Ձեր վստահելի աղբյուրը

«Բոլոր այն մարդիկ, ովքեր կարողանում են մի քանի քայլ առաջ տեսնել և հաշվարկել, հասկանում են, թե ինչ է կատարվում այսօր մեր երկրում։ Եվ լռել ու չբարձրաձայնել այդ ամենի մասին, կլիներ շատ սխալ, հատկապես այն անձի կողմից, ով մեկ ու կես տարի զբաղեցրել է ԱԱԾ տնօրենի պաշտոնը և քսան տարի եղել է ԱԱԾ համակարգում»,- ասել է ԱԱԾ նախկին տնօրեն, գեներալ-մայոր Արթուր Վանեցյանը տպագիր մամուլի խմբագիրների հետ երեկ կայացած հանդիպմանը։

Նրա խոսքով, ստացվող տեղեկություններն ու դրանց վերլուծությունները փաստում են, որ հետևանքները վատ են լինելու Հայաստանի համար։

«Որպես օրինակ կարող եմ նշել եվրոպական կառույցների վերջին երկու կոշտ գնահատականները Հայաստանի վերաբերյալ, որոնք անվտանգության տեսակետից խնդիր են մեզ համար, դա վերաբերում է երկրի միջազգային իմիջին»,-նշել է նա։

Հարցին, թե գործող իշխանությունները փորձում են Արթուր Վանեցյանին հունից հանել տարբեր հրապարակումներով, գրառումներով, սադրանքներով, կկարողանա՞ նա դիմակայել դրանց, Վանեցյանն արձագանքել է.

«Ինձ հունից հանելը շատ դժվար է, գրեթե անհնար։ Անգամ մեկ-մեկ դա ինձ խանգարում է ցույց տալ իմ էմոցիաները։ Բայց կարող եմ ֆիքսել մի բան։ Վերջին շրջանում իմ դեմ տարվող տեղեկատվական արշավը շատ վաղուց էր պլանավորած և դերաբախշված։ Դեռևս երբ ես ԱԱԾ տնօրեն էի»։

Նա հիշեցրել է, որ իր պաշտոնավարման վերջին ամիսներին էլ  իր մասին կեղծ ու ստահոդ հոդվածներ են հրապարակվել։ ԱԱԾ նախկին տնօրենի խոսքով, այդ ամենը տեղավորվում է իր դեմ իրականացվող տեղեկատվական արշավի շրջանակում։

«Վերջին շրջանի բոլոր հրապարակումներն իմ մասին չհաստատվեցին, բոլորը սուտ էին։ Բերում են մի վարկած կամ թեզ, ներկայացնում են որպես վերջին կետի ճշմարտություն, հետո իրենք սկսում են իրենց հերքել, բանը հասավ նրան, որ ինձ մեղադրեցին պետական հեղաշրջման կազմակերպման մեջ»,-նշեց նա։

Վանեցյանը հիշեցրեց, որ «հայտնի թերթը» հրապարակում է հոդված իր մասին, որտեղ նրան մեղադրում է պետական հեղաշրջման փորձի մեջ, ինքը հերքում է, հետո դուրս է գալիս ԱԽ քարտուղար, կամ մի պատգամավոր և պնդում, թե նման փորձ է եղել։

«Այնուհետև ստանում ենք ԱԱԾ պաշտոնական պարզաբանումը, որ նման դեպք կամ նման փորձ չի եղել։ Դրանից հետո Նիկոլ Փաշինյանն ասում  է, թե մենք այդպես չենք ասել, ասել ենք, որ հիբրիդային հեղաշրջում է, հրապարակ է բերվում մի տերմին, որը եթե չեմ սխալվում, օգտագործվել է Ուկրաինայում։ Չգիտեմ, խոսքեր չեմ գտնում ասելու, անլրջություն է։ Պետական հեղաշրջման փորձ իրականացրած անձը պետք է նստած լիներ համապատասխան վայրում։ Ես նման ցանկություն չեմ ունեցել, ընդհակառակը, որևէ մարդ, ով կփորձի իրականացնել պետական հեղաշրջման փորձ կամ հակասահմանադրական ճանապարհով կփորձի տիրանալ իշխանությանը, նա պետք է դատապարտվի ու կրի իր պատիժը։ Իրավունք չկա հակասահմանադրական ճանապարհով կատարել որևէ քայլ»,-ընդգծեց նա։