Ձեր վստահելի աղբյուրը

ԱԺ աշխատակազմի ղեկավարի նախկին տեղակալ Արսեն Բաբայանն արձագանքել է ԱԺ արտահերթ նիստի չկայացումը։

Ֆեյսբուքյան իր էջում նա գրել է.

«Ողջունում եմ քաղաքական իշխանության կողմից վերջին պահին հակապետական քայլից հրաժարվելու հանգանանքը:

Հույս եմ հայտնում, որ այլևս երբեք ականատեսը չենք լինի վերջին օրերին իրականացվող սահմանադրական կարգի տապալման և իշխանության յուրացման փորձերին:

Գնահատում եմ քննադատներին լսելու այս բացառիկ նախադեպը և հույս հայտնում, որ այսուհետ ավելի վաղ փուլերում կհետևեն առողջ ու կառուցողական քննադատների հորդրոներին և չենք հասնի մենչև նախավերջին պահին, որը կարող է նաև այլ վտանգներ պարունակել»։

Հիշեցնենք, այսօր նախատեսված ԱԺ արտահերթ նիստը հետաձգվեց, քանի որ նախաձեռնող կողմը հետ է կանչել արտահերթ նիստի օրակարգում ընդգրկված նախագծերը։

ԱԺ նախագահ Արարատ Միրզոյանը նշել է՝ հաշվի առնելով, որ ԱԺ նիստի օրակարգում այլ հարց չկա, նիստը համարվում է փակված։

«Ըստ երևույթին, ինչ-որ տեխնիկական խնդիրների պատճառներով է նիստը հետ կանչվել, այսօր առավոտյան նախաձեռնողը նոր համանման օրենքի նախագիծ է դրել շրջանառության մեջ։ Ֆրակցիան միջնորդել է կրկին հրավիրել ԱԺ խորհրդի արտահերթ նիստ, որից հետո կրկին այսօր կգումարվի ԱԺ արտահերթ նիստ»,-ասել էր ԱԺ նախագահը։