախագծերը նույնպես միջազգային փորձաքննություն չեն անցել, էս էլ հետո է խնդիր առաջացնելու։ Էս պրոբլեմը իշխանությունը տանում է խորացման։ Ինքը չի ուզում այլ լուծում տալ կամ ետ քաշվել»։

Մարուքյանը նշեց, որ բացի Վենետիկի հանձնաժողովի նախագահի հայտարարությունից, ԵԽԽՎ համազեկուցողների հայտարարությունը ևս ուղղված է իշխանությանը։ Պատգամավորը նշեց, որ այս հայտարարությունը ևս սխալ է մեկնաբանվել իշխանության կողմից։

«Երբ իշխանություններն ասում են՝ ողջունում ենք այս հայտարարությունը, դրանով ուզում են ծածկել մտահոգությունների ամբողջ հատվածը։ Դա թրոլինգ է։ Իշխանությունը բարձր մակարդակով թրոլինգի է ենթարկում ԵԽԽՎ համազեկուցողներին, և Վենետիկի հանձնաժողովի նախագահին։ Այսինքն՝  էդ մարդկանց ուղղակի ձեռ են առնում։ Եթե համեմատեք, թե նախկինում էս հայտարարությունները ոնց են մեկնաբանվել, պարզ կլինի։ Իսկ ներկայիս լեգիտիմ իշխանությունը ցույց է տալիս՝ թքած ունի էս հայտարարությունների վրա»,- նշեց Մարուքյանը։

Նրա խոսքով, նախկին իշխանությունները վախենում էին նման հայտարարություններից, փորձում էին շտկումներ անել, իսկ այս իշխանությունները թրոլինգ են անում. «Էս մարդիկ էլ են մեղավոր, քանի որ եթե հայտարարությունները հնարավորություն են տալիս այն տարբեր ձևերով մեկնաբանելու, ուրեմն ճիշտ է անում իշխանությունը, բայց դա իրենց պրոբլեմն ա։ Ես՝ որպես քաղաքական մարդ, ընկալում եմ հետևյալ կերպ, որ իշխանություններին ասում են այդ գործողությունների փունջը չանել։ Իսկ իշխանություններն այս կոչը վերագրում են Հրայրին, որ իրեն ասոում են՝ դու ըտեղ շատ ես բզբզում»։

Իր խոսքի վերջում Մարուքյանը նշեց, որ իշխանությունն ունի մեծ շնորհք՝ անիմաստ ցածր ռեյտինգ ունեցող մեկին հերոս դարձնելու։