Ձեր վստահելի աղբյուրը

5 ամսվա ճշտված տվյալներով մենք ունենք  87% միայն ներքին ռեսուրսների հաշվին իրականացվող ծրագրերի կատարողական, և 27%՝ արտաքին աջակցությամբ իրականացվող ծրագրերի։
Այս մասին այսօր ԱԺ ֆինանսավարկային և բյուջետային հարցերի մշտական հանձնաժողովի հերթական նիստի ընթացքում ասաց ՀՀ ֆինանսների նախարար Ատոմ Ջանջուղազյանը։

Ֆինանսների նախարարը նշեց, որ ցանկություն կա բյուջեի վարքագիծն ավելի կանխատեսելի դարձնելու։

«Դա նշանակում է, որ ծախսային մասում մենք պետք է կարողանանք մեր կանխատեսումների որակը փոխել։ Մենք ուզում ենք բյուջետային կարգապահության այլ որակ տեսնել. այլ ոչ թե ներկայացնենք, օրինակ, եկամուտների գերակատարումն այսինչ չափով, և ծախսերի թերակատարում։ Մենք կանխատեսել էինք պակասորդ 154 մլրդ դրամ, բայց փաստացի, մոտավորապես 65 մլրդ դրամ է ենթադրվում, որ կունենանք։ Ինչը նշանակում է, որ էդ չափով անկանխատեսելիության աստիճան ենք մենք ձևավորել մեր վարքագծով՝ մեր մյուս գործընկերների համար։ Այսինքն՝ տնտեսության մեջ ցանկացած սուբյեկտի համար իրեն հետաքրքրող մասով մեր կանխատեսելիության աստիճանի համարժեք դառնալը կհանգեցնի՝ իր վարքագծի համարժեք դառնալուն»,- նշեց Ջանջուղազյանը։

ԱԺ «Իմ քայլը» խմբակցության պատգամավոր Բաբկեն Թունյանը ասաց, որ խոշոր տնտեսվարողների մասին 2020 թվականի հունվարի մեկից պատգամավորներն ավելի շատ ինֆորմացիա պետք է ստանային, սակայն դեռևս նման ինֆորմացիա չկա. «Ինչո՞ւ չկա այդ ինֆորմացիան»։

Խոսքը «Իմ քայլը» խմբակցության պատգամավոր Արտակ Մանուկյանի ներկայացրած և խորհրդարանի կողմից ընդունված Հարկային օրենսգրքում փոփոխություններ և լրացումներ կատարելու մասին օրենքի նախագիծի մասին է, ըստ որի՝ առաջարկվում է հարկային գաղտնիք չհամարվող տեղեկությունների շրջանակը ընդլայնել հինգ ուղղություններով` հարկ վճարողի եկամուտների և ծախսերի վերաբերյալ տեղեկատվություն, վճարած հարկերի և տուրքերի վերաբերյալ տեղեկատվություն և ակտիվներ, հայտարարագրված աշխատողների թվաքանակ, ընկերության հարկային ռեժիմ և միջազգային պայմանագրերի հիման վրա այլ պետությունների հարկային մարմիններին ներկայացվող տեղեկություններ:

ՊԵԿ նախագահ Դավիթ Անանյանը պատասխանեց Թունյանի հարցին, թե՝ հարկային գաղտնիք պարունակող տեղեկատվության պահպանումը ինքնանպատակ չէ։

«Հարկային գաղտնիքը սովորաբար առևտրային գաղտնիք հանդիսացող տեղեկատվությունն է, որի անմիջականորեն պահպանման համար «Հարկայի ծառայության մասին» օրենքով հարկային ծառայողն ունի պատասխանատվություն՝ պահպանելու այդ հարկային գաղտնիքը»,- նշեց Անանյանը։

Վերջինիս խոսքով, հարցադրումը ոչ թե պետք է ՊԵԿ-ին անել, այլ հանրությանը. «Սա հանրային քննարկման թեմա է։ Մենք պետք է բոլորին հարցնենք, դուք կո՞ղմ եք, որ հարկային գաղտնիք պարունակող տեղեկատվությունը հասանելի լինի ոչ հարկային ծառայող հանդիսացող անձանց։ Սա շատ կարևոր է, որովհետև հարկային գաղտնիքի պահպանման հետ կապված մենք ներքին անվտանգության համակարգեր ունենք, որ հսկողություն են իրականացնում՝ կոնկրետ որ հարկ վճարողի հետ կապված որ հարկային ծառայողը ինչպիսի տեղեկատվություն փնտրեց, ինչպես մուտք գործեց և այլն»։

Անանյանը նշեց, որ շատ դեպքերում հարկ վճարողները կասկած են հայտնում, որ իրենց բիզնեսին առնչվող տեղեկատվություն է փոխանցվել մրցակից կազմակերպություններին։

«Այդպիսի դեպք եղել է, ծառայողական քննություն է իրականացվում , թե ում կողմից է ստուգվե այդ տեղեկատվությունը։ Արդյո՞ք այդ տեղեկատվության հոսքը եղել է մեր հարկային ծառայողներից։ Մենք պետք է հանրության հետ պայմանավորվենք, և ներքին պայմանավորվածության արդյունքում գանք որոշում ընդունենք։ Եթե հանրությունը կընդունի, որ առևտրային գաղտնիք պարունակող տեղեկատվությունը նաև պետք է հասանելի լինի հարկային ծառայող չհանդիսացող  այլ պաշտոնյաների, մենք դա կորող ենք քննարկել։ Էստեղ ընդդիմացողը մենք չենք»,- նշեց Անանյանը։

Բաբկեն Թունյանը արձագանքեց, որ դեմ է ինֆորմացիան վաճառելու պրակտիկային։ Բայց այստեղ խնդիրն արդեն ընդունված օրենքի մասին է, և օրինակ, աշխատողների թվին վերաբերող տվյալները պետք է հրապարակվեն. «Օրինակ, ես շահագրգիռ կողմ եմ, պատգամավոր կամ լրագրող, և ինձ հետաքրքիր է, թե x ընկերությունը ինչ ֆինանսական ցուցանիշներ ունի։ Եթե ես չգիտեմ, թե էդ ընկերությունը 2 մլրդ դրամից ավելի շրջանառություն ա ունեցել, թե ոչ, ո՞նց իմանամ, իրավունք ունեմ էդ ինֆորմացիան ստանալու»։

Անանյանը նշեց, որ ընդունվել է օրենք, ըստ որի՝ հարկային գաղտնիք պարունակող տեղեկատվության մեջ որոշակի ճշգրտումներ են արվել, և այն ինֆորմացին, որն օրենքով պետք է տրամադրվի, ՊԵԿ-ը կտրամադրի. «Ինչ վերաբերում է ֆինանսական տեղեկատվության հասանելիությանը. Ֆինանսների հաշվետության հրապարակման պահանջը դրված է տնտեսվարողի առաջ։ Հիմա դուք ասում եք, որ մենք էդ տեղեկատվությունը ձեզ տրամադրենք, դուք դա կարող եք պահանջել տնտեսվարողից։ 2 մլրդ եկամուտ ունեցող կազմակերպության առաջ կա պարտավորություն, որ պետք է իր ֆինանսական հաշվետվությունները հրապարակի»։