Ձեր վստահելի աղբյուրը

«Ասել իրավիճակը լուրջ է, նշանակում է ոչինչ չասել»,- «Արցախը մեծ փոփոխությունների նախաշեմին» խորագրով պանելային քննարկման ժամանակ նման գնահատական հնչեցրեց ԱԱԾ նախկին տնօրեն Դավիթ Շահնազարյանը։

Նրա կարծիքով, եթե Արցախում նախագահական ընտրությունների արդյունքում այդ բարձր պաշտոնը զբաղեցնի այնպիսի անձնավորություն, որը հլու հնազանդ Փաշինյանի կամակատարն է լինելու, որն ուղղակիորեն պաշտպանելու է այն ճակատագրական սխալները, որ անում է Հայաստանի իշխանությունն ու կառավարության ղեկավարը, ապա վտանգները շատ են լինելու։

Շահնազարյանը հիշեցրեց՝ Հայաստանի վարչապետը հայտարարել է, որ Հայաստանի ու Արցախի իշխանությունների դիրքորշումները  Արցախի խնդրի գործընթացի ու կարգավորման վերաբերյալ նույնական են։

«Այդ դեպքում գիտե՞ք, խիստ հակասություն է առաջանում, եթե նույնական են, ինչո՞ւ ես ուզում Արցախի իշխանություններին տանել բանկցային սեղան։ Երկրորդ՝ դրանք չեն կարող նույնական լինել, քաղաքական տարբեր սուբյեկտներ են, նույնիսկ աշխարհքաղաքական ամենամոտ դաշնակիցների դիրքորոշումները չեն կարող լինել նույնական, նույնսիկ Հայաստանի երկու մարզերի ղեկավարների կարծիքը տնտեսական ու այլ հարցերի վերաբերյալ չի կարող լինել նույնական։ Բայց եթե նման բան է բարձրաձայնվում, ուրեմն դա հարված է Արցախի հանրապետության սուբյեկտայնությանը»,-ասաց բանախոսը։

Եթե Արցախի ապագա նախագահը լինի Փաշինյանի կամակատար, ապա, ըստ Շահնազարյանի,  ինքնամեկուսացնելու է Արցախը բոլոր բանակցային գործընթացներից։ Նա չի բացառում ու նաև շատ հավանական է համարում, որ Արցախի Հանրապետության նախագահի ու Լեռնային Ղարաբաղի ադրբեջանական համայնքի միջև սկսեն ուղղակի շփումներ։

«Ամեն ինչ գնում է դրան։ Հասկանալով, թե որ թեկնածուներին կամ թեկնածուին ի նկատի ունենք, հիմա Արցախում փորձ է արվում ստեղծել այն վիճակը, ինչ-որ Հայաստանում կար 2018-ի ապրիլին կամ դրանից հետո։ Հայաստանի իշխանությունը նպատակաուղղված տարանջատում է մտցնում Արցախի հասարակության մեջ, սա Փաշինյանի քաղաքականության կարևորագույն բաղադրիչներից մեկն է»,-ասաց նա։

Շահնազարյանի խոսքով, այս իշխանությունները նոր Հայաստանա ասելով բերում են տարբեր բաղադրիչներ, հիմա փորձ է արվում բերել նոր բարոյականություն։

«Փորձ է արվում դա ներմուծել նաև Արցախ։ Դիտորդական ու վերահսկողական առաքելություն իրականցնող կազմակերպությունները փորձում են քաոս մտցնել այնտեղ, ես կասեի որ դա ոչ միայն վերահսկողություն է, այլ ազդեցություն Արցախի քաղաքական գործընթացների վրա, քանի որ այդ կազմակերպությունների քույր կազմակերպությունները Հայաստանում ու սոցցանցերում իրականացնում են նույն բանը՝ թիրախում ունենալով Արցախը։ Արցախի հասարակությունը երբեք որևէ ընտրության ժամանակ տարանջատված չի եղել, հիմա քլունգն առած՝ Փաշինյանը քանդում է այդ միասնությունը։ Դրա հետևանքները շատ ու շատ վատ են լինելու»,-ասաց ԱԱԾ նախկին տնօրենը։