Ձեր վստահելի աղբյուրը

Նախկին փոխվարչապետ, նախագահի աշխատակազմի նախկին ղեկավար Արմեն Գևորգյանի փաստաբան Էրիկ Ալեքսանյանը դատական այսօրվա նիստում միջնորդեց՝ իր պաշտպանյալի նկատմամբ դադարեցնել քեական հետապնդումը հանցակազմի բացակայության հիմքով։

«Հարգելի դատարան, անհրաժեշտ ենք գտնում, որ Արմեն Գևորգյանի նկատմամբ Քրեական օրենսգրքի 38 և 300 հոդվածի 1-ին մասով և 311 հոդվածի 4-րդ մասի 2-րդ կետով հարուցված քրեական հետապնդումը դադարեցնել»,-ասաց նա։

Նա նախ նշեց, որ Քրեական օրենսգրքի 300  հոդվածը և 300 պրիմ 1 հոդվածներով քրեական գործերը քիչ են, «յոթի գործով» քրեական հետապնդումը դադարեցվել է։

«Հարգելի դատարան, մեզ չհաջողվեց պարզել մի դեպք, երբ սահմանադրական կարգը տապալելու հաղորդումների վերաբերյալ ՀՀ դատախազությունը կամ այլ իրավասու մարմիններ հարուցել են քրեական գործեր կամ իրականացրել են նախաքննություն»,-ասաց նա։
Փաստաբանն ասաց, որ քր. Օրի 300 պրիմ 1 հոդվածի վերաբերյալ բացակայում է որևէ մեկնաբանություն, որը կպարզաբաներ նոր հանցակազմի էությունը, ինչի հետևանքով առկա է անորոշություն։
«Քրեական օրենսգրքի 300 հոդվածի փոփոխությունը նախաձեռնել է գործադիր իշխանությունը, այն հաստատել է ՀՀ օրենսդիր իշխանությունը։ Պետական իշխանության բարձրադիր մարմիններում քննարկվել ու փաստացի ընդունվել է, որ Քր. Օր-ի 300 հոդվածի փոփոխության դեպքում  Քր. Օր-ի նոր հոդվածը՝ այսինքն 300 պրիմ 1-ը չի կարող կիրառվել մին այդ տեղի ունեցած դեպքերի համար։ Սա ոչ թե դատարանում մեղադրանքը պաշտպանող դատախազների դիրքորոշումն է, հարգելի դատարան, այլև ՀՀ պետականորեն կայուն ձևավորված դիրքորոշումն է, որից հրաժարվել չենք կարող»,-ասաց Ալեքսանյանը։

Արմեն Գևորգյանը նշեց՝ ավելացնելու ոչինչ չունի։

Նույն գործով ամբաստանյալ, պաշտպանության նախկին նախարար Սեյրան Օհանյանի փաստաբան Կարեն Մեժլումյանը կարծիք հայտնեց, որ միջնորդությունը ենթակա է բավարարման, պատճառաբանությունները հիմնավոր են, գործի վարույթը ենթակա է կարճման։

Նա նշեց, որ 2008-ին յոթի գործով անցնող ամբաստանյալներին ազատ արձակելու իրավական հիմք ստեղծելու համար ստեղծել է նոր հանցակազմ։ Նա հիշեցրեց, յոթի գործով ամբաստյալների ազատ արձակումը պահանջում էին միջազգային կառույցները։

«Այժմ իրավիճակն այլ է, դատախազությունը չգնալով իրավական ճանապարհով, կիրառելով խտրականություն, մեղադրանք է առաջադրել մի օրենքով, որ ընդունվել է 2008-ին։ Ես գտնում եմ, որ միջնորդությունը հիմնավորված է»,-ասաց Մեժլումյանը։

Ռոբերտ Քոչարյանի, Յուրի Խաչատուրովի փաստաբանները միացան միջնորդությանը։

Մեղադրող կողմն ասաց, գործի վարույթի կարճման, քրեական հետապնդման մասին իրենք կխոսեն բոլոր միջնորդությունները լսելուց հետո։

Հիշեցնենք, որ մեղադրական եզրակացության համաձայն, Արմեն Գևորգյանին մեղադրանք է առաջադրվել այն բանի համար, որ նա, 2006 թվականի փետրվարից մինչև 2008 թվականի ապրիլի 21-ը զբաղեցնելով ՀՀ Նախագահի աշխատակազմի ղեկավարի և Ազգային անվտանգության խորհրդի քարտուղարի պաշտոնները, օգտագործելով իր պաշտոնեական դիրքը, խոչընդոտներ վերացնելու և ցուցումներ տալու եղանակով օժանդակել է ՀՀ Նախագահ Ռոբերտ Քոչարյանին՝ տապալելու ՀՀ սահմանադրական կարգը։

Բացի այդ, Արմեն Գևորգյանը, հանդիսանալով պետական մարմնում մշտապես կազմակերպչական-տնօրինչական գործառույթներ իրականացնող պաշտոնատար անձ, «Թի Էս Էս Սի Արմենիա» ՍՊ ընկերության միակ մասնակից ու տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վճարելու գործարքին չխոչընդոտելու համար, 2008թ․ ապրիլին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 309․000․000 ՀՀ դրամին համարժեք 1․000․000 ԱՄՆ դոլար կաշառք, ինչպես նաև նույն ժամանակ թաքցնելով ու խեղաթյուրելով նշված գումարի իրական բնույթն ու ծագումը՝ օրինականացրել է առանձնապես խոշոր չափերով հանցավոր ճանապարհով ստացված եկամուտները։