Ձեր վստահելի աղբյուրը

«Հարգելի դատարան, նախորդ երկու նիստերին ներկա չեմ գտնվել իմ անվտանգությունն ապահովելու  անհրաժեշտությունից ելնելով»,-դատարանում հայտարարեց ՀՀ երկրորդ նախագահ Ռոբերտ Քոչարյանի փաստաբանական խմբի անդամ Արամ Օրբելյանը։

Մինչ այդ նա դատարանին հարցում կատարեց, տեղեկացավ, որ քննարկվում է նիստին չներկայացած փաստաբանների նկատմամբ սանկցիա կիրառելու հարցը։

Օրբելյանը պնդեց, դատական նիստի ընթացքում հնչել է սպառնալիք, ավելին, նիստի ավարտից հետո միջանցքում այդ սպառնալիքը վերարտադրվել է լրագրողների հետ հարցազրույցում։

«Այդ սպառնալիքին ավելացել է մեկ այլ տուժողի իրավահաջորդի ներկայացուցիչ, ավելացրել են պնդումներ, որ «եթե մենք չէ, աստված միգուցե կպատժի», ինչը անեծք է, ես չեմ ուզում խորանալ դրա իրավական հետևանքների, Հայ առաքելական եկեղեցու նկատմամբ դրա վերաբերմունքից»,-ասաց նա՝ ավելացնելով, որ որոշ անձանց համար նրբանկատ երևալու համար փաստաբանները չպետք է մտածեն, ցենզուրայի ենթարկեն իրենց խոսքը։

Օրբելյանն ընդգծեց, այս կամ այն մարդուն դուր գալու համար ինքը չպետք է  գրաքննի իր խոսքը, իր գործն իրավական ու փաստական հանգամանքները ներկայացնելն է։

Նա ասաց՝ դատարանից ակնկալում էր երկու բան՝ լսել ձայնագրությունը, ինչպես նաև պարզել, թե ինչ են ի նկատի ունեցել այդ արտահայտությունն անելիս։ Դրանք նույն նիսում մերժվել են, բայց հետագայում և ձայնագրությունն է լսվել, և տուժողի իրավահաջորդից պարզաբանում են պահանջել։ Իսկ դա նշանակում է, որ դրանց անհրաժեշտությունն ամեն դեպքում կար։

«Դրանից հետո նպատակահարմար գտա ներկա գտնվել նիստին։ Համաձայն չեմ դատարանի եզրահանգումների հետ, որ դա սպառնալիք չէ։ Ակնկալվում է, որ դատարանը պետք է նախագահի  գործընթացը, ապահովի բոլոր մասնակիցների պաշտպանությունը, այդ թվում պարոն Քոչարյանի արդար դատաքննության ու պաշտպան ունենալու իրավունքը, որը ներառում է պաշտպանների անկաշկանդ աշխատելու իրավունքով, ինչը սահմանված է Կոնվենցիայի 6-րդ հոդվածով»,-ասաց Օրբելյանը։

Նա առաջարկեց, երբ փաստաբանների մոտ առաջանում է սպառնալիքի զգացողություն, ապա պետք է հենց նույն նիստում ներկայացվեն պարզաբանումները, որպեսզի դատակլան նիստերը 2-3 շաբաթ հետաձգելու անհրաժեշտություն չառաջանա։

Փաստաբան Ռուբեն Սահակյանն էլ հայտարարեց՝ դատարան չի ներկայացել նույն պատճառներով, որ ներկայացրեցին գործընկերները՝ Ալումյանն ու Օրբելյանը։

«Բացի այդ ունեմ մեկ այլ հիմնավորում, թե ինչու չեմ ներկայացել։ Մենք մի շարք միջնորդություններ ենք ներկայացրել ու խնդրել ենք, անկախ դրանք բավարարելուց կամ չբավարարելուց, դատարանի որոշումները պատճառաբանել։ Դա օրենքի պահանջ է»,-ասաց Սահակյանը՝ նշելով, որ դատարանը չի պատճառաբանել որոշումները։

Նա ընդգծեց, որ ՄԻԵԴ-ն էլ Հայաստանի դատարաններին խնդրում է պատճառաբանել, մինչդեռ դատարանը չի անում։ Սահակյանն ասաց՝ նիստին չներկայանալը նաև բողոքի գործողություն է դրա դեմ։

Փաստաբան Հովհաննես Խուդոյանն էլ նկատեց, տեղյակ չի եղել դատական նիստի մասին՝  դատավարական պատշաճ ընթացակարգը չպահպանվելու հետևանքով։

Արամ Վարդևանյանն էլ նկատեց, դատարանը պարտավոր է ապահովել արդա դատաքննության իրավունքը։

«Ինչպե՞ս եք պատկերացնում, որ մենք կարողանանք լիարժեք որակյալ իրավաբանական օգնություն ցուցաբերել, երբ դատական նիստի ժամանակ տեղի է ունենում այն, ինչ տեղիէ  ունենում։ Մենք մշատպես տեսնում ենք, որ մեջտեղի հատվածում նստած անձինք թույլ են տալիս նման արտահայտություններ։ Ցավալին այն է, որ դա տեղի է ունենում նաև Փաստաբանների պալատի անդամ հանդիսացող փաստաբանի կողմից»,-իր դժոգոհությունը ներկայացրեց Վարդևանյանը՝ դատավորի ուշադրությունը հրավիրելով նաև նիստի ավարտից հետո տեղի ունեցող հայտարարություններին։

Արմեն Գևորգյանի փաստաբան Էրիկ Ալեքսանյանն էլ նկատեց, սույն դատավարության ժամանակ պաշտպանության կողմի նկատմամաբ տուժող կողմից եղել են վիրավորական, ընդհուպ մինչև սպառնալիք պարունակող արտահայտություններ, իսկ դատարանը չի ձեռնարկել միջոցներ, որոնք ուղղված կլինեն նման դրսևորումների կանխմանը։

Քոչարյանի փաստաբան Հայկ Ալումյանն էլ հստակեցրեց, իրենց դժգոհությունը, ոչ թե այդ արտահայտությունն արած Հարությունյանի դեմ է, այլ դատավորի անգործության ու ոչ պրոֆեսիոնալ լինելու։

Հիշեցնենք, որ հունվարի 21-ի նիստին Ռոբերտ Քոչարյանի, Արմեն Գևորգյանի փաստաբանները չէին ներկայացել դատական նիստին, ինչի պատճառով նիստը հետաձգվեց։

«Պաշտպանները գտնում են, որ հունվարի 9-ի դատական նիստում պաշտպանների հասցեին տուժողի իրավահաջորդի կողմից հնչեցվել է սպառնալիք, պաշտպանական կողմի կարծիքով դտարանը պատշաճ չի արձագանքել միջադեպին, այդ պատճառով պաշտպանության կողմը գտնում է, որ զրկված են իրենց իրավունքներն ու պարտականությունները լիարժեք իրացնելու հնարավորությունից։ Այս պատճառաբանությամբ փաստաբանները հայտնել են, որ չեն ներկայանա դատական նիստին»,- դատարանին հասցեագրված դիմումն ընթերցեց դատավորը։

Ավելի վաղ նույն պատճառաբանությամբ նիստին չէր ներկայացել նաև Յուրի Խաչատուրովի փաստաբան Միհրան Պողոսյանը։

Հունվարի 9-ի նիստում տուժողներից մեկի ներկայացուցիչը հայտարարել էր. «Ուրեմն թող հարգեն մարտի 1-ը և չփորձեն ինչ-որ այլ երևույթներ պատկերացնել, թե չէ իրենք էլ կհայտնվեն մեր օրին»։