Ձեր վստահելի աղբյուրը

«Ես հեղափոխությունից հետո արել եմ ամեն ինչ, որպեսզի արդարացնենք ժողովրդին տված խոստումները, այսպես կոչված թալանված փողերը վերադարձվեն պետական բյուջե: Օրինական ճանապարհով ինչ հնարավոր էր անել, կարծում եմ՝ ես արել եմ»,- տպագիր լրատվամիջոցների ղեկավարների հետ հանդիպմանն ասել է Ազգային անվտանգության ծառայության նախկին տնօրեն Արթուր Վանեցյանը:

Հարցին՝ ձեր հրաժարականը հետևեց ՍԴ նախագահ Հրայր Թովմասյանի շուրջ ստեղծված իրավիճակին, ի՞նչ կապ կա. «Կապն այն է, որ արդեն իսկ իշխանությունները չեն թաքցնում, որ իրենք չեն հանդուրժելու Հրայր Թովմասյանի Սահմանադրական դատարանի նախագահ լինելու հանգամանքը: Հրայր Թովմասյանին, անկեղծ եմ ասում, մինչև ԱԱԾ տնօրեն դառնալը չեմ ճանաչել, ծանոթացել եմ Ֆուտբոլի ֆեդերացիայի նախագահ դառնալուց հետո, որովհետև նրա որդին խաղում էր 14 տարեկանների հավաքականում, հաճախ էր գալիս խաղերին մասնակցելու, որտեղ ծանոթացել ենք:

Այն զարգացումները, որոնք եղան ՍԴ շուրջ վերջին շրջանում, ես չէի կարող ուղղակի լինել մասնակից նման զարգացումներին: Հիմա չեմ պատասխանի հարցին՝ ինձ եղե՞լ է ուղիղ հանձնարարական, չի՞ եղել, ես ասում եմ՝ իմ հրաժարական ներկայացնելու  հիմնական պատճառներից մեկը եղել է այդ հարցում անհամաձայնությունը, և ես հնչեցրել եմ կանգառի, սթափեցման կոչ, որը, ցավոք սրտի, տեղ չի հասել»,- ասել է Ա.Վանեցյանը:

Հարցին՝ ՀՀ նախկին նախագահների Ռոբերտ Քոչարյանի, Սերժ Սարգսյանի, ՍԴ նախագահ Հրայր Թովմասյանի վերաբերյալ կոնկրետ հանձնարարարականներ եղել են՝ ինչ-որ բան գտնել և նստացնել, նա պատասխանեց. «Կոնկրետ հանձնարարականներ եղել են ընդհանուր բոլորի նկատմամբ: Մենք կատարել ենք մեր աշխատանքը»:

ԱԱԾ նախկին տնօրենն ընդգծել է, որ միշտ պայքարել է պետական գաղտնիքի պահպանման համար. «Պետական գաղտնիք, անձնական կյանքին վերաբերող տվյալներ հրապարակել ինձանից երբեք, երբևիցե չսպասեք: Ես տիրապետում եմ շատ մեծ ինֆորմացիայի, բայց երբեք չեմ հրապարակի»: 

Նա նշեց, որ իր հրաժարականից հետո եղել են կարծիքներ, որոնք համատարած կարծիքներ էին և տարածվում էին պետական քարոզչամեքենայի կողմից, որ հովանավորել է նախկին իշխանություններին, չի թողել նրանց նկատմամբ հարուցվեն քրեական գործեր, նպաստել է նրան, որ հեռանան:

«Ես իմ հրաժարականից հետո կարող էի հայտարարել, որ զբաղվում եմ ակտիվ քաղաքական գործունեությամբ, բայց ես թողեցի, որ անցնի հինգ, հինգ ու կես ամիս: Ինչո՞ւ:
Իմ հրաժարականից հետո քանի՞ հոգի է նախկին իշխանություններից, այսպես կոչված, թալանչիներից ենթարկվել քրեական պատասխանատվության  և քանի՞ լումա գումար է վերադարձվել այսպես կոչված թալանված, կոռուպցիոն փողերից:  Եթե մեկ դեպք կհիշեցնեք, ներողություն կխնդրեմ:

Ինչ վերաբերում է նախկին իշխանության որոշ ներկայացուցիչների տեղեկատվություն եմ փոխանցել, որ կարողանան երկրից գնալ: Մի օրինակ բերեմ. այն ժամանակվա ԱԺ պատգամավոր Միհրան Պողոսյանի վերաբերյալ կար հարուցված ու կարճված քրեական գործ: Հայտնի օֆշորի գործի մասին է խոսքը:

Քրեական գործը վերաբացելու եղանակը մեկն է՝ եթե կան նոր երևան եկած հանգամանքներ ու գլխավոր դատախազը թույլատրի վերաբացել քրեական գործն ու քննություն իրականացնել: Մենք պաշտոնական գրություն ենք  գրել դատախազություն՝ առաջարկելով նոր երևան եկած հանգամանքների հիման վրա գործը վերաբացել: Ինչ-ինչ պատճառաբանություններով, որը, համոզված եմ, վաղը կբերեն այդ պատճառաբանությունները, թե ինչու չհամաձայնվեցին վերաբացել, վերադարձվել է մեզ: Այնուհետև Միհրան Պողոսյանը հանկարծակի մեկնեց երկրից: Հարց է առաջանում՝ ինչո՞ւ մեկնեց, ո՞վ է տեղեկացրել, որ մեկնի, ինչո՞ւ քրեական գործը չվերաբացվեց»,- ասել է Ա.Վանեցյանը:

Ինչ վերաբերում է հայտնի գաղտնալսման դեպքին՝ իր և Հատուկ քննչական ծառայության ղեկավար Սասուն Խաչատրյանի, նա նշել է. «Այդ  գաղտնալսումը մոնտաժված է: Մի խոսակցություն չէ, մի քանի խոսակցությունների մոնտաժված տարբերակ է: Այդ գաղտնալսումը ներկայացված է այնպես, որպեսզի տպավորություն ստեղծվի, որ ես ազդեցություն եմ ունեցել դատական իշխանության կամ դատավորների վրա: Նման բան  երբևէ չի եղել: Ես երբեք որևէ դատավորի հետ որևէ քրեական գործի շրջանակներում զրույց չեմ ունեցել։ Կարծում եմ՝ բոլորի անփութությունն էր: Ցավում եմ, որ նման դեպք է տեղի ունեցել: Իմ աշխատանքային կարիերայի մեջ իմ համար ամենացավոտ կետերից մեկն է, բայց եղել է այն, ինչ եղել է, առաջինն ու վերջինը չեմ պետական պաշտոնյաներից աշխարհում, որ ընկել է նման պատմության մեջ»։