Վանեցյանը՝ Կոստանյանի հայտարարության մասին
«Քաղաքական ուժի ձևավորում, ակտիվ շփում ԶԼՄ-ների և ժողովորդի հետ, հանդիպումներ քաղաքական տարբեր ուժերի, պետական, քաղաքացիական գործիչների ու մտավորականության հետ»,- տպագիր լրատվամիջոցների ղեկավարների հետ հանդիպմանն ասել է ՀՀ Ազգային անվտանգության ծառայության նախկին տնօրեն Արթուր Վանեցյանը՝ ներկայացնելով իր առաջիկա քայլերը:
Նա նշեց, որ այդ հանդիպումների ընթացքում կհասկանա հասարակության մեջ տիրող տրամադրությունները, կներկայացնի իր տեսակետները, կլսի նրանց տեսակետները, միասնական կախտորոշեն երկրում ստեղծված իրավիճակը, կփորձեն գնալ առաջ:
«Ես ինքս փորձելու եմ հեռու մնալ անցյալից, հորդորելու եմ մեր ժողովորդին անել նույնը, և մենք բոլորս միասնական լուծումներ ենք գտնելու և գնալու ենք առաջ: Ես շրջելու եմ ժողովրդի մեջ, լսելու եմ նրանց մտահոգությունները, ներկայացնելու եմ իմ մտքերը, մտահոգությունները, միասին կարողանալու ենք ժողովրդին բացատրել, որ այն, ինչ այսօր կատարվում է մեր երկրում, ճիշտ չէ: Եթե ժողովուրդը կընկալի, կհասկանա, մեզ կաջակցի, ուրեմն մենք կկարողանանք առաջ բերել մեր օրակարգը: Եթե ժողովուրդը մեզ չի առաջակցի, քաղաքական ուժերը չեն աջակցի, կհասկանանք, որ չենք կարողանում հասնել մեր դրած նպատակներին, ուրեմն կմտածենք ուրիշ ճանապարհ, ոչ թե ձեռքներս կծալենք, կհիասթափվենք, կգնանք»,- նշել է նա:
Հարցին՝ դո՞ւք էլ եք այսօրվա իշխանությունների այն կարծիքին, որ նախկինում որևէ լավ բան չի եղել, նա պատասխանեց. «Ես իմ ԱԱԾ տնօրեն եղած ժամանակ մի աննախադեպ հայտարարություն եմ արել, որի համար քննադատվել եմ: Երբ որ Ռոբերտ Քոչարյանին բոլորը սևացնում էին, նախկիններին բոլորը սևացնում էին, ես ասացի՝ ով է ասել, որ Ռոբերտ Քոչարյանը միայն վատ բաներ է արել, շատ լավ բաներ է արել: Նույնը վերաբերում է նախկին իշխանությունների յուրաքանչյուր ներկայացուցչի: Չկա մարդ, որն արել է բացառապես վատ բաներ կամ բացառապես լավ բաներ»:
Խոսելով արցախյան հակամարտության հիմնախնդրի մասին, Արթուր Վանեցյանն ասել է. «Մեզ համար ամենազգայուն հարցերից մեկն է: Ես Ղարաբաղի հիմնահարցի մասին կարող եմ խոսել բացառապես բաց աղբյուրներում առկա տեղեկությունների, վերլուծության հիման վրա: Իհարկե, տիրապետել եմ որոշակի տեղեկությունների ի պաշտոնե, բայց ես դրա մասին չեմ խոսի: Ղարաբաղի հարցի շուրջ վերջին երկու տարիներին անընդհատ լինում են շատ իրարամերժ հայտարարություններ: Մի կողմից իշխանություններն ասում են, որ չեն բանակցում, բայց տեսնում ենք, որ կան որոշակի շփումներ, ամեն դեպքում բանակցություններ, նման գործընթացներ տեղի են ունենում: Եթե չենք բանակցում, բանակցությունների այլընտրանքը պատերազմն է: Իսկ մեր երկրին այսօր պատերազմ պե՞տք է, թե՞ ոչ, պատերազմը մեր երկրի անվտանգությանը սպառնո՞ւմ է, թե՞ ոչ: Անկախ նրանից՝ կհաղթենք, թե ոչ, իշխանությունները պարտավոր են ամեն ինչ անել ապահովելու խաղաղ գործընթաց:
Մյուս կողմից, եթե կան բանակցություններ, բայց որի մասին իշխանություններն չեն հայտարարում, դա էլ այլ վտանգ է պարունակում: Իհարկե, բանակցությունները պետք է ունենան գաղտնի մաս, բայց պետք է հանրությունը որոշակի տեղեկացված լինի, թե ինչի շուրջ են բանակցում: Անձնապես, իմ վերաբերմուքն Արցախյան հարցի լուրջ հետևյալն է՝ ունենք կարևոր երեք սկզբունք՝ Արցախը երբեք այլևս չի կարող լինել Ադրբեջանի կազմում, Արցախի ժողովորդի ինքնորոշման իրավունքն անքակտելի է, այս կոնֆլիկտի լուծումը կարող է լինել միայն փաթեթային տարբերակով»:
Ինչ վերաբերում է առաջիկայում Արցախում կայանալիք նախագահական ընտրություններին, Հայաստանի ԱԱԾ նախկին տնօրենն ասել է, որ ընտրությունը պետք է կատարի Արցախի ժողովուրդը, ՀՀ իշխանություները պետք է հնարավորինս քիչ միջամտեն արցախյան ընտրություններին, որովհետև առանց այդ էլ վերջին շրջանում Արցախի սուբյեկտայնությունը բազմիցս դրվել է հարցականի տակ:
Լրագրողների խնդրանով Ա. Վանեցյանն անդրադարձել է նաև ՀՀ նախկին դատախազ Գևորգ Կոստանյանի վերջին հայտարարությանը:
«Այդ հայտարարությունը տարբեր մեկնաբանությունների արժանացավ: Բայց, կարծում եմ, եթե իշխանությունները շահագրգռված են «Մարտի 1»-ի ամբողջական բացահայտմամբ, պետք է որևէ կերպ արձագանքեն Գևորգ Կոստանյանի հայտարարությանը, նրա հետ գտնեն, որոշեն որոշակի քայլերի հերթականություն, որպեսզի նա գա և ներկայանա քննությանը»,- ասել է նա:
Հարակից հրապարակումներ`
- Վանեցյան. Ափսոսում եմ, որ իրավապահ ողջ համակարգի գործունեությունն այս աստիճան անլրջացնում են
- Վանեցյան. Պետական գաղտնիք, անձնական կյանքին վերաբերող տվյալներ հրապարակել ինձանից երբեք չսպասեք
- Արթուր Վանեցյան. Միքայել Մինասյանի հետ հանդիպել եմ Փաշինյանի մի հանձնարարությամբ, որի մասին գիտեն երեք մարդ
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
