Ձեր վստահելի աղբյուրը

«Ես գիտեմ, որ ԵԱՀԿ և ԵՄ երկրների դեսպանները եղել են այստեղ, հանդիպել են ԱԺ նախագահի հետ»,- խորհրդարանում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանn՝ անդրադառնալով ԱԺ արտահերթ նիստի հետաձգմանը։

Մարուքյանը նշեց, որ ենթադրում է Ենթադրում է՝ ԱԺ նախագահը ներկայացրել է, թե ինչ են ուզում անել, փորձել են դեսպաններին ներկայացնել, որ ամեն ինչ նորմալ է. «Նման հանդիպումների ժամանակ դեսպաները լռում են և չեն ասում՝ համաձայն են, համաձայն չեն, դա լավ է, թե վատ։ Դա պետության ներքին հարց է, բայց միջազգային պարտավորությունների համատեքստում բնականաբար դեսպանները զեկուցում են իրենց մայրաքաղաքներ, որտեղից արդեն երկիրը ստանում է այն իմպուլսները, որտեղից կստանա նման խախտումների պարագայում։ Նման սխալ գործընթաց սկսելու պարագայում»։

Ըստ Մարուքյանի 3 անգամ ԱԺ խորհրդի արտահերթ նիստ է գումարվել, նախագիծ է բերվել-հանվել, հետո հրավիրվել է ԱԺ արտահերթ նիստ և չեղարկվել։

Հիշեցնենք, որ այսօր նախատեսված ԱԺ արտահերթ նիստը հետաձգվեց, քանի որ նախաձեռնող կողմը հետ է կանչել արտահերթ նիստի օրակարգում ընդգրկված նախագծերը։

Նախագծով ԱԺ «Իմ քայլը» խմբակցության մի շարք պատգամավորներ առաջարկում են փոփոխություն կատարել Սահմանադրության այն հատվածում, որը վերաբերում է Սահմանադրական դատարանի անդամների և նախագահի պաշտոնավարման դրույթին: Առաջարկվում է Սահմանադրության մեջ ամրագրել հետևյալը՝ մինչև Սահմանադրության 7-րդ գլխի ուժի մեջ մտնելը նշանակված ՍԴ նախագահի և անդամների պաշտոնավարումը դադարում է:

«Իշխանությունն էլ է հասկանում, որ շատ պրոբլեմատիկ փաթեթ է բերել, և փորձում է ինչ-որ խնդիրներ շտկել»։ Մարուքյանի խոսքով, նախագիծը միանշանակ բազմաթիվ խնդիրներով լի է. «Երբ մտածում էի՝ ինչ հարցեր տալ հեղինակին, այնքան հարց ունեմ, որ անհնար է 3 ժամանոց քննարկման ժամանակ այդ հարցերը տալ»։

Ըստ պատգամավորի, նախագծում բավականին քաղաքական հարցեր կան, և քաղաքական մեծամասնությունն ուզում է խորհրդարանում Սահմանադրության հոդվածներից մեկը փոխել, բայց երկրորդ ընթերցման փաստաթուղթ չի ներկայացրել, որպեսզի առաջին ընթերցումից հետո տապալի նախագիծը և այն գնա հանրաքվեի։

«Եթե խորհրդարանը կարող է այդ փոփոխությունն անել էստեղ, ինչու եք ժողովրդին տանում ընտրական տեղամասեր։ Ինչո՞ւ է պետք մինչև մայիս քարոզարշավ անել և Սահմանադրության մի հոդված փոփոխելու համար ՀՀ միլիոնավոր քաղաքացիների տանել ընտրական տեղամաս»,- նշեց Մարուքյանը։

Ըստ պատգամավորի՝ թե հանրաքվեի դեպքում, թե խորհրդարանի կողմից ընդունվելու դեպքում օրենքի մասին ՍԴ եզրակացությունը պարտադիր է.«Եթե իրենք չեն ուղարկում ՍԴ, ուզում են հանրաքվե անել, կարող են էլի ապօրինի ձևով այստեղ ընդունել։ Ժողովուրդն ընտրել է իրենց, թող լուծեն հարցը։ Բա տարի ու կես ասում են՝ ժողովուրդը մեզ ասել է էս արեք, անում ենք։ Բա ասել ա, ինչի՞ էստեղ չեք ընդունում, ինչի՞ եք ժողովրդին տանում տեղամասեր։ Ինչո՞ւ եք Սերժ Սարգսյանին, Ռոբերտ Քոչարյանին քարոզարշավի հնարավորություն տալիս, ինչո՞ւ եք նրանց տալիս հնարավորություն, որ բանտերից ու ազատության մեջ եղած ժամանակ դառնան քարոզիչներ։ Մեկը մտածե՞լ է սրա մասին»։Մարուքյանի խոսքով, այս իշխանությունն անընդհատ ինքն իր ոտքին կրակելով է զբաղված։

«Երբ մենք ասում ենք՝ այ ախպեր ջան, այ ցավդ տանեմ, այ գլխիդ ղուրբան, ոտքիդ մի կրակի, էս մարդիկ չեն հասկանում, մի բան էլ ստանում ենք ամենավատ վերաբերմունքն ու պատասխանը»,- նշեց Մարուքյանը։

Բացի այդ, պատգամավորը համոզմունք հայտնեց, որ ՍԴ ճգնաժամ չկա, և եթե ինչ-որ մեկն ասել է կա ճգնաժամ, դրա համար չի կարելի մատաղ անել իրավունքի գերակայությունը, Հայաստանի միջազգային վարկը.

«Չի կարելի էս քարոզարշավի միջոցով նախկին ռեժիմին վերակենդանանալու հնարավորություն տալ։ Էլ ո՞նց բացատրեմ։ Կարո՞ղ եք ասել մի ռեֆորմ, որ այս իշխանությունն ուզել է անել, և ՍԴ-ն արգելափակել է։ Հեքիաթ. անձի հետ է կապված խնդիրը։ Հրայր Թովմասյանը նախկին իշխանության ներկայացուցիչ է, Սահմանադրության հեղինակներից մեկն է, և իր թիմը հեռացել է իշխանությունից։ Ինքն էլ պետք է ժամանակին պատշաճ կերպով գնար, բայց որ չի հեռացել, դա չի նշանակում, որ էդ մի մարդու համար կարելի է զոհաբերել այսքան արժեք»։

Մարուքյանն իր խոսքում ՍԴ նախագահ Հրայր Թովմասյանին հեռանալու կոչ արեց՝ նշելով. «Հրա՛յր հեռացիր, գնա այ ախպեր, չե՞ս տեսնում ինչեր են անում։ Բայց ասեմ, սա օգուտ է Հրայր Թովմասյանին, որ հանրաքվե լինի, օգուտ է Սերժ Սարգսյանին»։