Երկու դատական հայց կա ԲՈԿ-ի դեմ. Գոգյան
2019 թվականի ընթացքում ԲՈԿ-ը հաստատել է 223 գիտական աստիճան, որոնցից 6-ը դոկտրորական են, 217-ը՝ թեկնածուական։ Այս մասին այսօր լրագրողների հետ զրույցում նշեց ԲՈԿ նախագահ Սմբատ Գոգյանը։
Նրա խոսքով, 2018 թվականի համեմատ 2019 թվականին 38 տոկոսով ավելի քիչ են եղել հաստատված վկայագրերը։ Կտրուկ նվազում են ապրել տնտեսագիտության բնագավառի պաշտպանությունները։
«Եթե 2018 թվականին դրանց քանակը եղել է 70, ապա 2019-ին եղել է 34։ Նախորդ տարի ամենաշատ պաշտպանությունները տեղի են ունեցել տեխնիկական գիտություններից, ընդհանուր առմամբ՝ 40 պաշտպանություն»,- ասաց Գոգյանը։
Գոգյանը նշեց, որ բոլոր բնագավառներում եղել է գիտական աստիճանների քանակի անկում, բացառությամբ՝ դեղագիտության. այստեղ եղել է աճ։ Դա էլ, ըստ Գոգյանի, պայմանավորված է ԵՊՀ-ում և ԵՊԲՀ-ում դեղագործության ուղղությամբ հետազոտությունների աճով։
2019 թվականին ԲՈԿ-ը ունեցել է բյուջեի թերծախս, 18 մլն դրամ վերադարձվել է բյուջե, քանի որ օպտիմալացումների արդյունքում ծախս չի եղել. «Մենք ունեինք պետական կարևորության արխիվ, որտեղ մեր վերջին 5 տարվա բոլոր պետական պաշտպանության փաստաթղթերն են, որը անվտագության հետ խնդիրներ ունի, կփորձենք դրանք այս տարի լուծել»։
Գոգյանը նշեց, որ 2 դատական հայց կա ԲՈԿ-ի դեմ, դրանցից մեկը նախարարության աշխատակից է, և նրա ատենախոսությունը չի ընդունվել. «Այդ ատենախոսությունում կան մեծածավալ արտագրություններ, մենք բացահայտել ենք 25 էջ, այնուհետև նախարարությունն ավելի մեծ ծավալներ հայտնաբերեց։ Բայց միևնույն է, բողոքը մնում է, որ ես պարտավոր եմ նրան հանձնել գիտական վկայագիր»։
Երկրորդ դեպքն էլ եղել է ԵՊՏՀ-ում, հայցորդը գաղտնի քվեարկության ժամանակ չի հավաքել անհրաժեշտ քանակությամբ ձայներ, սակայն մասնագիտական խորհուրդը սխալ որոշում է կայացրել և երաշխավորել է, որ ԲՈԿ-ը նրան տրամադրի գիտական վկայագիր, սակայն վերջինս մերժել է տրամադրել։
Դիտարկմանը, որ արտագրության փաստը կա, գիտական աշխատանք ներկայացնողը ի՞նչ հիմքով է դիմել դատարան, Գոգյանը պատասխանեց, որ ՀՀ օրենքները շատ խուճուճ են այդ առումով։
«Մեր կանոնակարգի 11-րդ կետն ասում է, որ հայցորդը իր աշխատանքում պարտավոր է նշել բոլոր աղբյուրները, որտեղից կատարել է փոխառություններ։ Հիմա երբ մարդը պաշտպանում է ատենախոսությունը, նրա որակավորման գործը գալիս է ԲՈԿ։ Կանոնակարգի 31-րդ կետի համաձայն՝ ԲՈԿ-ը ստուգում է՝ արդյոք կա աշխատանքի մեջ արտագրություն, թե ոչ։ Եթե չկա, փորձագետի հետ պայմանագիր է կնքվում, որպեսզի նա աշխատանքի վերաբերյալ տա եզրակացություն։ Եթե եզրակացությունը բացասական է, ապա աշխատանքն ուղարկվում է խորհուրդ՝ նորից քննարկելու, որի ընթացքում նա կարող է փոփոխություններ կատարել։
Հետո կրկին քվեարկություն է լինում, եթե խորհուրդը երաշխավորում է, ապա գործը կրկին գալիս է մեր մոտ։ Եվ մեր կանոնակարգի 41-րդ կետի համաձայն՝ գործը գալիս է մեր մոտ և մենք կայացնում են գիտական կարգի շնորհման որոշում։ Հիմա աշխատանքը եկել է մեր մոտ, մենք չենք տեսել, որ կա արտագրություն, բայց փորձագետը տվեց բացասական կարծիք։ Ուղարկեցինք խորհուրդը խորհուրդը նորից ուղարկել էր մեզ, և իր մեկնաբանությամբ մենք պետք է ստորագրենք և տանք այդ վկայագիրը»,- մանրամասնեց Գոգյանը։
Գոգյանը նշեց, որ գիտական աշխատանքների որակի բարձրացում տեղի չի ունեցել, բայց չափից դուրս վատ աշխատանքները չեն հասնում ԲՈԿ։
Ըստ Գոգյանի՝ գոյություն ունի գիտական հանդեսների շտեմարան, որտեղ գիտական աստիճան ստանալ ցանկացողը պետք է հոդվածներ տպագրի։
«Գոյություն ունեն հայաստանյան 5 գիտական հանդեսներ, որոնք ներառված են շտեմարանում։ Եվ գիտական 6 հոդվածի փոխարեն, ըստ կանոնակարգի, կարող է տպագրվել 3 հոդված, բայց մեկն անպայման նշված 5 հանդեսներից մեկում։ Ցանկացած բնագավառում կան 100-ավոր հանդեսներ, որտեղ կարելի է տպագրվել։ Մի մասում կարող է լինել վճարովի, մյուսում՝ անվճար տպագրություն»,- նշեց Գոգյանը։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
