Ձեր վստահելի աղբյուրը

«Վերջերս պատգամավոր Ռուբեն Ռուբինյանն ասել է, որ ՍԴ ճգնաժամը  … ՍԴ ճգնաժամ չկա: ՍԴ բոլոր այն որոշումները,  որոնք ժամանակին ընդունել էին և ես համաձայն չէի կամ հասարակությունը համաձայն չէր, դա ճգնաժամ չէ»,- լրագրողների հետ հանդիպմանն ասաց «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը՝ խոսելով Սահմանադրական դատարանի շուրջ ստեղծված իրավիճակի մասին:

Նա նշեց, որ մի երիտասարդ, որի ազգանունը մոռացել է, ասում է՝ ձերբակալում են հանրային պահանջով. «Պետք չէ մեզ հավասարեցնել անկիրթ  ցեղերին:  Այն գործելաոճը, որը հիմա որդեգրվել է, ավելի հեռու  գնացող խնդիրներ է լուծում: Ամբողջովին հայությունը, որն ունի քաղաքակրթության մեջ իր ուրույն հետքը, այսօր փորձում են նմանեցնել անկիրթ ցեղերի հավաքածուի կամ խմբի: Դա համայն հայության խնդիրը պետք է դառնա»:

Լ. Ալավերդյանի խոսքով, շատ անխոհեմ դեմքով մի պատգամավոր, որի ազգանունը կրկին չի հիշում, բերել է օրենսդրական  նախաձեռնություն, ԱԺ նախագահն ամբողջովին հակաիրավական օրինազանցությամբ առաջարկել է քննարկել այն, որով պետք է Սահմանադրության մեջ փոփոխություն մտցնել առանց ՍԴ և ընդհանրապես:

«Անխոհեմությունն ընտրել եմ ամենամեղմ խոսքը, չիմանալով, իրազեկված չլինելով, չունենալով պատշաճ գիտելիքներ այն ոլորտներում, որի մեջ իրենք մտնում են, բացարձակապես նշանակություն չտալով Հայաստանի գործող Սահմանադրությանը՝ ձեռնարկվում են այնպիսի հլու հնազանդ… մի 70 իմքայլականները լռում են»,- ասաց նա:

Լ. Ալավերդյանն ասաց, որ 15-18 հոգի  պարբերաբար հանդես են գալիս անգրագետ, անտեղյակ և հակաօրինական հայտարարություններով ու նախաձեռնություններով:

«Հիմա որտե՞ղ է ճգնաժամը: Համոզված եմ՝ օրենսդիր մարմինը  գործադիր մարմնի ներքո, հենց այդ երկու մարմիններն են, որ ապրում են ճգնաժամ: Ճիշտ կլիներ, որ հանրության մեջ բոլոր նրանք, ովքեր հասկանում են, չեն սովորել հայհոյել, ովքեր հայերենի լեզվական շտեմարանը գիտեն ինչպես օգտագործել, որ անհամաձայնությունն արտահայտեն հայերենով, դրանք են հարցը լուծողը: Մենք ավելի շատ ենք, քան կասկածելի մակիաժով, միայն հայհոյանքով հանդես եկող 50 անց կանայք: Դրանք չեն ժողովրդի ներկայացուցիչները: Եկեք այլևս երկրորդ, երրորդ շերտերով չարտահայտվենք: Դրանք հակասոցիալական տարր են համարվում: Այդպիսինները կան բոլոր պետություններում, ուղղակի քաղաքական իշխանությունը մարմնավորող իշխանավորներն իրենց չեն ոգևորում: 6000 տարվա պատմության մեջ մենք ապրում ենք մի դրվագ:  Այս փորձերը՝ նսեմացնել Հայաստանը, հայությանը, Արցախը, այնքան են ցուցադրում նրանց անօգնական լինելը, կարծում եմ՝ հանրության մեջ գիտակից խավի համար ճիշտ ժամանակ է  ոչ թե պատասխանել, այլ մարտահրավեր նետել: Ինչքա՞ն կարելի է պասիվ դիրքերից խոսել: Բոլոր ունակ մարդիկ, ովքեր կարող են խոսքով, գրչով, այս կամ այն գործընթացով, համոզված ենք՝ պետք է այս դիմադրության շարժման նման մի հստակ դիրքորոշում հայտնեն:  Ի դեմ, բոլորը հօգուտ իշխանության է, բայց խոսում է  իշխանավորի ամբողոջովին սխալ գործելաոճի, բառապաշարի և ինձ համար ամենավտանգավորը՝ մտապաշարի մասին»,- ասա Լարիսա Ալավերդյանը:

Նա ընդգծեց, որ այս ամենի պատճառով ընկնում է իր երկրի վարկանիշը: 

«Իշխանության մեծ մասն առաջին դեմքերով տեղում չէ»,- ասաց տիկին Ալավերդյանը:

Հարցին՝ ինչո՞ւ են  իշխանություններն ուզում հասնել ՍԴ կազմի փոփոխությանը, նա պատասխանեց. «Իմ հիմնավոր կասկածն այստեղ է՝ ուզում են ունենալ ոչ թե այս ՍԴ-ն, որը ցուցադրել է իր  բարձր պրոֆեսիոնալիզմը: Ունեն դատարան, որը իշխանություններից ռեալ կախված չէ: Դարեր, տարիներ են անցնում որոշ  պետություններ, որ հասնեն այդ իրավիճակին: Պարզվեց՝ պետք չեն օրվա իշխանություններին իշխանություններից և իշխանավորից անկախ մարմին: Թե ինչ նպատակների համար՝ չգիտեմ, բայց անհագ ցանկությունն ունենալ այսօրվա իշխանությանը ենթարկվող ՍԴ-ն ու դատավորներին, ակնհայտ է»:

Ինչ վերաբերում է վերջին շրջանում տարբեր  մարդկանց բերման ենթարկելուն, ովքեր իշխանությունների հասցեին քննադատություններին են հնչեցնում, Լարիսա Ալավերդյանն ասաց. «Դժվարագույն մանկություն և բավականին նսեմացրած վիճակ երիտասարդ տարիներին՝ արգասիք է: Դա քաղաքականի, իրավականի, երկրի որևէ խնդրի լուծման հետ որևէ աղերս չունի»: Նա հորդորեց ոստիկանապետի պաշտոնակատարին հրաժարական տալ, քանի որ, Լ. Ալավերդյանի խոսքով, նա դեռ երիտասարդ ավյունով տղամարդ է, ոստիկանությունն ունի նման մարդկանց պահանջը և պետք չէ օրվա քմահաճույքի հետևից ընկած իր ապագա կարիերայի վերջ տա: