Ձեր վստահելի աղբյուրը

«Եթե նախագծի հեղինակը հայտնաբերում է որևէ, նույնիսկ տեխնիկական խնդիր, որը կարող է հետագայում խնդիրներ ստեղծել, նա պարտավորություն է կրում շտկել այդ սխալները»,- լրագրողների հետ զրույցում նշեց ԱԺ «Իմ քայլը» խմբակցության պատգամավոր Վլադիմիր Վարդանյանն՝ անդրադառնալով ԱԺ արտահերթ նիստի հետաձգվելուն։

Այսօր նախատեսված ԱԺ արտահերթ նիստը հետաձգվեց, քանի որ նախաձեռնող կողմը հետ է կանչել արտահերթ նիստի օրակարգում ընդգրկված նախագծերը։ Օրակարգում ընդգրկված է «ՀՀ սահմանադրությունում փոփոխություն կատարելու մասին» օրենքի նախագիծը։

Հարցին՝ արդյոք նախագծում հակասահմանադրական խնդիրներ կան, և ինչու ինքը չի միացել օրենսդրական նախաձեռնությանը, Վարդանյանը պատասխանեց, որ ՀՀ-ում չի եղել և հնարավորություն չի ունեցել նախագծին միանալու։

«ԱԺ պատգամավորը իրավունք ունի միանալ կամ չմիանալ այս կամ այն նախագծին։
Հակասահմանադրականության խնդիրները ի հայտ են գալիս 2 պարագայում՝ կամ ի սկզբանե կան, կամ պարզվում են իրավակիրառության արդյունքում։ Հիմա մենք գործ ունենք նախագծի հետ, դուք կարո՞ղ եք երաշխավորել, որ որևէ փուլում ԱԺ-ի կողմից ընդունվել է որևէ նախագիծ, որը պարունակել կամ չի պարունակել հակասահմանադրական կետեր»,- նշեց Վարդանյանը։

Պատգամավորը հստակեցրեց, որ նախագիծը դեռևս ԱԺ-ում չի քննարկվել, բայց արդեն տարբեր մեկնաբանություններ են հնչում հարցի վերաբերյալ.

«Հակասահմանադրական ընթացակարգեր նախագծում չկան։ Առնվազն նման լրջագույն խնդիրներ, որոնք կարող են կապված լինել Սահմանադրության այս կամ այն նորմի կիրառման հետ, չկան։ Բացի այդ, նախագիծ ներկայացնելու իրավունքը ԱԺ պատգամավորների ¼-ի իրավունքն է։ Ներկայացվել է նախագիծ, թույլ տվեք գոնե քննարկենք այդ նախագիծը և տանք եզրակացություն»։

Վարդանյանը նշեց, որ նախագծով որևէ ընթացակարգ չի խախտվում։

Հարցին, թե որն է նպատակը երկրի նախագահին զրկել օրենքները ստորագրելու, իսկ ՍԴ նախագահին օրենքների վերաբերյալ եզրակացություն տալու իրավունքից, Վարդանյանը պատասխանեց՝ նախագծում նման բան չի հայտնաբերել։

«Եթե չեմ սխալվում, ապա այս նիստի օրակարգում ընդգրկված առաջին հարցը վերաբերում էր ՍԴ մասին օրենքի փոփոխությանը, հեղինակը օրակարգից հանել է։ ԱԺ մի քանի պատգամավորներ հեղինակել էին նախագիծ, որը վերաբերում էր ԱԺ կանոնակարգ օրենքում փոփոխություն կատարելուն։ Այդ նախագիծը հանվել է շրջանառությունից։ Սահմանադրության փոփոխություններն են մնացել նախագծում»,- նշեց Վարդանյանը։

Պատգամավորը վստահեցնում է, որ օրենքի նախագիծն առաջին ընթերցմամբ ընդունվելուց հետո ուղարկվելու է ՍԴ՝ եզրակացության։

Իսկ եթե ՍԴ-ն չտա դրական եզրակացություն և նախագիծը չգնա երկրորդ ընթերցման, ապա ըստ պատգամավորի, հանրաքվե կանցկացվի, որի դեպքում ՍԴ ևս իրավունք կունենա եզրակացություն տալու։

ԱԺ «Իմ քայլը» խմբակցության պատգամավոր Սիսակ Գաբրիելյանը նշեց, որ կար երկու նախաձեռնություն, որոնցից մեկով առաջարկվում էր սահմանադրական մի շարք օրենքներում փոփոխություն կատարել, որի բովանդակությունը ենթադրում էր, որ հանրաքվեի դրվող նախագծերը ՍԴ եզրակացության չպետք է ուղարկվեին. «Բայց այդ նախագիծը օրակարգից դուրս է եկել։ Եթե ԱԺ խորհուրդը որոշի, ապա այսօր ԱԺ արտահերթի ընթացքում քննարկվելու է Սահմանադրությունում փոփոխություններ անելու նախագիծը»։