Ձեր վստահելի աղբյուրը

«Իմ դատարան չներկայանալն իմ կարծիքի արտահայտման միակ ձևն էր»,-դատական նիստում ի պատասխան նախագահող դատավոր Աննա Դանիբեկյանի հարցի՝ հայտարարեց ՀՀ երկրորդ նախագահ Ռոբերտ Քոչարյանի փաստաբանական խմբի անդամ Հայկ Ալումյանը։

Նա ասաց, դատական նիստերից մեկում սույն դատավարության որպես տուժողի իրավահաջորդ  ներկայացած Էդիկ Հարությունյանի կողմից հնչեց արտահայտություն, որի իմաստն ինքը չի հասկացել, անձամբ է առաջարկել հստակություն մտցնել, թե ինչ ի նկատի ունի Հարությունյանը՝ այդ արտահայտությունը անելով։

«Դուք ՝ դատարան,  պարտավոր լինելով ապահովել դատավարության բնականոն ընթացքը, փոխանակ ինքներդ պարզեք, թե ինչ ի նկատի ուներ Հարությունյանը, որից հետո որոշեիք՝ պե՞տք է այն համարել սպառնալիք, թե՞ ոչ,  որևէ ձևով չարձագանքեցիք այդ արտահայտությանը, որից հետո երկու կողմերին՝ պաշտպանական ու մեղադրանքի, դիտողություն արեցիք այն բանի համար, որ մենք փորձեցինք պարզել, թե նա ինչ ի նկատի ուներ։ Երկու շաբաթ հետո նոր հասկացաք, որ դա պետք է պարզել, անցյալ դատական նիստին փորձեցիք պարզել, թե նա ինչ ի նկատի ուներ»,-ասաց Ալումյանը։

Նա նկատեց, պարզելու հնարավորությունից դատարանն իրենց զրկեց, իսկ իրենք ցանկանում էին հասկանալ, թե ինչո՞ւ է նիստում հնչում առնվազն ատելության խոսք։

«Դեռ սպառնալիքը մի պահ թողնենք մի կողմ։ Ընդ որում, ինչի՞ համար, Կարեն Մեժլումյանի կողմից շատ հավասարակշռված խոսքի համար։ Այս դատավարությանը ես ուրիշ որևէ հնարավորություն չունեի, Դուք գոնե դատավարության նորմալ ընթացն ապահովեք, դիտողություն եք անում ինձ։ Ես զրկված եմ դատավարական իմ իրավունքից, դրա համար որպես կարծիք հայտնելու միջոց ինձ մնաց անել այն, ինչ-որ արեցի։ Ես ցանկացա՝ գոնե էդ ձևով Ձեզ մոտ արթնացել ցանկություն դատավարությունն անցկացնել այն ձևով, ինչպես դուք պարտավոր եք անցկացնել։ Ուրեմն դուք պետք է տեղյակ լինեք ու հաշվի առնեք, որ դուք դատավարության իրավունքներից բացի՝ նկատողություններ անել, միջնորդություններ մերժել, ունեք նաև պարտականություններ։ Դրանից մեկն էլ այն է, որ պետք է այնպես անեք, որ ես այս դատական նիստին երբ գալիս եմ, բացի գործից, ուրիշ բանի մասին էլ չմտածեմ։ Բացի իմ պարտականություններից, որևէ այլ բանով մտահոգված չլինեմ։ Դա Ձեր պարտականությունն է, եթե դուք չեք անում, մեզ այլ ճանապարհ չի մնում։ Սա էր իմ չգալու պատճառը»,-ասաց Ալումյանը։

Նա նկատեց, որ իրենց ֆրանսիացի գործընկերն արդեն մի քանի դատական նիստերի չի կարողանում գալ ու մասնակցել, նիստերի ընթացքում կատարվածի պատճառով։

«Ինքը նման բաների սովոր չէ նման արարողությունների, որը մեր երկրում, չգիտես ինչի, կոչվում է դատական նիստ»,-ասաց փաստաբանը։

Հիշեցնենք, որ հունվարի 21-ի նիստին Ռոբերտ Քոչարյանի, Արմեն Գևորգյանի փաստաբանները չէին ներկայացել դատական նիստին, ինչի պատճառով նիստը հետաձգվեց։

«Պաշտպանները գտնում են, որ հունվարի 9-ի դատական նիստում պաշտպանների հասցեին տուժողի իրավահաջորդի կողմից հնչեցվել է սպառնալիք, պաշտպանական կողմի կարծիքով դտարանը պատշաճ չի արձագանքել միջադեպին, այդ պատճառով պաշտպանության կողմը գտնում է, որ զրկված են իրենց իրավունքներն ու պարտականությունները լիարժեք իրացնելու հնարավորությունից։ Այս պատճառաբանությամբ փաստաբանները հայտնել են, որ չեն ներկայանա դատական նիստին»,- դատարանին հասցեագրված դիմումն ընթերցեց դատավորը։

Ավելի վաղ նույն պատճառաբանությամբ նիստին չէր ներկայացել նաև Յուրի Խաչատուրովի փաստաբան Միհրան Պողոսյանը։

Հունվարի 9-ի նիստում տուժողներից մեկի ներկայացուցիչը հայտարարել էր. «Ուրեմն թող հարգեն մարտի 1-ը և չփորձեն ինչ-որ այլ երևույթներ պատկերացնել, թե չէ իրենք էլ կհայտնվեն մեր օրին»։