Ձեր վստահելի աղբյուրը

Երեք ժամ մեկ րոպե ոստիկանությունում մնալուց հետո Հայաստանի Ֆուտբոլի ֆեդերացիայի նախկին նախագահ Ռուբեն Հայրապետյանին բաց են թողվել: 

«Դեկտեմբերին մեր տունը խուզարկելուց ես լրագրողներին ասացի, որ մեր տանից հանել են տանկ,  ԲՏՌ և չեմ հիշում էլ ինչ: Մի քանի օր առաջ, երբ հեռուստացույցով  նայում էի ոստիկանապետի ելույթը, տեսա՝ ինչպես դանդաղ է խոսում ու դանդաղ մտածում:  Իսկ եթե դանդաղ խոսում ու դանդաղ մտածում է, դանդաղ էլ հասկացել է: Իմ կարծիքով, ինքը իմ գրպաններում ու  մեքենայում փնտրում է  տանկ, ԲՏՌ:  Բնականաբար, հասկանում եք՝ ում հանձնարարությամբ է, հերթական կապիկությունն է»,- ոստիկանությունից դուրս գալուց հետո լրագրողներին ասաց Ռուբեն Հայրապետյանը:

Նա նշեց, որ փորձում են իրեն վախեցնել,  բայց մի բան չեն հասկանում՝ իր տեսակին նման ձևով չեն կարող վախեցնել, առհասարակ իրենց տեսակն է ուրիշ:

«Ամոթ չի ոստիկանի կողմից ասֆալտին պառկելը, բայց որ ես եմ մի գեղեցիկ օր պառկացնելու ու ոտքերս մաքրելու իրենց վրա, այդպես լինելու է»,- նշեց Ռ.Հայրապետյանը:

Նաև ասաց, որ, բնականաբար, զենք-զինամթերք չեն հայտնաբերել իր մոտ. «Իմ մոտ կա երեք օրինական զենք, թույլտվությունները  գրպանս դրած է: Երեք օրինական զենք ունեցող մարդը երբեք անօրինական զենք ու զինամթերք չի պահում: Իրենք էլ դա լավ իմանալով… հերթական շոուն է: Երևի հիշում եք երեկվա Քարվաճառի Արշակի լայֆը, ինձ թվում է՝  ժողովրդին ուզում են դրանով շեղել»:

Ռ. Հայրապետյանի խոսքով, իրեն չեն հարցաքննել, ոչ մի հարց չեն տվել, երկրից չբացակայելու մասին ստորագրություն չեն վերցրել:

«Ընթերակա էին ինձ բերել խուզարկելու, հարբած շան հոտ էր վրայից գալիս: Ամեն րոպե կարող են ասել՝ անհայտ անձը զանգահարել է, ասել է Հայրապետյանի մեքենայի մեջ կա զենք ու զինամթերք: Ամեն օր կարող են այդպես անել: Թող անեն: Այսօր էլ է, իհարկե, այդպես եղել:

Պատրաստ եմ՝ ամեն օր թող կանչեն: Ուզում են մեքենաս խուզարկեն, ասեմ էլ՝ թույլ չեմ տա մինչև սանկցիա չլինի:  Հիմա մեքենաս չեն տալիս,  որի իրավունքը չունեն: Իմ սեփականությունը, կոպիտ ասած, բռնագրավել են:

Այս ամենը ընդամենը շոու է, որ տանեն ցույց տան: Բառեր էլ չեմ գտնում այդ մարդուն ասել, թե գիշերը քնում՝ ինչ է մտածում: Մենք ազգովի մեղք ենք, պետք է փրկվենք  էս չարիքից»,- ասաց նա:

Ֆուտբոլի ֆեդերացիայի հետ կապված ի՞նչ չարաշահումների մասին են խոսում հարցին ի պատասխան նա ասաց. «Շուտով կբացահայտվի, թե ինչքան է ինձ պարտք Ֆուտբոլի ֆեդերացիան»:

Հիշեցնենք, այսօր մոտավորապես 15:00-ի սահմաններում բերան էին ենթարկել   ՀՖՖ նախկին  նախագահ Ռուբեն Հայրապետյանին ապօրինի զենք-զինամթերք կրելու կամ պահելու կասկածանքով: