Չեմ բացառում, որ ՍԴ դիմելու նախաձեռնություն սկսենք. Մարուքյան

Իրավունք 23:37 06/02/2020

Չեմ բացառում, որ ՍԴ դիմելու նախաձեռնություն սկսենք. Մարուքյան

Էդմոն Մարուքյանը չի բացառում, որ այսօր ընդունված նախագիծը Սահմանադրական դատարան ուղարկելու հարցով խորհրդարանում ստորագրահավաք սկսի՝ դիմելով «Բարգավաճ Հայաստան»-ին: Այս մասին հայտարարել է ինքը՝ «Լուսավոր Հայաստան» խմբակցության ղեկավար Էդմոն Մարուքյանը «Ազատության» ուղիղ եթերում:

Նշենք, որ 88 կողմ, դեմ ՝ 15, ձեռնպահ ՝ 0 ձայների համամասնությամբ Խորհրդարանն այսօր ընդունեց ԱԺ որոշման նախագիծը։ Ըստ այդմ՝ ղեկավարվելով ՀՀ սահմանադրության 202-րդ հոդվածի երրորդ կետով՝ ՀՀ ԱԺ-ն որոշեց ՀՀ սահմանադրությունում փոփոխությունների նախագիծը դնել հանրաքվեի։

Հայաստանի Հանրապետության Սահմանադրության փոփոխությունների նախագծով առաջարկվում է 1995 թվականի հուլիսի 5-ի Հայաստանի Հանրապետության Սահմանադրության՝ 2015 թվականի դեկտեմբերի 6-ի փոփոխություններով, 213-րդ հոդվածը շարադրել նոր խմբագրությամբ։

«Մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի եւ անդամների պաշտոնավարումը դադարում է:

Սահմանադրական դատարանի դատավորների թափուր տեղերի համար առաջադրումները կատարում են հաջորդաբար Կառավարությունը, Հանրապետության նախագահը եւ դատավորների ընդհանուր ժողովը: Սույն հոդվածի 1-ին մասի հիման վրա մինչեւ Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի եւ անդամների լիազորությունները համարվում են դադարած, իսկ առաջացած թափուր տեղերը համալրելու ժամկետները եւ այլ մանրամասները սահմանվում են Սահմանադրական դատարանի մասին օրենքով նախատեսված կարգով:

Նշված կարգը նախատեսող սահմանադրական օրենքի փոփոխություններն ընդունվում են եւ ուժի մեջ են մտնում սույն հոդվածի ուժի մեջ մտնելուց հետո՝ երկամսյա ժամկետում»,- նշված է նախագծում:

Մանրամասն՝ տեսանյութում:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: